Hramadstva11

Jakija pryvatnyja škoły ciapier pracujuć i kolki tam kaštuje navučańnie

Paśla čystki ŭ minułym hodzie ŭ Biełarusi zastałosia tolki piać pryvatnych škoł: try ŭ Minsku i dźvie ŭ Minskim rajonie. Heta Minskaja mižnarodnaja himnazija, «Alternatyva», «Ichvis», «Jelisiejevy pali» i «Eka-Eł». Što prapanujuć hetyja pryvatnyja ŭstanovy adukacyi i kolki kaštuje adpravić tudy dzicia?

Minskaja mižnarodnaja himnazija 

Fota: sajt škoły

Minskaja mižnarodnaja himnazija była zasnavanaja Irynaj Abielskaj. I kali raniej MMH abjaŭlała dadatkovy nabor dziaciej praź niedachop, to ciapier, vidavočna, takoj prablemy niama: na sajcie ŭstanovy adukacyi napisana, što na 2023-2024 navučalny hod pryjom zajavak skončany.

Siarod plusoŭ himnazii paznačana spałučeńnie dziaržaŭnaj vučebnaj prahramy i novych padychodaŭ u navučańni, a taksama vysokatechnałahičnaja abstalavanaść adukacyjnaha pracesu.

Svajoj misijaj MMH nazyvaje «zabieśpiačeńnie vysokaj jakaści adukacyi na asnovie zachavańnia jaje fundamientalnaści praz vychavańnie dapytlivaj, erudziravanaj i nieabyjakavaj moładzi». Taksama paznačana, što vypuskniki himnazii adroźnivajucca «raźvitym pačućciom adkaznaści za svoj los i los krainy».

Zdajecca, ideałohii tut sapraŭdy nadajuć vialiki sens. Bo navat uračystaje paśviačeńnie ŭ himnazisty prachodzić u tak zvany Dzień narodnaha adzinstva. A ŭ hości da dziaciej prychodziać čynoŭniki i ideałahična nadziejnyja spartsmieny, naprykład, alimpijski pryzior Maksim Niedasiekaŭ.

Košt navučańnia ŭ himnazii na 2023-2024 navučalny hod składaje 1100 rubloŭ za miesiac. Isnuje taksama štohadovy ŭznos, jaki pavinny apłacić baćki — 10 bazavych vieličyń (ciapier heta 370 rubloŭ).

Siaredniaja škoła «Alternatyva» 

Fota: sajt škoły

Pryvatnaja škoła «Alternatyva» pracuje 28 hadoŭ. Kali kazać pra siaredniuju škołu, to, akramia bazavych adukacyjnych prahram, «Alternatyva» moža pachvalicca pahłyblenym vyvučeńniem anhlijskaj movy (5 razoŭ na tydzień), vyvučeńniem niamieckaj, francuzskaj moŭ jak druhoj zamiežnaj (z 5 kłasa — 2 razy na tydzień). Prapanuje i pahłyblenaje vyvučeńnie luboha pradmieta na vybar vučnia (z 8-ha kłasa).

Heta škoła — siamiejnaja sprava. U 2003-m jaje vykupiŭ u zasnavalnikaŭ syn ciapierašniaj dyrektarki škoły.

Adzin miesiac navučańnia tut kaštuje 1500 rubloŭ. U hetu sumu ŭklučana asnoŭnaje navučańnie, charčavańnie i asnoŭnyja hurtki — tvorčaść, chareahrafija i anhlijskaja mova. Paznačana, što isnuje sistema źnižak dla dziaciej z adnoj siamji i vydatnikaŭ.

Siaredniaja škoła «Ichvis» 

Fota: sajt škoły

Siarod astatnich pryvatnych škoł «Ichvis» vyłučajecca tym, što maje dačynieńnie da relihijnaj ustanovy, a mienavita da Śviata-Jelisaviecinskaha manastyra.

«Ichvis» hanarycca tym, što vučni škoły nie tolki zasvojvać vučebnuju prahramu, zaćvierdžanuju Ministerstvam adukacyi, ale i ź pieršaha kłasa vyvučajuć anhlijskuju movu ŭ hrupach pa 7-8 čałaviek. Kaniešnie, jość fakultatyŭ «Asnovy pravasłaŭnaj kultury».

Na sajcie adznačana, što pa žadańni baćkoŭ z navučencami pravodziać hutarki śviatary. U majsterniach manastyra arhanizoŭvajucca majstar-kłasy, dzieci biaruć aktyŭny ŭdzieł u śviatočnych mierapryjemstvach. U škole časta pravodziać roznyja dabračynnyja akcyi, raznastajnyja ekskursii i pajezdki pa śviatych i histaryčnych miaścinach.

Śćviardžajecca, što ŭ škoły jość śviataja zastupnica — prapadobnaja Jeŭfrasińnia Połackaja, u malitvach da jakoj źviartajucca i dzieci, i darosłyja, i jana dapamahaje škole raści i raźvivacca.

Hod tamu adzin miesiac navučańnia tut kaštavaŭ 900 rubloŭ. U hetuju sumu, aproč navučańnia, uvachodziła trochrazovaje charčavańnie i hurtki.

Pačatkovaja škoła «Jelisiejevy pali»  

Fota: instahram škoły

«Jelisiejevy pali» — pryvatnaja pačatkovaja škoła (i dziciačy sad) u Sienicy. Heta značyć, što dzicia moža tut vučycca tolki pieršyja čatyry kłasy, a potym treba budzie šukać novaje miesca.

Košt naviedvańnia za miesiac z 8:30 da 19:00 składaje 1200 rubloŭ.

 U hetuju sumu ŭklučany:

— vyvučeńnie prahramy I stupieni navučańnia na pavyšanym uzroŭni;

— padrychtoŭka damašnich zadańniaŭ u škole pad kiraŭnictvam nastaŭnika;

— anhlijskaja mova 5 razoŭ na tydzień;

— zaniatki IT, STEAM;

— indyvidualnyja i hrupavyja zaniatki z łahapiedam, psichołaham;

— uschodnija adzinaborstvy;

— azdaraŭlenčaja himnastyka;

— šachmaty;

— muzyčna-teatralnaja dziejnaść;

— chareahrafija;

— tvorčyja majstar-kłasy;

— piacirazovaje charčavańnie.

Na hety navučalny hod volnych miescaŭ u kłasach užo niama.

Zasnavalnica ŭstanovy Alena Miaškova skončyła Piedahahičny ŭniviersitet u Minsku, pracavała vykładčycaj muzyki, paśla arhanizataram mierapryjemstvaŭ. A adkryć svoj navučalny prajekt vyrašyła paśla naradžeńnia druhoha dziciaci.

Siaredniaja škoła «Eka-Eł»  

Fota: instahram škoły

Siaredniaja škoła «Eka-Eł» znachodzicca ŭ Ždanovičach. Jana była zasnavanaja ŭ 1994 hodzie. Nazva navučalnaj ustanovy rasšyfroŭvajecca jak «Ekołohija Ličnosti».

Jaje zasnavalnica Tamara Arciemjeva doŭhi čas była i dyrektarkaj hetaj ustanovy.

Na sajcie škoły šmat napisana pra ahulnačałaviečyja kaštoŭnaści, samaraźvićcio asoby školnikaŭ i talerantnaść, ale ideałahičny składnik tut taksama nie na apošnim miescy. Naprykład, viasnoj hetaha hoda hazieta «Prystaličča» pisała pra toje, jak u Minskim rajonie vybirali najlepšuju ściahavuju hrupu. Siarod udzielnikaŭ byli i vučni pryvatnaj škoły «Eka-Eł». Padkreślivałasia, jaki prafiesijanał tam adkazvaje za vajskova-patryjatyčnuju padrychtoŭku — pałkoŭnik zapasu Aleh Pieraviortaŭ, vypusknik Novasibirskaha vyšejšaha vajskova-palityčnaha vučylišča, udzielnik bajavych dziejańniaŭ u Afhanistanie na pasadzie namieśnika kamandzira raźviedvalnaj roty, kavaler ordena «Čyrvonaj Zorki».

Adzin miesiac navučańnia ŭ «Eka-Eł» kaštuje 609 jeŭra — apłačvać treba ŭ rublach pa kursie. Ale na hety hod u škole volnych miescaŭ užo niama.

***

Nahadajem, baraćba z pryvatnymi škołami adbyłasia ŭ vieraśni 2022 hoda. Tady z 35 pryvatnych navučalnych ustanoŭ bolšaść nie zmahła svoječasova atrymać siertyfikaty hatoŭnaści. 15 vieraśnia zdaryŭsia incydent u pryvatnaj staličnaj škole «Smart skuł»: chłopčyk z cacačnaha pistaleta streliŭ u voka dziaŭčyncy. Jana była ŭ akularach, škło raźbiłasia i paškodziła voka, miedykam pryjšłosia chutka rabić apieracyju. Paśla hetaha Łukašenka zapatrabavaŭ «začyścić usio da niemahčymaści»: «Pačali raźbiracca, a tam kiraŭnictva škoły, heta pavodle pieršaj infarmacyi, jany ž na duch nie ŭsprymajuć biełaruskuju dziaržavu. Heta što, tam muć niejkaja, niejkaja kłaaka ŭtvaryłasia antydziaržaŭnaja?» U vyniku byli začynieny dziasiatki pryvatnych škoł. 

U kastryčniku byŭ padpisany ŭkaz «Ab licenzavańni», zhodna ź jakim pryvatnym škołam stała nieabchodna atrymlivać licenziju.

Letam hetaha hoda Alaksandr Bachanovič, pieršy namieśnik ministra adukacyi Biełarusi, zajaviŭ, što ciapier u piaci pryvatnych ustanovach adukacyi navučajecca ahułam kala tysiačy čałaviek. Dla paraŭnańnia: dziaržaŭnych ustanoŭ adukacyi — 2900, tam navučajecca 1,08 miljona dziaciej. «Układ pryvatnych škoł — heta 0,1 pracenta ŭ sistemie ahulnaj i siaredniaj adukacyi», — padsumavaŭ pieršy namieśnik ministra.

Kamientary1

  • daviedka
    24.08.2023
    Chorošo by zvučało, jeśli nazvať Minskaja mieždunarodnaja himnazija imieni hraždanina mira Jevhienija Prihožina.

Zamach na Donalda Trampa: u jaho stralali ŭ čas vystupu ŭ Piensilvanii38

Zamach na Donalda Trampa: u jaho stralali ŭ čas vystupu ŭ Piensilvanii

Usie naviny →
Usie naviny

Što pryhatavać ź lisičkami: frykadelki, hulaš, kašu

Papularny polski treveł-błohier raskazaŭ pra svaju pajezdku ŭ Biełaruś i daŭ parady20

U minskaj kramie znajšli pradukt, jaki kaštuje 12 tysiač rubloŭ za kiłahram. Jon zapakavany ŭ boks suprać kradziažu

Bujnyja donary-demakraty źbirajucca zamarozić 90 miljonaŭ dalaraŭ unioskaŭ na kampaniju Bajdena1

«Pačuj mianie. Ty — mudak». Prapahandyst Kazakoŭ u žyvym efiry daŭ majstar-kłas zavočnaj palemiki16

U Salihorskim rajonie znajšli vusienia vielmi redkaha matylka. Čamu my tak redka jaho bačym?3

Što adbyvajecca na miažy z Polščaj pierad vychodnymi

«Zamoŭ vielmi šmat». Polski restaran arhanizavaŭ dastaŭku picy prosta ŭ čarhu na miažy ź Biełaruśsiu1

Połk Kalinoŭskaha abvierh paviedamleńnie Minabarony Biełarusi ab hibieli Jana Rudzika3

bolš čytanych navin
bolš łajkanych navin

Zamach na Donalda Trampa: u jaho stralali ŭ čas vystupu ŭ Piensilvanii38

Zamach na Donalda Trampa: u jaho stralali ŭ čas vystupu ŭ Piensilvanii

Hałoŭnaje
Usie naviny →