«Chočacca ŭsich abniać i razam papłakać». Nieviasiołaja historyja biełaruskaha ajcišnika-sieńjora ŭ Polščy, jakomu ledź chapaje hrošaj da zarobku
Dzik Pic raspaviadaje historyju Siarhieja, jakomu paśla pierajezdu ŭ Polšču ledź chapaje na žyćcio.
«Surjoznyja pakupki pakul adkłali da lepšych časoŭ»
«My pierajechali ŭ Polšču z žonkaj i dźviuma dočkami (5 i 2 hady) u 2021 hodzie. Žonka pracavała da naradžeńnia pieršaha dziciaci, ciapier — nie. Ja spačatku sprabavaŭ šukać pracu ŭ inšych krainach, ale varyjantaŭ u Polščy było bolš. Naprykład, niemcy i amierykancy navat nie adkazvali na reziume. U vyniku asieli va Urocłavie — u pracadaŭcy ź biełkaraniami tam ofis.
Ja biznes-analityk na sieńjorskaj pazicyi i dośviedam kala 8 hadoŭ. Pracuju na aŭtsorsie. Zarobak bruta 16 000 złotych, nieta — 11 000 złotych (kala $2750). Prykładnyja vydatki na siamju na miesiac vyhladajuć tak:
- Arenda kvatery (dvuchpakajoŭka) — $800
- Ježa, ałkahol, bytavaja chimija — $550
- Restarany, kaviarni, dastaŭka ježy — $150
- Charčavańnie ŭ sadzie/škole, dziciačyja hurtki — $400
- Sport, chobi — $100
- Padarožžy — $150 (chajkinh, vyjezd u najbližejšyja harady)
- Miedycyna — $75 na miesiac
- Drobnyja vydatki, adzieńnie — kala $125
- Padpiski (Netflix i inšaje) — $100
- Telefon, internet — $40
- Adzieńnie — $100
- Haradski transpart, taksi — $60;
- Stryžki, manikiur i inšaje — $100
Razam — $2750
Na ceny ŭ kramach my hladzim, ale śpiecyjalna za źnižkami nie haniajemsia. Za manitorynh trataŭ adkazvaju ja: z dapamohaj tablički ŭ ekseli mahu niešta z vydatkaŭ skaracić, kab kupić pyłasos (naprykład). Ale, z ulikam našaha doŭhaterminovaha minusu, haryzont płanavańnia ŭ nas usiaho 1-2 miesiacy.
Nie skažu, što my prosta biadujem, ale surjoznyja pakupki (rovar, płejstejšen, karekcyja zroku, zubnyja impłanty, novy telefon, mebla, płanšet) pakul adkłali da lepšych časoŭ.
Źbirać hrošy ŭ nas atrymlivajecca redka, naadvarot, nievialikaja skarbonka ŭ pamiery kala $4000 pavolna rastaje. Adkładajem $100-200 adrazu paśla zarpłaty, ale da kanca miesiaca ŭsio (a časam i bolš) davodzicca zabirać, kab dažyć da zarobku.
«Nie razumieju, jak žyvuć siarednija palaki i midł ź dziećmi. Chočacca ich abniać i razam papłakać»
Choć moj dachod u ličbach paśla pierajezdu vyras, ale vydatki niepamierna pavialičylisia. Asabliva ŭdaryła pa biudžecie inflacyja: paśla pačatku vajny pierahladu zarpłaty nie było, a ceny na ŭsio vyraśli (pa adčuvańniach) na 30%.
Siudy ž dadalisia vydatki na druhoje dzicia i arendu (u Minsku my zdymali dvuchpakajoŭku za $300, a tut — za $800). Chaciełasia b zdymać trochpakajoŭku, ale ciapier nam heta nie pa kišeni. Zatoje na pryvatny dziciačy sadok nie škadujem: jon apraŭdvaje čakańni (choć jaho pieravahi pierad dziaržsadkom nam pakul taksama nie zrazumiełyja).
Raniej my addavali pieravahu biestałkovamu plažnamu adpačynku ŭ Jeŭropie, a ciapier navat Bałtyjskaha mora dazvolić sabie nie možam. Uvieś naš adpačynak — heta parki ŭ horadzie, chajkinh i niedalokija padarožžy na ciahniku.
Voś i vychodzić, što ja typu sieńjor-pamidor, jakomu zarobku na siamju ledź chapaje. Pry hetym dla majoj nie techničnaj śpiecyjalnaści i pasady takaja suma — heta vielmi navat niadrenna. Ja realna nie razumieju, na što žyvuć midł ź dziećmi i palaki sa svaimi siarednimi zarobkami. Chočacca ich abniać i razam papłakać.
«Praca z 18-20k złotych bruta mnie tolki śnicca, tak što zastajecca być aptymistam»
Padpracoŭku ja nie šukaŭ, bo z Blue card ja mahu pracavać tolki pa svajoj pracy. Ja sprabavaŭ šukać bolš apłačvanuju pracu, ale ciapier suiskalnikaŭ u Polščy mocna bolš, čym vakansij dla majoj pazicyi. Tak što praca z 18-20k złotych bruta mnie tolki śnicca.
Dumaju, u majoj situacyi bolš za ŭsio vinavataja inflacyja, kryzis u ekanomicy (i ŭ pryvatnaści — u IT) i raźvićcio ŠI. Mnohija IT-hihanty chočuć nazapasić padušku biaśpieki, tak jak bačać skaračeńnie rynku. Heta vyklikaje «efiekt damino». I tut užo nie zrazumieła, dzie kuryca, a dzie jajka.
Tak što zastajecca tolki być aptymistam: čakać adnaŭleńnia rynku, naroščvać navyki, kab stać bolš karysnym biznesu śpiecyjalistam».
«Siarhiej» nie adzin. Voś jak KDB prapanuje zarabić na sačeńni za biełaruskimi emihrantami2
Kamientary