Kampanija, čyj skład piratechniki vybuchnuŭ u Padmaskoŭi, była vinavataj u «kryvavym salucie» na Dzień Niezaležnaści ŭ Minsku
Mahutny vybuch praktyčna ŭ samym centry Sierhijeva Pasada prahrymieŭ u 10:40 ranicy. Udaram vybuchnoj chvali byli mocna paškodžany cechi zavoda, dźvie škoły, kaledž i spartkompleks «Łuč», u 40 šmatkvaternych damach na najbližejšych vulicach pavylatali šyby. Ad vybuchu paciarpieli kala 70 čałaviek. Adna žančyna pamierła ŭ balnicy. Jašče piaciora znachodziacca ŭ reanimacyi sa stopracentnymi apiokami cieła. 12 čałaviek, pavodle danych TASS, ličacca źnikłymi.
Kiraŭnik kampanii «Piro-Ross» Siarhiej Čankajeŭ byŭ zatrymany. Jon prachodzić padazravanym u spravie ab «parušeńni patrabavańniaŭ pramysłovaj biaśpieki niebiaśpiečnych vytvorčych abjektaŭ». U ofisie firmy prajšli pieratrusy.
Čatyry hady tamu kiraŭnictva kampanii nie paniesła nijakaha pakarańnia za «kryvavy salut» na Dzień Niezaležnaści ŭ Minsku. 3 lipienia 2019 hoda salutam była zabitaja žančyna, 10 čałaviek atrymali traŭmy.
Adkaznaść tady panieśli pradstaŭniki rasijskaha AAT «Piro-Ross» Maksimiljan Sapronaŭ i Kanstancin Dzianisaŭ. Jany adbyli pa try hady «chimii» ŭ Biełarusi i viarnulisia ŭ Rasiju.
Hod tamu były hałoŭny inžynier rasijskaj firmy Andrej Inkin raspavioŭ ŚMI, što nasamreč zdaryłasia 3 lipienia ŭ Minsku.
Kampanija «Piro-Ross», pavodle danych «Kommiersanta», z 1994 hoda zajmałasia vytvorčaściu i prodažam prafiesijnych salutnych ustanovak i fiejervierkaŭ, u tym liku i na zakaz Minabarony RF. Jana ž pastaŭlała ŭstanoŭki dla salutaŭ u Biełaruś.
Pavodle Andreja Inkina, «Piro-Ross» nie tolki rabiła novyja ŭstanoŭki, jana ž zajmałasia i ŭtylizacyjaj starych.
Ustanoŭki, jakija pajšli ŭ Biełaruś, byli, pavodle jaho, jakraz ź liku ŭtylizavanych.
«Čamu tak zrabili? Kab chutčej pastavić ustanoŭki zakazčyku — biełaruskamu Ministerstvu abarony, i, viadoma, kab hrošy chutčej atrymać», — ščyravaŭ były inžynier.
Akramia taho, zarady da ŭstanovak byli kitajskaj vytvorčaści, jany nie adpaviadali paramietram ustanovak.
Jak raskazaŭ Inkin, da 2012 hoda kampanija zakuplała zarady ŭ rasijskaha navukova-daśledčaha instytuta prykładnoj chimii. Paśla vyrašyli, što značna tańniej budzie nabyvać zarady ŭ Kitai. Pryčym, pavodle słoŭ Andreja Inkina, na kitajskija zarady kleili nalepki, byccam jany zroblenyja ŭ Rasii, na AAT «Piro-Ross».
«Kab było zrazumieła — rasijskija zarady z NDI prykładnoj chimii kaštavali 8 tysiač rasijskich rubloŭ, kitajskija zarady — 2 tysiačy. Na ich kleili nalepki, što jany vyrablenyja na «Piro-Ross», i pradavali za tyja ž 8 tysiač rasijskich rubloŭ», — kazaŭ były inžynier.
Jon raspavioŭ, što incydenty z ustanoŭkami ŭ Biełarusi byli z 2012 hoda rehularnymi, ale «ŭsim było pa barabanie».
Tak, na salucie ŭ Breście ŭ 2012 hodzie, pavodle jaho, niekalki stvałoŭ razarvała, ale nichto nie paciarpieŭ.
«Sama ŭstanoŭka nie razburyłasia, incydent zamiali. Bo ŭ minskaj vajskovaj kamiendatury byli dobryja stasunki z «Piro-Ross». Nu, dobryja, bo tam padarunki vazili, zrazumieła. U 2013 hodzie razburyŭsia pryčep, ale hetaje «nieparazumieńnie» znoŭ zamiali», — kazaŭ były inžynier.
U 2017 hodzie, pavodle jaho, rasijskaja kampanija vyrašyła nabyvać u Kitai inšyja zarady — tańniejšyja, druhoha hatunku. Bo tak było vyhadniej.
«I na Dzień Niezaležnaści ŭ Minsku ŭ 2017-m byŭ incydent — u poli razburyŭsia pryčep salutnaj ustanoŭki. Dzivam nichto nie paciarpieŭ, bo byŭ doždž, i sałdaty schavalisia ŭ aŭtamabil. Askiepki raźlacielisia na 250 mietraŭ. I znoŭ usie pramaŭčali, usio zamiali», — kaža Andrej Inkin.
Jon śćviardžaje, što ŭ 2018 hodzie na Dzień Niezaležnaści ŭ Minsku znoŭ byŭ incydent — uzarvalisia krajnija stvały na ŭstanoŭcy, sama jana zastałasia cełaja. Heta adbyłosia ŭ parku Horkaha.
«Tady ŭžo było zrazumieła, što zarady niajakasnyja, druhoha hatunku. Ale pakolki nichto tady znoŭ nie paciarpieŭ — to nibyta prablemy i niama. Usim było pa barabanie. Ustanoŭku adramantavali, i ŭsio. Chacia b tady chto zadumaŭsia», — kazaŭ były inžynier.
Jon ličyć, što zarady z Kitaja, jakija vykarystoŭvali ŭ 2019 hodzie, nie padychodzili naohuł da ŭstanovak.
«U Kitai zarady mierajucca ŭ calach, u nas — u milimietrach. I voś ich zarady 8 calaŭ — heta 200 milimietraŭ. Našy ž, rasijskija, byli 195 milimietraŭ. I voś zarady nie leźli ŭ stvały, ale ŭsim było znoŭ pa barabanu. Hrošy zapłačanyja, śviata čakaje salutu. Znajšli vyjście — źniać častku abałonki, padrezać zarady. Chłopcy staralisia akuratna abrezać u nadziei, što pašancuje», — kaža Andrej Inkin.
Adnak u vyniku adbyŭsia vybuch, ustanoŭka była razburanaja. Ad askiepkaŭ zahinuła žančyna, dziesiać čałaviek atrymali traŭmy.
Jon raspavioŭ, što kali pačałosia śledstva ŭ Biełarusi, biełaruski bok słaŭ zapyty ŭ «Piro-Ross», vyklikaŭ śpiecyjalistaŭ na dopyty.
«Ale chto pajedzie? Pajedzieš i nie vierniešsia, viadoma, nichto tudy nie pajechaŭ. <…> U vyniku pryznali vinavatymi dvuch našych chłopcaŭ, i ŭsio na hetym. Nibyta jany vinavatyja ŭ tym, što padrazali abałonku. Pakazalna ich «adłupcavali». Choć ekśpiertyza, paŭtarusia, pakazała, što i ŭstanoŭka nie novaja, i šary kitajskija. Na chłopcaŭ usio zvalili, bo jany akazalisia pobač, astatnich vinavatych dastać było składana», — dadaŭ były inžynier.
Paśla taho «Piro-Ross» nie zajmałasia salutami ŭ Biełarusi.
Ale ŭ Rasii zajmałasia. Da 2020 hoda hetaje AAT rehularna vyjhravała tendary na praviadzieńnie fiejervierkaŭ praktyčna na ŭsich śviatočnych mierapryjemstvach u Maskvie i Maskoŭskaj vobłaści, uklučajučy arhanizacyju salutu ŭ honar 75-hodździa Pieramohi ŭ Vialikaj Ajčynnaj vajnie.
Apošnimi hadami «Piro-Ross» pačała adčuvać surjoznyja finansavyja prablemy, jakija pryviali ŭ vyniku ŭ sakaviku 2023 hoda da bankructva.
Łatuška: Ryžankoŭ maryć stać prezidentam Biełarusi i nienavidzić Łukašenku. Jon nie projdzie detektar chłuśni6
Kamientary