Fota: pravo.by

Fota: pravo.by

Na hety momant prava na orden Maci, zhodna z farmuloŭkaj zakona, majuć žančyny, jakija naradzili i (abo) vychavali piać i bolš dziaciej — hramadzian Biełarusi. Jaho možna atrymać, kali małodšamu dziciaci bolš za hod. Razam z ordenam naležyć hrašovaja vypłata — piacirazovy biudžet pražytačnaha minimumu (ciapier heta 1822 rubli).

Nie dajuć uznaharody žančynam, jakija drenna vykonvajuć svaje ŭstanoŭlenyja zakonami baćkoŭskija abaviazki, viaduć amaralny ład žyćcia, byli pazbaŭlenyja baćkoŭskich pravoŭ, majuć niepahašanuju sudzimaść, — słovam, niadbajnym maci.

Paśla pryniaćcia papravak prosta być dobraj maci piaciarych dziaciej stanie mała. Jak prapisana ŭ zakonaprajekcie, prava na orden Maci buduć mieć tolki žančyny, jakija:

  • vałodajuć vysokimi maralnymi jakaściami (što heta za jakaści, nie ŭdakładniajecca);
  • adkazna vychoŭvajuć i ŭtrymlivajuć dziaciej, kłapociacca pra ich zdaroŭje, raźvićcio, navučańnie;
  • rychtujuć dziaciej da hramadska karysnaj pracy;
  • pryščaplajuć dzieciam kulturu i pavahu da zakonaŭ, histaryčnych i nacyjanalnych tradycyj Biełarusi.

Takim čynam, kali čynoŭnikam nie spadabajucca maralnyja jakaści žančyny, ordena i adpaviednych bonusaŭ joj nie budzie.

Jość i inšy niuans: imavierna, čynoŭniki buduć źbirać charaktarystyki i na dziaciej. I kali ŭ škole vyrašać, što, skažam, syn-padletak žančyny nie vykazvaje naležnaj pavahi da zakonaŭ i ŭładaŭ, to orden jaho mama naŭrad ci atrymaje.

Akramia taho, ciapier nie dajuć uznaharody žančynam, u jakich jość dźvie i bolš niepahašanyja «administracyjki» — to-bok nie vypłačany štraf abo nie skončyŭsia termin, paśla jakoha ličycca, što asoba nie pryciahvałasia, a heta maksimum hod u vypadku samych hrubych parušeńniaŭ. Heta značyć, abmiežavańnie źjaŭlajecca časovym.

Adnak u zakonaprajekcie prapanujecca hetuju časovaść likvidavać. U vypadku jaho pryniaćcia žančyny, jakija choć by dvojčy pryciahvalisia da administracyjnaj adkaznaści — kali zaŭhodna, chaj navat 20 hadoŭ tamu, — maciarynskaha ordena atrymać nie zmohuć.

Havorka idzie nie pra naohuł usie «administracyjki», a pra parušeńni dźviuch katehoryj:

— suprać hramadskaha paradku i hramadskaj maralnaści — heta chulihanstva, raśpićcio ałkaholu ŭ hramadskim miescy, prastytucyja, zachoŭvańnie parnahrafii, raspaŭsiud ekstremisckaj pradukcyi i hetak dalej;

— suprać paradku kiravańnia — heta niesankcyjanavanaje pikietavańnie, abraza słužbovaj asoby, niepadparadkavańnie milicyi, parušeńnie miažy, parušeńnie praviłaŭ dekłaravańnia dachodaŭ, paradku ramiesnaj i ahraturystyčnaj dziejnaści, praviłaŭ abarotu roznych dakumientaŭ, patrabavańniaŭ pažarnaj biaśpieki, pražyvańnie biez rehistracyi i navat kupańnie ŭ zabaronienych miescach, a taksama mnostva inšych parušeńniaŭ.

Takim čynam, žančyny, jakija choć by dvojčy pryciahvalisia da adkaznaści, naprykład, pavodle artykuła 23.34 (paźniej 24.23) KaAP za ŭdzieł u pratestach, buduć pazbaŭlenyja prava na matčynu ŭznaharodu.

Akramia taho, atrymać orden nie zmohuć žančyny, jakija kali-niebudź byli sudzimyja pa kryminalnym artykule. Pakul što pieraškodaj ličycca tolki niepahašanaja sudzimaść, a voś pahašanaja nie ŭličvajecca.

Z-za ŭzmacnieńnia strohaści praviłaŭ pavialičacca terminy pravierki kandydatur. Chadajnictva ab pradstaŭleńni žančyny da ŭznaharody miascovyja ŭłady padajuć u abłasnyja abo Minski haradski vykankamy, tam praviarajuć abhruntavanaść i nakiroŭvajuć svajo rašeńnie ŭ Administracyju prezidenta. Termin hetaj pravierki majuć namier pavialičyć ź miesiaca da dvuch.

Uznaharody dla Łukašenki

Papraŭkami ŭ dačynieńni da maci zakonaprajekt nie abmiežavaŭsia. Jon taksama praduhledžvaje paradak uznaharodžańnia staršyni Usiebiełaruskaha narodnaha schodu i čałavieka, jaki zajmaje pasadu prezidenta krainy.

Tak, ciapier dziaržaŭnyja ŭznaharody mohuć być uručanyja staršyni UNS i jaho namieśnikam, a taksama členam Sakrataryjata. Prapanovy ab ich uznaharodžańni budzie ŭnosić sam UNS. Razhladać ich i prymać rašeńnie, jak i ŭ vypadku ŭsich astatnich dziaržuznaharod, budzie čałaviek, jaki zajmaje pasadu prezidenta.

U dadatak prava ŭnosić prapanovy ab uručeńni dziaržuznaharod atrymajuć KDB, Słužba biaśpieki prezidenta i Apieratyŭna-analityčny centr. Kiraŭnik KDB zmoža i pravodzić uručeńnie ŭznaharod.

Aŭtary prajekta prapanujuć uklučyć u zakon novy artykuł — «Ab uznaharodžańni prezidenta Biełarusi». Rašeńnie ab prysvajeńni dziaržuznaharod hetamu čynoŭniku budzie prymać znoŭ ža Usiebiełaruski narodny schod.

Jak viadoma, kresła prezidenta Biełarusi ciapier zaniataje Alaksandram Łukašenkam. Pavodle apošnich papravak u Kanstytucyju, jakija jon ža inicyjavaŭ, jon moža stać adnačasova i staršynioj UNS, jaki budzie sfarmiravany viasnoj 2024 hoda.

U takim vypadku paśla pryniaćcia hetaha zakonaprajekta Łukašenka (jaki sam ža jaho i padpiša) zmoža pryznačać uznaharody sam sabie z abodvuch pasadaŭ.

U zakonie pieraličanyja niekalki dziasiatkaŭ miedaloŭ, ordenaŭ i hanarovych zvańniaŭ. Pry žadańni Łukašenka moža vypisać sabie, naprykład, orden Ajčyny, pašany, pracoŭnaj słavy, «za asabistuju mužnaść», Družby narodaŭ, orden Francyska Skaryny, miedal «za pracoŭnyja zasłuhi» i, narešcie, zvańnie Hieroja Biełarusi.

Клас
3
Панылы сорам
13
Ха-ха
16
Ого
0
Сумна
2
Абуральна
10