«Vyjavy likaŭ śviatych pavinny vyklikać stanoŭčyja emocyi». Ułady patłumačyli, čamu prybrali ikony novapakutnikaŭ z chrama
Prybranyja z Pakroŭskaha kafiedralnaha sabora ŭ Hrodnie ikony ŭtrymlivali «nieprymalnyja ŭ takim bohaŭhodnym miescy sceny hvałtu i varožaści». Tak adkazali na rezanans u źviazanym z abłvykankamam telehram-kanale «Hrodno Miedia Group», zaŭvažyła vydańnie hrodna.life. Heta praŭładny kanał, dzie publikujuć naviny z rajcentraŭ, šaržy na apazicyjanieraŭ i ździeki z vajny ŭ Ukrainie.
«Hety fakt sprabujuć, jak zvyčajna, pierakrucić i padnieści jak niešta drennaje i niapravilnaje, choć kožny z nas viedaje, što lubaja duchoŭnaja VIERA — heta viera ŭ kachańnie, u dabro i miłasernaść. Lubaja Carkva pavinna vučyć vieraciarpimaści, bieražlivamu staŭleńniu da histaryčnaj i kulturnaj spadčyny ŭsiakaha naroda.
Idučy ŭ Chram Božy, čałaviek šukaje supakajeńnia, u tym liku praź vizualny śvietapohlad. Vyjavy likaŭ Śviatych pavinny natchniać na stanoŭčyja emacyjnyja pieražyvańni i sadziejničać pravilnamu etyčnamu i maralnamu vychavańniu», — napisali ŭ kanale.
Pry hetym, jak zaŭvažaje hrodna.life, «nieprymalnyja sceny hvałtu i varožaści» jość na mnostvie abrazoŭ. U historyi Carkvy jość pakutniki, u tym liku fakt raskryžavańnia samoha Isusa Chrysta. Tradycyjna jany adlustroŭvajucca na abrazach. Kali prytrymlivacca łohiki ŭładaŭ, prybrać treba nie tolki hetyja dźvie ikony.
Ikony novapakutnikaŭ vyklikali sprečki i raniej
U kancy minułaha tydnia stała viadoma, što sa Śviata-Pakroŭskaha sabora ŭ Hrodnie źnikli dźvie z vaśmi ikon novapakutnikaŭ. Jany źjavilisia ŭ carkvie 17 hadoŭ tamu.
Na ich byli namalavanyja savieckija siłaviki — čyrvonaarmiejcy, aficery i čekisty, jakija zabivali pravasłaŭnych dziejačaŭ. U pryvatnaści, na dvuch źnikłych ikonach byli vyjaŭleny mitrapalit Kijeŭski Uładzimir (zakatavany ŭ 1918 hodzie) i mitrapalit Pietrahradski Vienijamin (rasstralany ŭ 1922 hodzie).
Ikony vyklikali pytańni ŭ siłavikoŭ z momantu źjaŭleńnia ŭ 2006 hodzie. Apošnim časam vykazvacca suprać ich pačała praŭładnaja, prarasiejskaja i antybiełaruskaja aktyvistka Volha Bondarava.
Vynieśli prysud dokšyckamu piarevaratniu ŭ pahonach Zhirskamu1
Kamientary
kakoje połožitielnyje emocii? pridumyvali b štole otmazki mienieje idiotskije. no... vidať, nie dano im