«Tak, heta vialikaja pamyłka, ale vyśviatlać, chto vinavaty, a chto nie, — vielmi niebiaśpiečna». Najbahaciejšy rasijanin, jaki rodam ź Biełarusi, pasprabavaŭ apraŭdacca za vajnu
Vydańnie The Financial Times pahutaryła z Andrejem Mielničenkam — najbahaciejšym rasijaninam, jaki naradziŭsia ŭ Homieli. Biznesmien padzialiŭsia dumkami pra vajnu, sankcyi, bunt Pryhožyna i pra šmat što inšaje, ale pry hetym vykručvaŭsia, kamientujučy złačynstvy Kramla.
«Kali vy pryčyniajecie škodu miljonam ludziej, jakija nie majuć nijakaha dačynieńnia da kanfliktu, to vy — vajenny złačyniec», — zajaviŭ Mielničenka, ale pry hetym kazaŭ nie pra vajennuju ahresiju Rasii suprać Ukrainy, a pra ŭviadzieńnie Zachadam antyrasijskich ekanamičnych sankcyj.
Mienavita takoje bačańnie śvietu prademanstravaŭ vydańniu The Financial Times najbahaciejšy rasijanin (pa viersii časopisa Forbes) i pa sumiaščalnictvie ŭradženiec Biełarusi Andrej Mielničenka.
Na dumku biznesmiena, jaki paraŭnaŭ ekanamičnyja sankcyi Zachadu suprać Rasii z «jadziernaj bambardziroŭkaj Chirasimy», vajna va Ukrainie jašče dalokaja ad zaviaršeńnia, a pošuk tych, chto vinavaty ŭ jaje pačatku, a chto nie, nie pryniasie ničoha dobraha.
Adnak paśla hetych słoŭ Mielničenka adrazu znajšoŭ vinavatych.
«Sprabavać vyśviatlać, chto vinavaty, a chto nie, — vielmi niebiaśpiečna. Ale žyćcio našmat składaniejšaje. Uładzimir Zialenski niasie adkaznaść za vajnu, tamu što jaho pieradvybarnym abiacańniem było praduchileńnie hetaj vajny, ale svaim mocnym nieprafiesijanalizmam jon spravakavaŭ macniejšaha i ahresiŭnaha susieda na kanflikt», — ličyć rasijski miljarder.
Akramia Zialenskaha, na dumku biznesmiena, taksama vinavatyja i prapahandysty, i žurnalisty, i ŭsie tyja, chto z abodvuch bakoŭ kanfliktu padzialaje, a nie abjadnoŭvaje ludziej. Sam Mielničenka, pavodle jaho słoŭ, nijakich pačućciaŭ viny i adkaznaści za dziejańni Rasii nie adčuvaje.
Pry hetym jon pryznaŭ, što Rasija ździajśniaje vajennyja złačynstvy (pieršy raz miljarder śćviardžalna adkazaŭ na pytańnie, ci źjaŭlajecca ŭsio toje, što robić Rasija va Ukrainie, złačynstvam. Ale zatym jon patelefanavaŭ žurnalistam The Financial Times, kab udakładnić, što ličyć złačynstvami tolki niekatoryja dziejańni Rasii).
«Na moj pohlad, tolki kankretnyja napady na hramadzianskija celi z boku Rasii možna nazvać złačynstvam. Ale mianie nie było tam. Naohuł vajennyja złačynstvy jość z abodvuch bakoŭ, heta naturalna, bo heta vajna. Pryčym usio adno, chto jaje pačaŭ», — adznačyŭ Mielničenka.
Taksama miljarder padzialiŭsia nastrojem rasijskaj elity z-za buntu Pryhožyna i PVK «Vahnier», jaki adbyŭsia jašče ŭ červieni. Pavodle jaho słoŭ, mnohija tady surjozna aścierahalisia prychodu «smutnaha času» i hramadzianskaj vajny.
Hetaja tema našturchnuła Mielničenku parazvažać ab budučym lidary Rasii.
«Jak budzie vyhladać kiraŭnik majoj krainy praź piać hadoŭ: heta budzie toj, chto abaraniŭ krainu ad parazita, jaki doŭha ros na jaje ciele, ci heta budzie niaŭdačnik, jaki z-za svajoj izalavanaści pačaŭ prymać manijakalnyja rašeńni? Heta vyrašać pieramožcu. U lubym vypadku chaos da taho momantu tolki ŭzmacnicca», — razvažaje Mielničenka.
Nahadajem, što Andrej Mielničenka naradziŭsia 8 sakavika 1972 hoda ŭ Homieli. Vučycca jon zjechaŭ u Maskvu, a potym zastaŭsia žyć u Rasii. Syn savieckaha fizika, Mielničenka kinuŭ navučańnie, kali ŭ 1991 hodzie raspaŭsia SSSR, kab zasnavać sietku punktaŭ abmienu valuty. Praz dva hady jon zasnavaŭ svoj bank. Kampanii Mielničenki, u jakich pracuje bolš za 100 tysiač čałaviek, za apošnija 15 hadoŭ inviestavali kala 23 miljardaŭ dalaraŭ u vytvorčaść uhnajeńniaŭ i vuhalu.
Mielničenka trapiŭ pad sankcyi ES i Vialikabrytanii ŭ sakaviku 2022 hoda i ZŠA ŭ žniŭni 2022 hoda. Jon nazvaŭ sankcyi «absurdnymi i biessensoŭnymi» i dahetul asprečvaje ich.
U sakaviku minułaha hoda biznesmien nazvaŭ vajnu va Ukrainie trahiedyjaj i zaklikaŭ spynić jaje.
«Budučy ruskim pa nacyjanalnaści, biełarusam pa naradžeńni i ŭkraincam pa kryvi, ja adčuvaju vialiki bol i zamiašańnie, kali baču, jak zmahajucca i hinuć brackija narody», — skazaŭ tady miljarder.
«Ja ŭ žachu ad taho, što kožny dzień u damy ŭkraincaŭ laciać bomby». Zasnavalnik «Jandeksa» Arkadź Vołaž adkryta vystupiŭ suprać vajny va Ukrainie
Jašče adzin miljarder admoviŭsia ad rasijskaha hramadzianstva. Jon taki ŭžo šosty i byŭ ciesna źviazany z Łukašenkam
Vialikabrytanija źniała sankcyi z rasijskaha biznesmiena Aleha Cińkova
Kamientary
I kali b hety baryha "tam byŭ" (na vakzale Kramatorska, naprykład), to jaho b užo nie było tut, bo zdaryłasia b "pamyłka", a nie vajennaje złačynstva.