«Nie vsio tak odnoznačno». Palitołah patłumačyŭ, čamu rasijanie tak lohka pahadžajucca padpalvać vajenkamaty
Mahčymaść manipulavańnia ludźmi śpiecyjalist źviazvaje z uździejańniem manipulatyŭnaha telebačańnia, jakoje za dziesiacihodździ ŭzhadavała «pakaleńnie Ren TV».
Jak paviedamlałasia, za apošnija sutki ŭ Rasii sprabavali padpalić adrazu dzieviać vajenkamataŭ. Amal usie padpalščyki spasyłalisia na toje, što jany heta zrabili paśla zvanka ašukancaŭ.
Jak piša ŭ siabie ŭ fejsbuku palitołah Maksim Machańkoŭ, cikava va ŭsich hetych historyjach toje, što ludziej pierakonvali zrabić padpał ci to telefonnyja machlary, ci to «ahienty FSB». Tak, adnaho z mužčyn pa telefonie pierakanali padpalić vajenkamat i prataranić bramu, kab nibyta «atrymać dostup da dakumientaŭ, jakija adpraŭlajucca z vajenkamata va Ukrainu».
«Zdavałasia b, u luboj narmalnaj krainie takoje było b prosta niemahčyma. Kali b niechta pa telefonie prapanavaŭ zrabić takoje šviedu abo palaku, jany b albo źviarnulisia ŭ palicyju, albo prosta praihnaravali takoje. Čamu ž naiŭnyja rasijanie viaducca na takija prymityŭnyja razvody, i pahadžajucca ŭ takim udzielničać?» — zadajecca pytańniem palitołah.
Na jaho pohlad, vinoju hetamu telebačańnie, jakoje pakazvaje pieradačy pra kanśpirałohiju i filmy, u jakich usio adbyvajecca adpaviedna z tajemnymi schiemami. Za dziesiacihodździ jano vychavała «pakaleńnie Ren TV» — rasijan (a ź imi razam mnohich ukraincaŭ i biełarusaŭ), jakija advučylisia krytyčna myślić, i zaachvociła determinizm, jaki vučyć, što padziei całkam pradvyznačajucca pryčynami, jakija isnavali raniej. Pavodle determinizmu, dla vybaru i, adpaviedna, asabistaj adkaznaści ŭ ludziej, pa sutnaści, niama miesca.
«Dziesiacihodździami rasijan zambavali, što «nie vsio tak odnoznačno», što «nastojaŝiej pravdy nie suŝiestvujet», što «vsio užie riešieno za nas» i «im śvierchu łučšie vidno», što «my ludi maleńkije», i što kali adbyvajecca niešta važnaje i rezanansnaje, to «eto komu-nibud́ nužno», — zaŭvažaje palitołah.
Jak tłumačyć śpiecyjalist, rasijskaja i łukašenkaŭskaja prapahanda padaje ŭsie palityčnyja i sacyjalnyja padziei ŭ śviecie praz hetuju ž pryzmu: nie jak vynik voli ludziej i aktyŭnaści hramadstva, a jak vynik manipulacyi i sacyjalnaj inžynieryi ludziej z uładaj i hrašyma, «prajektaŭ» i «palittechnałohij». Dzie ŭsio vyrašajecca nie publična, a pad dyvanami i za zakrytymi dźviaryma.
Tolki ŭ takoj karcinie śvietu, na dumku ekśpierta, moža naradzicca čałaviek, jaki bieź piarečańniaŭ i krytyčnych pytańniaŭ pavieryć telefonnamu «supracoŭniku śpiecsłužby» i pojdzie na šturm vajenkamata, kab paŭdzielničać u «tajemnaj śpiecapieracyi», navat nie spytaŭšy siabie: «A našto?».
Palitołah adznačaje, što ŭkrainskija śpiecsłužby paśpiachova namacali bolevyja punkty rasijskaha hramadstva i navučylisia na hetym ihrać.
Čytajcie jašče:
Za apošnija sutki ŭ Rasii sprabavali padpalić adrazu dzieviać vajenkamataŭ
Siłaviki ŭzialisia za karystalnikaŭ tvitara — dziasiatki akaŭntaŭ zvyčajnych biełarusaŭ stali «ekstremisckimi»3
Kamientary