U sacsietkach źjaviłasia novaje videa, jakoje maje na mecie pasvaryć litoŭcaŭ i biełarusaŭ

Na videa troje mužčyn u šerym military z aŭtamatami, jakija havorać na litoŭskaj movie ź vialikim biełaruskim akcentam. Na ich maski i ciomnyja akulary, tvary nie vidać zusim. Jany nazyvajuć siabie «sapraŭdnymi biełaruskimi patryjotami, jakija ŭžo try hady znachodziacca ŭ vyhnańni». Pad videa — subcitry na biełaruskaj movie.

U videa ŭtrymlivajecca šerah chłuślivych śćviardžeńniaŭ. Na videa taksama hučać vypady na adras Litvy i litoŭcaŭ. 

Zhadvajecca i «cisk litoŭskich śpiecyjalnych słužbaŭ na Volhu Karač». Admietna, što niadaŭna litoŭskim deputatam na poštu razasłali pahrozy nibyta ad bataljona «Teror». Tam pa-rusku pisałasia: «Nam stała viadoma, što vy pryniali rašeńnie nie pradastaŭlać palityčnaha prytułku našaj kiraŭnicy i biełaruskaj pravaabaroncy Volzie Karač».

Vajary «Terora» adrazu ž abvierhli svaju datyčnaść da toj rassyłki. Dyj viadoma, što z Karač jany ŭ napružanych stasunkach i kiraŭnicaj dobraachvotnikaŭ taja nikoli nie była.

Ciapierašniaje videa źjaviłasia na akaŭncie sacsietki X (u minułym — Tvitar), jaki źviazany ź litoŭskimi nacyjanalistami (abo mimikruje pad taki). «Naša Niva» pakul nie vyjaviła pieršakrynicy hetaha videa.

«My ŭvohule nie viedajem, chto heta», — adkazali «Našaj Nivie» ŭ pres-słužbie Pałka Kalinoŭskaha.

Źviartaje ŭvahu, što niadaŭna adna z vajskovych čaściej Biełarusi šukała śpiecyjalista ź viedańniem litoŭskaj movy.

***

Na dumku «Našaj Nivy», meta hetaj pravakacyi, jak i raniejšych anałahičnych, stvaryć u litoŭcaŭ niedavier da biełarusaŭ i biełaruskaj emihracyi ŭ Litvie ŭ pryvatnaści. Kali za hetym stajać łukašenkaŭcy, to jany mohuć raźličvać padyhrać tym nacyjanalistyčnym palitykam u Litvie, jakija razyhryvajuć antybiełaruskuju kartu. 

Analizujučy ŭstanoŭki internet-kamientataraŭ, jakija, imavierna, źviazanyja z łukašenkaŭskimi śpiecsłužbami, «Naša Niva» pryjšła da vysnovy, što jany majuć niekalki paśladoŭnych ustanovak. Jany imknucca raździmać antylitoŭskija i antypolskija pačućci siarod emihrantaŭ ź Biełarusi. Paralelna jany sprabujuć spravakavać padazreńni ŭ palakaŭ i, asabliva, litoŭcaŭ adnosna sapraŭdnych namieraŭ biełarusaŭ-emihrantaŭ i padajuć ich jak nachlebnikaŭ u vačach litoŭskaj aŭdytoryi.

U kančatkovym vyniku łukašenkaŭcy, vyhladaje, majuć na mecie spravakavać niedavier litoŭcaŭ da biełaruskaj emihracyi, kab vycisnuć jaje ź Litvy. Dla čaho heta łukašenkaŭcam? Reč u tym, što novaja biełaruskaja dyjaspara ŭ Litvie, Polščy i Ukrainie zastajecca davoli arhanizavanaj i źjadnanaj poviaziami ź ludźmi ŭnutry krainy.

Łukašenkaŭcy bačać svoj intares u tym, kab maksimalnaja kolkaść novych emihrantaŭ pieramiaściłasia ŭ krainy, addalenyja ad Biełarusi, dzie jany buduć raściarušanyja, mieć mienš fizičnych kantaktaŭ z suajčyńnikami ŭnutry krainy i chutčej adyduć ad biełaruskaha paradku dnia. Mienavita z realizacyjaj hetaj stratehičnaj mety možna źviazvać źjaŭleńnie i siońniašniaha videa. 

Kali vy viedajecie na hetuju temu bolš, pišycie redaktaru «Našaj Nivy» ŭ TH ci na [email protected]. Abo lubomu redaktaru ci žurnalistu «Našaj Nivy», jakoha viedajecie asabista.

• 13
• 18
• 25
• 3
• 3
• 86