Hramadstva3737

«Kali vam stała zrazumieła, što Zacharanku źbirajucca zabić?» — «Kali Paŭličenka streliŭ u jaho». Haraŭski daje pakazańni

Były sachraviec Juryj Haraŭski pačaŭ davać pakazańni ŭ sudzie kantona Sankt-Halen u Šviejcaryi. Jon pad pilnaj achovaj palicyi. Haraŭskaha abvinavačvajuć u datyčnaści da źniknieńniaŭ u Biełarusi viadomych palitykaŭ.

Jury Haraŭski ŭ siniaj bajcy pad pilnaj achovaj. Fota: volhaklas / Telegram

Jak piša «Novy čas», Juryja Haraŭskaha pryvieźli ŭ sud pad achovaj šviejcarskich śpiecsłužbaŭ. Jaho achoŭvajuć vielmi pilna, padahnaŭšy bus litaralna da dźviarej suda. Sam Haraŭski byŭ pad kapiušonam, jon chavaŭ tvar. Zdymać u budynku suda niamožna.

«Haraŭski havoryć vielmi cicha, vyhladaje padaŭlenym, u sud jon pryjšoŭ z mylicaj. Na pytańnie sudździ, jak jon siabie adčuvaje, padsudny adkazaŭ, što narmalna», — pieradaje karespandent z suda. 

Haraŭski admoviŭsia adkazvać na niekatoryja pytańni sudździ. Sudździa zapytaŭsia pra SACHR i Dźmitryja Paŭličenku i niekatorych inšych kamandziraŭ čaści.

— Jakim čynam vy paznajomilisia z pałkoŭnikam Śmirnovym? — zapytaŭsia sudździa.

— Ja nie budu adkazvać na hetaje pytańnie.

— Čamu? Vy ž kazali pra heta ŭ časie papiaredniaha śledstva.

— Tak. Ale ja prasiŭ prakurora nie apubličvać hetaj infarmacyi.

Pošukavik vydaje, što pałkoŭnik Śmirnoŭ byŭ kiraŭnikom vajskovaj čaści 5525, a hetaja čaść — 6-ja asobnaja śpiecyjalnaja milicejskaja bryhada ŭnutranych vojskaŭ MUS Respubliki Biełaruś.

Na sudzie Haraŭski raspavioŭ pra vykradańnie i zabojstva Juryja Zacharanki:

— Kali na zahad Paŭličenki my pakłali Zacharanku ŭ bahažnik, ja ŭžo tady chacieŭ źjechać.

— Ci viedali vy, što hety čałaviek — Zacharanka? — pytajecca sudździa.

— Na momant, kali ja słužyŭ, Zacharanka byŭ ministram MUS, viadoma, ja viedaŭ, chto heta taki.

Haraŭski raspavioŭ, što Juryj Zacharanka byŭ zastreleny sa śpiny. Jon dadaŭ, što dumaŭ, što Zacharanku prosta zaviazuć za horad i ź im «budiet provodiťsia biesieda», i nie viedaŭ, kudy jaho viazuć.

Sudździa spytaŭ: 

— Pistalet, jakim byŭ zastreleny Zacharanka, im pravodziacca ŭ Biełarusi rasstreły?

— Tak.

— Adkul vy viedajecie? Vy ŭžo trymali jaho ŭ rukach?

Haraŭski paśla paŭzy:

— Trymaŭ padobny.

— Kali vam stała zrazumieła, što Zacharanku źbirajucca zabić?

— Kali Paŭličenka streliŭ u jaho.

Dalej Haraŭski raspavioŭ:

«Paŭličenka sabraŭ usich ranicaj i skazaŭ, što jedziem zatrymlivać adnaho ci dvuch čałaviek. Zapytaŭsia: usie hatovy? My adkazali: tak.

My padjechali da saŭny, siadzieli ŭ dźviuch mašynach. Paŭličenka mnie i Uładzimiru Bućko skazaŭ prajścisia i pahladzieć, dzie i jak my budziem ažyćciaŭlać zatrymańnie.

Ja i Pankoŭ dastali z mašyny Hančara, pakłali na ziamlu. Pry raźbićci škła ja ŭžo asensoŭvaŭ usiu ciažkaść złačynstva. Ja śpiecyjalna raźbiŭ jamu (Hančaru) nos, kab pajšła kroŭ.

Bućko i Baradač zatrymali Krasoŭskaha. Paśla hetaha ŭ mašynu sieŭ kiroŭca, mašyna była džyp čornaha koleru.

My pajechali ŭ bok Biahomla.

Pa darozie, kali my vyjechali na kalcavuju, my spynilisia na parkoŭcy, Paŭličenka vyjšaŭ z mašyny, praź piać chvilin padyšoŭ i zazirnuŭ u mašynu inšy mužčyna. Jon zahadaŭ: uźnimicie hałovy. I ja pačuŭ adkaz hetaha mužčyny: tak, heta jon.

Paŭličenka sieŭ u mašynu i my pajechali ŭ Biahoml.

U Biahomli Paŭličenka skazaŭ dastać ich z mašyny i pakłaści pobač. Paśla hetaha padyšoŭ Paŭličenka i streliŭ u śpinu abodvum, pa dva streły zrabiŭ.

Paśla chvilin praz 5-10 skazaŭ raspranać ich, i kali ja raspranaŭ Hančara, to ŭbačyŭ, što ŭ jaho na levaj nazie niama vialikaha palca.

Ja zapuściŭ ruku ŭ tuflu i dastaŭ śpiecyjalnuju ściłku. My skłali ŭsie rečy ŭ adnu kuču, pryjšoŭ Bałynin i zabraŭ usie rečy».

Haraŭski śćviardžaje, što cieły Hančara i Krasoŭskaha ŭdzielniki «eskadrona śmierci» paśla zakapali, a rečy spalili, aproč abutku. «Bo jon doŭha haryć», — skazaŭ Paŭličenka.

Haraŭski admaŭlajecca ad papiarednich śviedčańniaŭ, što pistalet byŭ u jaho. Kaža sudździ, što heta vynik «kiepskaha pierakładu».

Paśla Haraŭski zajaviŭ:

— Pierš za ŭsio ja prynošu prabačeńni rodnym. Ja hłyboka škaduju ab svaim saŭdziele ŭ hetym. Spadziajusia, svajaki prymuć maje prabačeńni.

Za śpinaj Haraŭskaha ŭ sudovaj zali siadzić dačka Juryja Zacharanki — Alena. Ale, začytvajučy z papiery hetyja słovy prabačeńnia, Haraŭski praciahvaŭ siadzieć da jaje śpinaj i navat nie paviarnuŭsia.

Taksama Haraŭskaha dapytaŭ prakuror. Toj adrazu pierajšoŭ da supiarečnaściaŭ u raniejšych pakazańniach eks-bajca SACHR i jaho siońniašnich sudovych pakazańniach.

— Vy sami raniej skazali, što dastali z mašyny pistalet i dali Paŭličenku?

— Paŭličenka dastaŭ pistalet z mašyny, i ja heta bačyŭ, — z razdražnieńniem adrezaŭ Haraŭski.

Prakuror nastojvaje na tym, što padsudny raniej try razy kazaŭ ab tym, što sam braŭ pistalet i pieradavaŭ Paŭličenku.

Haraŭski vychodzić z raŭnavahi i vielmi hučna vymaŭlaje: «Byli niapravilna sfarmulavanyja pytańni. Kali łaska, pravilna farmulujcie svaje pytańni».

I praciahvaje nastojvać na tym, što rasstrelny pistalet Paŭličenku nie davaŭ.

Sud praciahvajecca. 

Prakuratura Šviejcaryi abvinavaciła eks-bajca SACHRa ŭ datyčnaści da hvałtoŭnych źniknieńniaŭ. Aceńvać sapraŭdnaść jaho słoŭ buduć sudździa i dva prysiažnyja zasiadacieli. Kali jany pryznajuć Haraŭskaha vinavatym, heta stanie abvinavaŭčym prysudam i dla biełaruskaha režymu, ličać jurysty.

Kamientary37

  • xxx
    19.09.2023
    A jeŝie na očieriedi priznanija po vzryvu v mietro.
  • Order na apyšt
    19.09.2023
    Łukašenka złačyniec numar adzin.
  • Janka
    19.09.2023
    Cikava, što Haraŭski publična pieraličvaje proźviščy i učynki ŭsich svaich byłych kalehaŭ, ale admaŭlajecca publična ahučvać padrabiaznaści pra pałkoŭnika Śmirnova - farmalnaha načalnika Paŭlučenki. Ŭ jakaści abvinavačvanaha Haraŭski maje prava nia śviedčyć, ale praces nie začynieny, i ŭ hetych umovach jon mocna ryzykuje tym, što jamu nie pavierać, i sprava moža skončycca apraŭdańniem praz brakavańnie dokazaŭ i departavańnie jak nastupstva. Paradokc, ale asabista Haraŭski zacikaŭleny ŭ tym, kab jaho pryznali złačyncam.

Siłaviki prosiać u biełarusaŭ za miažoj paviedamić svoj adras ci vysłać damovu arendy. Što viadoma?6

Siłaviki prosiać u biełarusaŭ za miažoj paviedamić svoj adras ci vysłać damovu arendy. Što viadoma?

Usie naviny →
Usie naviny

Jašče adna achviara niepahadzi: u Mahiloŭskim rajonie zahinuła 5-hadovaja dziaŭčynka

Na biełaruska-litoŭskaj miažy upieršyniu za doŭhi čas źjaviłasia čarha z aŭtobusaŭ1

Ryžankoŭ: Biełaruś hatova da dyjałohu z Polščaj pa situacyi na miažy19

U załatoj bucy na Jeŭra-2024 adrazu niekalki ŭładalnikaŭ

Jak adroźnivajucca ŭmovy pracy dla IP u Biełarusi i Litvie? 1

Anioł Śmierci. Historyja biełaruski, jakaja paviedamlaje rodnym zahinułych kalinoŭcaŭ pra ich hibiel2

Arhiencina vyjhrała Kubak Amieryki pa futbole — i heta taksama rekord

Jak adrazu paśla zamachu na Trampa sacsietki zapoŭnili teoryi zmovy i pry čym tut Iłan Mask30

U Breście zakansiervujuć ruiny 400-hadovaha klaštara. Heta adzinaje zbudavańnie, što zastałosia ad histaryčnaha Bieraścia4

bolš čytanych navin
bolš łajkanych navin

Siłaviki prosiać u biełarusaŭ za miažoj paviedamić svoj adras ci vysłać damovu arendy. Što viadoma?6

Siłaviki prosiać u biełarusaŭ za miažoj paviedamić svoj adras ci vysłać damovu arendy. Što viadoma?

Hałoŭnaje
Usie naviny →