Kompleks budynkaŭ Pientahona. Fota: RHisham Ibrahim / Getty Images

Kompleks budynkaŭ Pientahona. Fota: RHisham Ibrahim / Getty Images

Miljony elektronnych listoŭ, pryznačanych supracoŭnikam amierykanskich abaronnych struktur, pamyłkova adpravili ŭ Mali, bo ich aŭtary prapuskali ŭ adrasie (paśla sabački @) adnu litaru, jak piša Bi-bi-si.

Damiennaje imia Ministerstva abarony ZŠA — «.mil», ale na praciahu mnohich hadoŭ pry adpraŭcy imejłaŭ karystalniki pamyłkova pisali na adras «.ml», a hety damien naležyć Mali — afrykanskaj krainie, jakaja źjaŭlajecca adnym ź niamnohich sajuźnikaŭ Rasii ŭ śviecie.

Ułady Mali pačali padtrymlivać asabliva ciesnyja suviazi z Rasijaj paśla taho, jak u 2020 hodzie ŭ hetaj krainie adbyŭsia vajskovy pieravarot i tam pačali dziejničać najmity PVK «Vahnier».

Pa danych Financial Times, jakaja pieršaj napisała pra situacyju ź listami, ab prablemie stała viadoma bolš za 10 hadoŭ tamu. Jaje vyjaviŭ niderłandski pradprymalnik Jochanes Zurbjer, jaki ŭ 2013 hodzie atrymaŭ kantrakt na absłuhoŭvańnie damiena «.ml», jaki naležyć Mali.

Za apošnija miesiacy jon atrymaŭ dziasiatki tysiač imejłaŭ, jakija pryznačalisia amierykanskim vajskoŭcam.

Siarod hetych listoŭ nie było paviedamleńniaŭ z hryfam «sakretna», adnak, jak śćviardžaje Financial Times, u ich utrymlivałasia miedycynskaja infarmacyja, finansavyja źviestki, karty amierykanskich vajskovych abjektaŭ, źviestki ab zapłanavanych aficyjnych pajezdkach i niekatoryja dypłamatyčnyja paviedamleńni.

U lipieni Zurbjer napisaŭ pra heta amierykanskim čynoŭnikam. Jon rastłumačyŭ, što jaho kantrakt z uradam Mali chutka pavinien skončycca, a heta aznačaje, što «ryzyka realnaja, bo situacyju mohuć vykarystać vorahi ZŠA».

Urad Mali pavinien byŭ viarnuć kantrol nad svaim damiennym imiem užo 17 lipienia.

Pa danych amierykanskich čynoŭnikaŭ, paviedamleńni vajskoŭcaŭ ZŠA z hryfam «sakretna» i «całkam sakretna» adpraŭlajucca admysłovymi kamunikacyjnymi kanałami, tamu jany naŭrad ci mohuć patrapić u čužyja ruki z-za pamyłki ŭ adrasie.

Adnak juryst Styvien Stranski, jaki raniej pracavaŭ z amierykanskim Departamientam unutranaj biaśpieki, ličyć, što navat na pieršy pohlad niavinnaja infarmacyja moža być cikavaja dla vorahaŭ ZŠA, asabliva kali heta danyja ab kankretnych supracoŭnikach.

«Takoha rodu karespandencyja aznačaje, što zamiežnyja siły mohuć skłaści daśje ab našych vajskoŭcach z metaj špijanažu abo pasprabujuć atrymać ad ich źviestki ŭ abmien na finansavuju vyhadu, — kaža Stranski. — Zamiežnyja ŭrady dakładna mohuć vykarystać takuju infarmacyju».

Клас
1
Панылы сорам
28
Ха-ха
3
Ого
4
Сумна
1
Абуральна
1