KDB aryštavaŭ šeść čałaviek pa abvinavačańni ŭ pracy na Ukrainu i sprobach padryvu ciahnikoŭ z vajskovaj technikaj
Kamitet dziaržbiaśpieki abvinavaciŭ u pracy na SBU piaciarych žycharoŭ Biełarusi, a taksama zatrymaŭ ukrainca, jaki, jak śćviardžajecca, stvaraŭ tajniki sa zbrojaj u prymiežnych rajonach. Filmy pra heta pakazali siońnia adrazu na ŭsich dziaržaŭnych kanałach. Zatrymanyja — sa śladami źbićcia.
Kamitet dziaržaŭnaj biaśpieki vystupiŭ z surjoznymi abvinavačańniami ŭ adras šeraha hramadzian Biełarusi. Na videa niekatoryja ź ich vyhladajuć źbitymi, majuć siniaki navat na tvary. KDB źvinavaciŭ ukrainskija śpiecsłužby ŭ stvareńni ŭ Biełarusi sietki, jakaja sočyć za rasijskimi i biełaruskimi vajskovymi abjektami i zdolnaja arhanizoŭvać dyviersii.
Najpierš nahadajem, što da ŭsiaho, što hučyć u dziaržaŭnych miedyja i z vusnaŭ supracoŭnikaŭ śpiecsłužbaŭ, treba stavicca krytyčna: jany rehularna raspaŭsiudžvajuć zaviedama niepraŭdzivuju infarmacyju i falsifikujuć fakty abo źmiešvajuć praŭdu ź jeraśsiu.
My sabrali ŭsie fakty, jakija prahučali ŭ dziaržaŭnych miedyja. Voś šaściora zatrymanych.
Viačasłaŭ Barodzij
Śćviardžajecca, što heta ŭkrainski jehier, zatrymany ŭ Jelskim rajonie Biełarusi, jaki miažuje z Žytomirskaj vobłaściu Ukrainy.
Śćviardžajecca, što paśla pačatku vajny Barodzij prajšoŭ padrychtoŭku ŭ navučalnym centry Hałoŭnaha ŭpraŭleńnia raźviedki Minabarony Ukrainy.
«Barodzij vałodaŭ navykami minna-vybuchovaj spravy, umieŭ abychodzicca sa strałkovaj zbrojaj i bieśpiłotnymi latalnymi aparatami. Adnym słovam, staŭ niebiaśpiečnym i navučanym bajevikom», — paviedamlaje ahienctva BiełTA.
Śćviardžajecca, što ŭ Barodzija byŭ psieŭdanim Manhust i što «z sakavika hetaha hoda, akramia HUR Minabarony, jon staŭ supracoŭničać jašče i sa Słužbaj biaśpieki Ukrainy».
Łukašysty śćviardžajuć, što «mienavita SBU daručyła Manhustu pierakidvać u Biełaruś zbroju i vybuchoŭku dla arhanizacyi teraktaŭ nie tolki ŭ našaj krainie, ale i ŭ Rasii», adnak dokazaŭ hetaha nie vidać.
«Pry zatrymańni jon zajaviŭ, što pryjšoŭ u našu krainu «zabrać chłopca i viarnucca nazad, — paviedamlajecca ŭ filmie. — Pra składy sa zbrojaj Barodzij nibyta ničoha nie viedaŭ i naohuł pierasiek miažu z našaj krainaj upieršyniu. Navošta ŭ jaho pry sabie byŭ pistalet SIG Sauer z hłušycielem i dźviuma abojmami, Barodzij patłumačyć nie zmoh, — paviedamlajuć dziaržSMI
i sami tłumačać: — Zrešty, heta zrazumieła i tak. Pry sutyknieńni z našymi pamiežnikami ŭ Manhusta była b mahčymaść adstrelvacca».
Paviedamlajecca taksama, što «ŭ siabie doma Manhust trymaŭ ceły skład zbroi. Tam byli i PZRK, i hranatamioty, i vybuchoŭka. Na vypadak zaniaćcia Žytomirskaj vobłaści rasijskaj armijaj Barodzij pavinien byŭ arhanizavać tak zvany partyzanski ruch».
U častcy pra Barodzija źviartaje ŭvahu jaho charaktarystyka jak «bajevika» i vyraz «tak zvany partyzanski ruch».
Paviedamlajecca, što «1 vieraśnia jaho zatrymali supracoŭniki KDB i źmiaścili ŭ śledčy izalatar».
Ivan Lichałat, Ivan Barodzič i Barys Puchalski
Hetych troch abvinavačvanych u filmie abjadnali ŭ adnu hrupu. Ivan Barodzič i Barys Puchalski — hrodziency, a Ivan Lichałat — hramadzianin Ukrainy, jaki ŭ 2013-m pierabraŭsia ŭ Biełaruś.
«Dziesiać hadoŭ žyŭ i pracavaŭ u našaj krainie, ažaniŭsia ź biełaruskaj, hadavaŭ traich niepaŭnaletnich dziaciej, — raskazvajuć pra Lichałata ŭ filmie. — Zdavałasia b, što moža pajści nie tak? Pakul u jaho rodnaj krainie iduć bajavyja dziejańni, a jaho suajčyńniki hinuć u miasasiečcy vajny, jon žyvie ŭ mirnaj i spakojnaj krainie, pracuje i haduje dziaciej. Składana zrazumieć, što ruchaje padobnymi asobami, ale ŭžo ŭ studzieni hetaha hoda Lichałat vyjšaŭ na suviaź z SBU», — śćviardžaje prapahanda.
Pra Puchalskaha i Barodziča havorycca, što «abodva vałodali prafiesijnymi navykami minna-vybuchovaj spravy. Dla ŭkrainskich śpiecsłužbaŭ heta biascennyja kadry, tamu ich aktyŭna ŭziali ŭ pracu», — zajaŭlajuć biełaruskija śpiecsłužby.
Śćviardžajecca, što «raniej Puchalski vychodziŭ na suviaź z SBU, kab pavajavać na baku Ukrainy, ale atrymaŭ admovu». Jamu nibyta rastłumačyli, što jaho navyki spatrebiacca ŭ Biełarusi.
Śćviardžajecca, što pieršapačatkova troje vykonvali zadačy pa zbory infarmacyi. «Źbirali źviestki ab pieramiaščeńni vajskovaj techniki, najaŭnaści rasijskich vojskaŭ na terytoryi biełaruskich čaściej, raźmiaščeńni ZRK [zienitna-rakietnych kompleksaŭ]».
Paśla ž Lichałat vyjšaŭ na suviaź z SBU i atrymaŭ zadaču ŭzarvać čyhunku, pa jakoj, jak piša BiełTA, «byccam musiła prajści vajskovaja technika».
Śćviardžajecca, što ŭ pamiežnym z Ukrainaj Kobrynskim rajonie Bresckaj vobłaści Puchalski «zabraŭ z tajnika vybuchovaje prystasavańnie, jakoje pieravioz u Tałačynski rajon dla padryvu čyhunki.
Tam jon i byŭ zatrymany supracoŭnikami hrupy «A» KDB». Heta zdaryłasia 4 vieraśnia.
Sapraŭdy, niezaležny kanał biełaruskich čyhunačnikaŭ paviedamlaŭ pra spynieńnie ruchu ciahnikoŭ pad Tałačynom 4 vieraśnia, tam hučali stralba ci vybuchi.
Z vyšejskazanaha vynikaje, što za Puchalskim i jaho siabrami doŭhi čas sačyli.
«Na miescy płanavanaha terakta kanfiskavali vybuchovaje rečyva hieksahien masaj 1 kh, draty, detanatar i mahnit dla macavańnia vybuchoŭki da rejek. Adnačasova ŭ Hrodnie byli zatrymanyja pamočniki Puchalskaha — Lichałat i Barodzič», — zajaŭlajuć aficyjnyja miedyja.
Suprać hetaj hrupy zatrymanych raspačata sprava pa troch abvinavačańniach: u padrychtoŭcy akta teraryzmu (č. 1 art. 14 i č. 3 art. 289 KK), zdradzie dziaržavie (č. 1 art. 356 KK) i špijanažy (art. 358-1 KK). Za padrychtoŭku akta teraryzmu ŭ Biełarusi ciapier praduhledžvajecca navat śmiarotnaje pakarańnie.
Pavieł Vabiščevič i Andrej Zinienka
Jašče dvaich biełarusaŭ zatrymali, jak śćviardžajecca, 17 dzion nazad, u noč z 26 na 27 žniŭnia, na čyhuncy ŭ Staŭbcoŭskim rajonie niedaloka ad naftabazy i prypynačnaha punkta Siniava (vymaŭlajecca z naciskam na druhi skład). Imiony zatrymanych — Pavieł Vabiščevič i Andrej Zinienka.
Śćviardžajecca, što jany sprabavali pastavić na čyhuncy vybuchovuju pryładu, jakaja musiła b spracavać pa kamandzie kuratara z SBU.
U filmie havorycca, što Vabiščevič trapiŭ pad uvahu siłavikoŭ, kali danosčyk paviedamiŭ pra jaho ŭ čat-bot KDB, što 10 červienia na vakzale ŭ Oršy jon fatahrafavaŭ čyhunačnyja puci i sastavy. U takim vypadku za im dva miesiacy staranna cikavali.
19 žniŭnia, jak śćviardžajecca ŭ filmie, Vabiščevič pryjechaŭ u Łojeŭski rajon Homielskaj vobłaści, niedaloka ad ukrainskaj miažy, dzie zabraŭ u tajniku vybuchovuju pryładu (2,4 kiłahrama traciłu i paražalny elemient) i pieravioz jaje ŭ tajnik u Červieńskim rajonie.
A 26 žniŭnia Vabiščevič nibyta zabraŭ inšuju vybuchovuju pryładu (1,2 kiłahrama traciłu) u Chojnickim rajonie — heta taksama kala miažy z Ukrainaj — i pajechaŭ ustanaŭlivać jaje na čyhunku pad Stoŭbcami. Vaziŭ jaho na mašynie, jak śćviardžajecca ŭ filmach, jaho były kaleha Andrej Zinienka. Zinienka na kadrach vyhladaje źbitym najmacniej.
Pra Paŭła Vabiščeviča havorycca, što jon minčuk, naradziŭsia ŭ 1986 hodzie. Śćviardžajecca, što jon ustanaviŭ suviaź z SBU «praz tematyčnuju hrupu ŭ miesiendžary». Spačatku jon nibyta mieŭ zadaču fatahrafavać stratehičnyja abjekty, paźniej uziaŭsia padarvać čyhunku.
40-hadovy Andrej Zinienka — były kaleha Vabiščeviča, jaki «pracavaŭ na kiroŭnaj pasadzie i atrymlivaŭ vysoki zarobak», padkreślivajuć dziaržaŭnyja miedyja. Taki akcent na «vysokim zarobku» niaredki ŭ łukašenkaŭskaj prapahandy. U toj ža čas Vabiščeviča malujuć sudzimym amataram azartnych hulniaŭ.
Zatrymanyja znachodziacca ŭ SIZA KDB. Suprać ich zaviedzieny kryminalnyja spravy pa č. 2 art. 289 KK «Zamach na ździajśnieńnie akta teraryzmu hrupaj asob» i č. 1 art. 356 KK «Zdrada dziaržavie».
«Sproby destabilizacyi hramadskaha paradku»
Na asnovie ahučanaha ŭ dziaržaŭnych miedyja pakul ciažka zrabić adnaznačnyja vyvady adnosna suviazi sa śpiecsłužbami Ukrainy. Ciažka i skazać, ci zatrymanyja sapraŭdy dapamahali ŭkraincam u baraćbie suprać rasijskaj ahresii, ci jany ŭsiaho tolki stali achviarami apieratyŭnaj hulni łukašenkaŭskich śpiecsłužbaŭ, aryjentavanaj na raspracoŭku asob, achvotnych Ukrainie spryjać, ci rasijskaj insceniroŭki. U filmach havorycca, što zatrymanyja kantaktavali z ananimnymi asobami ŭ miesiendžarach.
Pramoj suviazi pamiž traimi zatrymanymi hrodziencami (Lichałatam, Puchalskim i Barodzičam), dvuma minčukami (Vabiščevičam i Zinienkam), a taksama ŭkrainskim jehieram, jakoha abvinavačvajuć u niezakonnym pierasiačeńni biełaruskaj miažy, u filmie nie prasočvajecca.
Dziaržaŭnyja miedyja pišuć, «što charakterna, usie zatrymanyja … prytrymlivajucca destruktyŭnych pohladaŭ i źjaŭlajucca praciŭnikami biełaruskaj dziaržavy». Hetyja jarłyki — «destruktyŭnych pohladaŭ» i «praciŭniki biełaruskaj dziaržavy» — užyvajucca orhanami adnosna ludziej, jakija vystupajuć suprać dyktatury Alaksandra Łukašenki, suprać kantrolu Rasii nad Biełaruśsiu i suprać vajny.
«U svaich sacyjalnych sietkach jany niaredka raźmiaščajuć niedziaržaŭnuju albo adkryta ekstremisckuju simvoliku», — dadaje BiełTA. Pad ekstremisckaj simvolikaj zvyčajna majecca na ŭvazie biełaruskaja nacyjanalnaja abo simvały apazicyi ci ruchu za svabodnyja vybary.
«Akramia vidavočnych met, jakija vyjaŭlajucca ŭ sprobach destabilizacyi hramadskaha paradku ŭ našaj krainie i zastrašvańnia našych hramadzian, ukrainskija śpiecsłužby pieraśledujuć druharadnuju metu. U pryvatnaści, havorka idzie pra sprobu stvareńnia bačnaści najaŭnaści ŭ našaj krainie niejkaha arhanizavanaha padpolla. Inšymi słovami, dobra padrychtavanych ahientaŭ-terarystaŭ, zdolnych vieści tut partyzanskuju vajnu. Ale heta nie tak», — tak interpretuje situacyju namieśnik načalnika śledčaha ŭpraŭleńnia KDB Kanstancin Byčak.
Kali vy viedajecie pra toje, što zdaryłasia, bolš, pišycie redaktaru «Našaj Nivy» ŭ TH ci na [email protected].
Albo pišycie asabista tym žurnalistam i redaktaram «Našaj Nivy», jakich vy viedajecie i jakim daviarajecie (lepš — u sihnał ci telehram).
Nahadajem, što masavyja palityčnyja represii ŭ Biełarusi praciahvajucca z 2020 hoda, kali Alaksandr Łukašenka, miarkujučy pa źviestkach z učastkaŭ, dzie vybarčyja kamisii dazvolili naziralnikam sačyć za padlikam hałasoŭ, prajhraŭ Śviatłanie Cichanoŭskaj, ale nie addaŭ uładu. U represii ŭciahnutyja jak Ministerstva ŭnutranych spraŭ, tak i Kamitet dziaržaŭnaj biaśpieki, Hienieralnaja prakuratura i Śledčy kamitet.
Z 2022 hoda, paśla napadu Rasii na Ukrainu, biełarusaŭ pačali pieraśledavać i za antyvajennyja vykazvańni abo simpatyi da Ukrainy.
Za hety čas u krainie adbyłosia nie mienš za 50 tysiač palityčna matyvavanych zatrymańniaŭ, zaviedziena nie mienš za 12 tysiač palityčna-kryminalnych spraŭ i adkinutyja navat bazavyja normy zakonnaści i marali.
«Naša Niva» — bastyjon biełaruščyny
PADTRYMAĆAzaronak — palakam: Vy ž niemcaŭ nie lubicie — dyk nie kličcie «Vahniera» na svaju hałavu
Kamientary