Hramadstva33

Samyja pažyłyja palitviaźni — chto jany i za što ich aryštavali

Adzin ź ich atrymaŭ dzieviać hadoŭ kałonii, i jamu terminova patrebnaja pierasadka nyrki, inšaha sudziać siomy raz zapar.

Tysiačy ludziej u Biełarusi siadziać u turmach za svaje palityčnyja pierakanańni, za vystupy suprać dyktatury ci za patrabavańnie svabodnych vybaraŭ i sumlennaha padliku hałasoŭ na ich. Siarod viaźniaŭ — niamała ludziej starejšaha vieku, vieteranaŭ pracy. 

Natalla Taran

Natalla Taran u 2017 hodzie. Fota: jaje staronka ŭ «Adnakłaśnikach»

Samaja pažyłaja z palitźniavolenych, čyje imiony viadomyja, — 75-hadovaja Natalla Taran. Jana naradziłasia ŭ horadzie Jałta. Pa prafiesii była tokaram, ale apošnija hady na piensii.

Zatrymali jaje za publikacyi ŭ «Adnakłaśnikach». Kramołu ŭhledzieli ŭ niekalkich «kłasach» pad dopisami. Heta paličyli paklopam na Łukašenku, abrazaj Łukašenki i pradstaŭnika ŭłady. Žančynie dali try z pałovaj hady źniavoleńnia.

Sudziła jaje viadomaja ŭ Babrujsku sudździa Volha Sierakova. Jana časta zajmajecca palityčnymi kryminalnymi spravami, asudziła pa ich kala 20 čałaviek.

Volha Sierakova — aktyŭnaja vykanaŭca masavych palityčnych represij paśla 2020 hoda. Fota ź jaje staronki Ukantakcie

Siarod inšaha, jana dadała paŭhoda da prysudu Siarhieja Frančuka, brata kalinoŭca Vadzima Kabančuka, a taksama ŭchvaliła pieravod palitviaźnia Andreja Navickaha na strohi režym adbyćcia pakarańnia.

Vasil Bieraśnieŭ

Vasil Bieraśnieŭ. Fota: «Viasna»

Vasil Bieraśnieŭ — samy stary ź viadomych palitviaźniaŭ-mužčyn, jamu 73 hady.

Jon viadomy ŭ Oršy čałaviek. U 80-ja Bieraśnieŭ byŭ dyrektaram sielskahaspadarčaj vučelni ŭ Vysokim pad Oršaj (ciapier — Vysokaŭski ahrarny kaledž). Nieŭzabavie ŭznačaliŭ Aršanski rajonny saviet deputataŭ. Ale paśla prychodu Łukašenki da ŭłady staŭ na bok łahiera demakratyčnych siłaŭ.

Byŭ upieršyniu aryštavany ŭ 2006-m za ŭdzieł u paślavybarčych akcyjach pratestu. U 2010-m bałatavaŭsia ŭ miascovyja saviety ad arhkamiteta pa stvareńni partyi «Narodnaja hramada», jakoj kiruje Mikoła Statkievič. A ŭ 2017-m adbyvaŭ 14-sutkavy aryšt za ŭdzieł u aršanskim «Maršy niedarmajedaŭ».

Taksama mužčyna zajmaŭsia pravaabaronaj, pradstaŭlajučy Biełaruski Chielsinski kamitet u Oršy i vakolicach. Uvachodziŭ u Aršanskuju kaalicyju demakratyčnych siłaŭ.

A z 2016 hoda kiravaŭ aršanskaj supołkaj prafsajuza radyjoelektronnaj pramysłovaści (REP). Dziejničała jana i ŭ rajonach pablizu — Tałačynskim, Sieńnienskim, Dubrovienskim. Zajmaŭsia jurydyčnymi pytańniami, dapamahajučy ŭ pracaŭładkavańni, abskardžvajučy niezakonnyja zvalnieńni i niavypłaty zarobkaŭ.

Jaho zatrymali 20 krasavika 2022 hoda pa spravie prafsajuza REP. A razam ź im i Hienadzia Fiadyniča ź Viačasłavam Areškam. Bieraśnievu prysudzili dzieviać hadoŭ kałonii za «stvareńnie ekstremisckaha farmavańnia», «zakliki da sankcyjaŭ» i «raspalvańnie varožaści».

U kałonii stan Vasila Bieraśnieva pahoršaŭ da krytyčnaha. Spačatku źjaviłasia infarmacyja pra toje, što ŭ jaho prablemy z adzinaj nyrkaj i padvyšany cisk. Administracyja SIZA i kałonii ihnaravała zajavy pra akazańnie miedyčnaj dapamohi.

Dziesiać dzion tamu stała viadoma, što Bieraśnieva pieraviali ŭ špital, bo jamu patrabujecca terminovaja pierasadka nyrki. Miedykamientozna dapamahčy jamu niemahčyma, i jon maje patrebu ŭ bieśpierapynnym miedycynskim nahladzie.

Alaksandr Jarašuk

Fota: Facebook-staronka Biełaruskaha kanhresa demakratyčnych prafsajuzaŭ

Lidaru Biełaruskaha niezaležnaha prafsajuza Alaksandru Jarašuku 71 hod.

Jarašuk bolš za 20 hadoŭ uznačalvaŭ Biełaruski kanhres demakratyčnych prafsajuzaŭ. Časta vystupaŭ pasiarednikam u pieramovach pamiž uładami Biełarusi i jeŭrapiejskimi čynoŭnikami, Mižnarodnaj arhanizacyjaj pracy. 

Jaho zatrymali 19 krasavika 2022 hoda. Abvinavacili va ŭdziele ŭ akcyjach pratestu i «zaklikach da sankcyjaŭ». U vyniku jamu prysudzili čatyry hady kałonii.

Za represii suprać niezaležnych prafsajuzaŭ režym Łukašenki atrymaŭ adkaz ad Mižnarodnaj arhanizacyi pracy. Jana ŭžyła suprać Biełarusi 33-y artykuł statuta MAP. Arhanizacyja pierastała akazvać dapamohu aficyjnym uładam Biełarusi, a biełaruskija delehacyi nie zaprašajucca na aficyjnyja mierapryjemstvy MAP. Taksama apisanyja rekamiendacyi dla biznesu — pierahledzieć adnosiny ź Biełaruśsiu i zakryć usie prajekty, nie nakiravanyja na palapšeńnie situacyi z pravami pracoŭnych. Krainam-čalcam MAP zabaraniajecca departavać u Biełaruś prafsajuznych aktyvistaŭ.

Patrabavańnie MAP — pryniać misiju arhanizacyi ŭ Biełarusi i dazvolić jaje čalcam naviedać prafsajuznych lidaraŭ u niavoli. Aficyjny Minsk čakana admaŭlajecca, a lidar praŭładnaj Fiederacyi prafsajuzaŭ Michaił Orda nazvaŭ rašeńnie «manipulacyjaj i falsifikacyjaj».

Artykuł 33 užyvaŭsia pierad hetym tolki adnojčy — u dačynieńni da Mjanmy ŭ 2001-m za prymianieńnie prymusovaj pracy. Mjanma tady zhubiła adčuvalnuju častku mižnarodnaj padtrymki, u tym liku ŭ halinie sielskaj haspadarki i finansavańnia inavacyjnych prajektaŭ. U vyniku sankcyi z Mjanmy byli amal źniatyja tolki praz 11 hadoŭ. Heta aficyjnaje pryznańnie taho, što ŭ Biełarusi krytyčnaja situacyja sa svabodaj abjadnańniaŭ i schodaŭ.

Alaksandr Novikaŭ

Alaksandr Novikaŭ

Alaksandru Novikavu z Homiela taksama 71 hod. Jon litaraturaznaŭca i aŭtar błoha litkritika.by (ciapier — litkritika.blogspot.com). Viadoma, što ŭ časy SSSR mužčyna słužyŭ u Kamitecie dziaržaŭnaj biaśpieki i mieŭ aficerskaje zvańnie.

U svaim błohu jon krytykavaŭ ułady Biełarusi i asabista Mikałaja Čarhinca, kiraŭnika aficyjnaha Sajuza piśmieńnikaŭ. Za heta Čarhiniec čaściakom pisaŭ na jaho zajavy ŭ milicyju za «paklop», a paśla napisaŭ na jaho adkryty danos na sajcie sajuza, jaki nazyvajecca «Aj dy šelma, aj dy padliźnik». Novikava abvinavačvali ŭ tym, što jon byccam padmanam «prabraŭsia» ŭ praŭładny sajuz piśmieńnikaŭ, stavić znak roŭnaści miž Hitleram i Stalinym, nie nadta pavažliva stavicca da Čyrvonaj Armii, a taksama krytykuje Łukašenku.

U 2022-m Novikaŭ zaniaŭ praŭkrainskuju pazicyju. Taksama jon paraŭnoŭvaŭ padziei ŭ Biełarusi z ramanam Orueła «1984» i 1937-m, pikavym hodam stalinskich represijaŭ.

27 červienia 2022 hoda Alaksandra asudzili na dva hady kałonii za «niezakonny zbor infarmacyi pra pryvatnaje žyćcio» i «raspalvańnie varožaści ci varažniečy». Farmuloŭka abvinavačańnia takaja:

«N. publikavaŭ na svaim sajcie artykuły, jakija mieli na mecie damahčysia pierahladu suśvietnaj historyi, vynikaŭ vajny, dyskredytacyi Pieramohi. Raźmiaščaŭ materyjały, u jakich źmiaščalisia prykmiety reabilitacyi nacyzmu, a taksama varožaści ŭ adnosinach da hrup, jakija pavažajuć historyju savieckaha pieryjadu.

Akramia taho, publikavaŭ u fejsbuku fatahrafii, imiony i źviestki ab miescy pracy supracoŭnikaŭ MUS».

Pierad tym, jak apynucca za kratami, mužčyna napisaŭ na staroncy ŭ «Adnakłaśnikach»:

«Siabar spaznajecca ŭ biadzie. Ale nie zaŭsiody siabry mohuć dapamahčy. Asabliva, kali na tvaim kalendary 1937 hod. Ja zaŭsiody z vami, siabry!»

Vasil Dziemidovič

Vasil Dziemidovič. Fota: baza «Kibierpartyzanaŭ»

Vasil Dziemidovič — samy stary čałaviek u śpisie datyčnych da «terarystyčnaj dziejnaści». Admietna, što dziejnaść hetaja zaklučałasia ŭ pakidańni kamientaroŭ u telehram-čatach.

Jamu 71 hod. Naradziŭsia Vasil va Uździenskim rajonie, u vioscy Stalboŭščyna. U 1971 hodzie jaho zabrali ŭ armiju. Słužyŭ jon u elitnaj na toj čas inžynierna-sapiornaj čaści desantnych vojskaŭ №11932, jakaja tady znachodziłasia ŭ Litvie.

Dziemidovič kala 20 hadoŭ pražyŭ u Naŭharodskaj vobłaści, dzie pracavaŭ juryskonsultam i byŭ zasnavalnikam firmy. Viadoma, što ŭ 2013-m mužčyna pierajechaŭ u Minsk, ale paśla viarnuŭsia ŭ Rasiju. Kali dakładna jon viarnuŭsia ŭ Biełaruś nazusim — nieviadoma.

U Dziemidoviča, nakolki viadoma, niama blizkich ludziej. Žonka mužčyny nie hramadzianka Biełarusi i razam jany nie žyvuć, dziaciej u jaho niama.

Upieršyniu łukašenkaŭcy źviarnuli na jaho ŭvahu ŭ 2021 hodzie. Tady Vasil vyviesiŭ na svajoj chacie ŭ Niaśvižy nacyjanalny ściah Biełarusi ŭ honar Dnia Voli 25 Sakavika. Za heta jaho pakarali aryštam.

Ahułam jon napisaŭ bolš za tysiaču kamientaroŭ u roznych čatach sa svajho telehram-akaŭnta. Upieršyniu jaho asudzili 16 červienia 2022-ha, tady ž uziali pad vartu. Tady jamu prysudzili 6 hadoŭ kałonii ŭzmocnienaha režymu sa štrafam u 50 bazavych vieličyń i kampiensacyjaj słužbovym asobam, jakich «abrazili» jahonyja kamientary, na 32 tysiačy rubloŭ.

Paśla hetaha nad im adbyłosia jašče piać sudoŭ i ŭžo pačaŭsia siomy — vyniki apošnich dvuch nieviadomyja, ale na čaćviortym jahony termin pavialičyŭsia da siami hadoŭ, a ahulnaja suma štrafaŭ siahnuła piaci tysiač rubloŭ. Možna mierkavać, što ahułam jamu prysudzili nie mienš za vosiem hadoŭ turmy.

U mužčyny adbylisia dziasiatki ciažkich etapaŭ u roznyja miescy źniavoleńnia pa ŭsioj Biełarusi. Mužčyn-palitviaźniaŭ etapujuć u kajdankach u ciesnacie i heta ciažka navat dla zdarovych maładych mužčyn. Pakolki ŭ Dziemidoviča niama blizkich, stan jahonaha zdaroŭja nieviadomy.

Palityčnyja represii ŭ Biełarusi nie spyniajucca z 2020 hoda. Praz kryminalny pieraśled prajšli niekalki tysiač biełarusaŭ, a ciapier u źniavoleńni znachodziacca nie mienš za 1697 čałaviek, asudžanych abo abvinavačanych pa palityčnych matyvach, ź ich 1487 pryznanyja palitviaźniami.

«Naša Niva» — bastyjon biełaruščyny

PADTRYMAĆ

Kamientary3

  • mikola
    21.10.2023
    Var*jacka hvora Kraina !
  • Ziaziula
    21.10.2023
    Dziakuj za artykuł. Ludzi mahli b uvajści ŭ sapraŭdny parłamient i vyrašyć šmat prablem ŭ krainie. Žyli b jak u Šviejcaryi z takim talenavitym i pracavitym narodam. Ale ž pieramahła kakistakratyja, z hrazi ŭ kniazi.
  • Vierojatnyj
    22.10.2023
    Ziaziula, nažal, zrusifikavanyja Švajcaryj nie budujuć i nidzie narmalna nie žyvuć. 

Voś čamu ŭ Kitai mohuć prysłuchoŭvacca da Polščy16

Voś čamu ŭ Kitai mohuć prysłuchoŭvacca da Polščy

Usie naviny →
Usie naviny

Kamaroŭski rynak pieratvaryŭsia ŭ sapraŭdnaje mora VIDEA6

Siłaviki ŭ Breście zatrymali dyrektara kampanii za ŭdzieł u pratestach u žniŭni 2020 hoda

U Minsku z-za patopu zakryli stancyju mietro «Park Čaluskincaŭ» VIDEA

«U Biełarusi maju muzyku rekłamavała KDB, a ŭ Polščy — palicyja». Bancar prakamientavaŭ svajo zatrymańnie ŭ Varšavie9

Litva raźviarnuła na miažy bolš za 20 mašyn ź Biełarusi — u tym liku z hramadziankaj Litvy za rulom5

Minsk siońnia pajšoŭ pad vadu FOTY13

Amierykaniec u 14 hadoŭ staŭ samym maładym futbalistam u historyi Amierykanskaj futbolnaj lihi

«Rychtujucca da vajny, a hienieratary nie ŭ stanie kupić». Što raskazvajuć pra situacyju ŭ Mazyry miascovyja žychary3

Ziamla ŭvajšła ŭ mieteorny patok Piersieidaŭ. Dzie i kali pabačyć hetu nieziamnuju pryhažość?

bolš čytanych navin
bolš łajkanych navin

Voś čamu ŭ Kitai mohuć prysłuchoŭvacca da Polščy16

Voś čamu ŭ Kitai mohuć prysłuchoŭvacca da Polščy

Hałoŭnaje
Usie naviny →