Hladzicie i płačcie. Kolki mahli b kaštavać aŭtamabili, kali b Biełaruś nie ŭstupiła ŭ Mytny sajuz
Pahladzieli, na jakich mašynach i pa jakich cenach mahli b jeździć biełarusy, kali b nie vysokaje myta.
Jakija pošliny byli raniej?
Da 1 lipienia 2011 hoda ŭ Biełarusi dziejničali svaje mytnyja taryfy na impart aŭtamabilej. Jany byli sapraŭdy nizkija ŭ paraŭnańni z tymi, što dziejničali ŭ Rasii abo va Ukrainie. Tamu aŭtamabili ŭ nas kaštavali našmat tańniej, čym u hetych susiednich krainach.
U tyja časy samymi vyhadnymi dla pryhonu byli aŭto va ŭzroście ad 3 da 10 hadoŭ. Naturalna, što samymi papularnymi stali aŭto, jakim było ad 8 da 10 hadoŭ z momantu vypusku. Pry hetym staryja taryfy dazvalali pryvozić i bolš uzrostavyja aŭtamabili. Hałoŭnaje, kab jany nie byli starejšyja za 14 hadoŭ.
Mytnyja staŭki dla aŭto va ŭzroście ad 3 da 10 hadoŭ u zaležnaści ad abjomu ruchavika vyhladali nastupnym čynam:
— da 1500 sm³ — 0,35 jeŭra za «kubik»;
— ad 1500 sm³ da 2500 sm³ — 0,4 jeŭra za «kubik»;
— zvyš 2500 sm³ — 0,6 jeŭra za «kubik».
Aŭtamabili va ŭzroście ad 10 da 14 hadoŭ razmytnioŭvalisia pa staŭcy 0,75 jeŭra niezaležna ad abjomu ruchavika.
Impart aŭto, starejšych za 14 hadoŭ, byŭ niavyhadnym, bo dla takich uzrostavych mašyn dziejničała zaharadžalnaja pošlina 2 jeŭra za 1 sm³.
Ad lipienia 2011 hoda samymi vyhadnymi dla impartu stali aŭtamabili va ŭzroście ad 3 da 5 hadoŭ.
Panižeńnie ŭzrostavaha paroha samo pa sabie ŭskładniła žyćcio biełaruskim aŭtaamataram, bo takija mašyny byli nie samymi tannymi. U dadatak u niekalki razoŭ vyraśli mytnyja staŭki.
VW Passat
Siońnia ceny na 9– i 10-hadovyja VW Passat u Biełarusi pačynajucca z 10,5 tysiačy dalaraŭ.
U Hiermanii abo Litvie takija aŭtamabili pradajucca pa cenach ad 5,5 tysiačy jeŭra. Heta kala 6000 dalaraŭ. Kali dadać da koštu aŭto mytnyja płaciažy 490—800 jeŭra (u zaležnaści ad abjomu ruchavika), to na vychadzie atrymajem kala 7 tysiač dalaraŭ.
U vypadku Hiermanii daviadziecca dadać tysiaču za dastaŭku, kali zamaŭlać aŭtavoz, ci 300—500 dalaraŭ, kali aŭto treba dastavić ź Litvy. U vyniku vyjdzie nie bolš za 8 tysiač dalaraŭ. Pa takich cenach mahli b pradavacca 9-, 10-hadovyja «Pasaty» ŭ Biełarusi, kali ŭjavić, što pošliny zastalisia na raniejšym uzroŭni.
Audi A6
U Biełarusi ceny na Audi A6 2014 hoda vypusku pačynajucca z 17 tysiač dalaraŭ. U Hiermanii takija mašyny pradajucca pa cenach ad 11 tysiač jeŭra. Mytnyja pošliny pa starym taryfie (0,4 jeŭra za 1 sm³) składali 800 jeŭra. Dadajom dastaŭku i atrymlivajem mašynu za 14 tysiač dalaraŭ.
VW Sharan
Padobnaja situacyja i ź minivenami VW Sharan 2014 hoda vypusku. U Biełarusi ich pradajuć pa cenach ad 17 tysiač dalaraŭ, a ŭ Hiermanii ceny na takija aŭto pačynajucca z 11 tysiač jeŭra.
Na vychadzie pry afarmleńni jaho pa «starym» taryfie my atrymali b jaho ŭ Biełarusi za 14 tysiač dalaraŭ.
Mercedes-Benz
Za dzieviacihadovuju «ješku» ŭ nas prosiać ad 19 tysiač dalaraŭ. I heta za aŭto ź bienzinavym ruchavikom. Dyzielnyja varyjanty kaštujuć užo ad 21 tysiačy.
Kali adkinuć varyjanty, jakija raniej pracavali ŭ taksi, to ŭ Hiermanii abo Litvie ceny na Mercedes-Benz Je-kłasa pačynajucca z 10 tysiač jeŭra.
To-bok z ulikam staroha myta i dastaŭki takija mašyny mahli b kaštavać u nas ad 13—14 tysiač dalaraŭ.
BMW
Adnolkavaj vyhladaje i situacyja z BMW 5-j sieryi. Kali ŭ Biełarusi takija aŭto kaštujuć ad 19 tysiač dalaraŭ, to ŭ Jeŭropie ceny na ich pačynajucca z 10 tysiač jeŭra. Z ulikam usich vydatkaŭ znoŭ atrymlivałasia b kala 14 tysiač dalaraŭ — pry ŭmovie, što mytnyja pošliny zastavalisia b niaźmiennymi.
Skoda Octavia
Skoda Octavia 2014 hoda vypusku ŭ nas pradajecca pa cenach ad 10 tysiač dalaraŭ, u toj čas jak u Jeŭropie ceny na ich pačynajucca z 5,5 tysiačy jeŭra.
Heta značyć, što pry zachavańni starych taryfaŭ, takija aŭto ŭ nas mahli b kaštavać ad 7500—8000 dalaraŭ.
Volvo XC 90
U vypadku z usiedarožnikam Volvo XC 90, dzie minimalny abjom ruchavika składaje 2,4 litra, roźnica taksama vielmi adčuvalnaja. Dyzielnyja XC 90 2011 hoda vypusku ŭ Biełarusi pradajucca pa cenach ad 19 tysiač dalaraŭ.
U Hiermanii ceny na anałahičnyja aŭtamabili pačynajucca z 9,5 tysiačy jeŭra. Kali dadać da hetaha koštu pošlinu pa taryfie 0,75 jeŭra za «kubik», jak za aŭto va ŭzroście ad 10 da 14 hadoŭ, to heta budzie 1800 jeŭra, ci amal 2000 dalaraŭ.
Z ulikam dastaŭki takija aŭto abychodzilisia b u sumu kala 13,5—14 tysiač dalaraŭ, što minimum na 5 tysiač dalaraŭ tańniej, čym ciapier takija aŭto možna kupić u Biełarusi.
Minskaja firma prapanuje mašyny ź Jeŭropy na zamovu pa nierealna nizkich cenach. U čym padvoch?
Ci zhnili Geely? Kolki kaštujuć i jak vyhladajuć patrymanyja biełaruska-kitajskija aŭto
Kamientary