Spatrebiłasia try hady i $200 000. Jak vyhladaje niezvyčajny dom-ziamlanka biełaruskaha architektara
Alaksiej Karabloŭ — suzasnavalnik studyi ZROBIM architects. Jon zrabiŭ niezvyčajny prajekt «ziamlanki» na bierazie Dubraŭskaha vadaschovišča. Za budoŭlaj nazirali žurnalisty Onlíner. I voś praz try hady prajekt, narešcie, zavieršany, choć i źjeŭ času i hrošaj kudy bolš, čym płanavałasia. Raskazvajem, što ŭ vyniku atrymałasia.
Dobraŭparadkavańnie ŭčastka
Architektar abraŭ učastak ź pierapadam vyšyni piać mietraŭ, što dazvoliła jamu ŭtapić chatu ŭ reljefie. Z darohi pabudovu praktyčna nie vidać, ad cikaŭnych susiedskich vačej bierahuć bietonnyja «šory»… Zatoje sa dvara dom paŭstaje va ŭsioj svajoj šklanoj pyšnaści: adna sa ścien — całkam z panaramnych voknaŭ. Sam budynak manalitny, z płoskim «zialonym» dacham. Tut usiaho adzin pavierch i kala 100 «kvadrataŭ».
Kali zastavałasia tolki akulturyć prylehłuju terytoryju i ŭładkavać usio ŭsiaredzinie: raźvieści kamunikacyi i zrabić azdableńnie, napoŭnić interjer, — zdaryłasia niepradbačanaje: uviesnu paciok dach.
— Ja padumaŭ, što ŭsiamu vinoj niajakasnaja hidraizalacyja. Pravieryŭ — akazałasia, pryčyna ŭ inšym. Budaŭniki kryva vyvieli vientkanały i komin, z-za čaho ŭ ščylinach, jak u marazilniku, namiarzaŭ lod. Z prychodam ciapła jon rastaŭ, i vada zatapiła paryłku i kacielniu — pryjšłosia ŭsio ramantavać, — raspavioŭ Alaksiej.
Kab raznastaić manachrom, Alaksiej vysadziŭ pobač krychu zielaniny: kanadskuju sasnu, dekaratyŭnuju jabłyniu (za jaje ćvicieńniem možna budzie nazirać prama z akna), paparać. Z kolkaściu raślin mieru nie pierabraŭ: usio ž tusavacca z ranicy da nočy na hradkach ni jamu, ni žoncy nie chaciełasia.
Na zadnim dvary znachodzicca zona adpačynku z šezłonhami, vohnišča i mini-basiejn. Jon niezvyčajny, sa składanaj sistemaj pompaŭ i filtraŭ. Jana sama zabiraje z chaty vadu, nahravaje jaje da patrebnaj tempieratury i ŭvieś čas ačyščaje. Takim čynam džakuzi ceły hod moža być napoŭniena vadoj i vyhladać pry hetym estetyčna.
Inžyniernyja kamunikacyi
Unutry «ziamlanki» praktyčna ŭsio hatova, zastałosia dadać śviacilni (ich dastaŭku Alaksiej čakaje ŭžo ceły hod), dekor. Ale pierš čym padrabiazna pahavaryć pra interjer, zakraniom nie mienš važnuju temu inžyniernych kamunikacyj. Hałoŭnaja asablivaść ich u tym, što jany raźviedzieny pa padłozie, a nie pa stoli. Dziakujučy takomu rašeńniu ŭdałosia zachavać jaje vyšyniu na ŭzroŭni 2,80 mietra.
Vada idzie z centralnaj śvidraviny. Aciapleńnie elektryčnaje, pavietra nahravajecca z dapamohaj padłohavych kanviektaraŭ: zvyčajnyja radyjatary ŭ chacie z panaramnymi voknami nie spracujuć.
Pa słovach surazmoŭcy, ludzi nie vielmi lubiać kanviektary: jany źbirajuć pył, ich kiepska čyścić, dy i cana značna vyšejšaja. Ale heta adziny varyjant, kali chočaš mieć zvyčajnaje draŭlanaje pakryćcio, bo sistema «ciopłaja padłoha» pracuje tolki na plitcy ci bietonie.
U domie ŭstalavany kandycyjanier, sistema vientylacyi i rekupieracyi pavietra. Apošniaja dapamahaje krychu ekanomić elektryčnaść.
— Usio pavietra dla vientylacyi z vulicy, ale jaho treba padrychtavać: astudzić abo padahreć i dadać vilhotnaści. Rehulavać tempieraturu tenam davoli doraha, tamu ŭ rekupieratary praduhledžana mnostva kanałaŭ, u jakich pierasiakajucca dva pavietranyja strumieni. U vyniku chatniaje pavietra nahravaje vuličnaje. Tak marnujecca mienš elektryčnaści.
Ale, niahledziačy na hetyja chitryki, «kamunałka» ŭžo abychodzicca architektaru ŭ kapieječku. U sadovym tavarystvie — padvyšanyja taryfy. Minułaj zimoj, kab budaŭniki mahli pracavać, uładalnik nahravaŭ pamiaškańnie da 15—18° C — u miesiac vychodziła kala 500 rubloŭ. Kali žyć tut uvieś čas i vykarystoŭvać funkcyjanał na poŭnuju moc, napeŭna, atrymajecca 1000 rubloŭ.
Naohuł «ziamlanka» Alaksieja davoli sučasnaja, tut i sistema «razumny dom» majecca. Sa smartfona možna rehulavać aciapleńnie, kandycyjanier, vientylatar, uzrovień vilhotnaści. A jašče — kiravać rolštorami va ŭsich pakojach, usimi śviacilniami, u tym liku i na terasie.
Płaniroŭka i interjer
Uładalnik spyniŭ svoj vybar na styli džapandzi — miksie skandynaŭskaha i japonskaha stylaŭ. Niešta takoje spakojnaje i ŭtulnaje, ź minimumam dekoru.
U domie bazavaje azdableńnie: dubovy parkiet, stoli z hipsakardonu, pafarbavanyja ŭ bieły koler ścieny.
— Mnohija zahaniajucca na idealna roŭnych ścienach, ale tut takoha niama. Heta dapamahaje sekanomić kuču hrošaj. Naprykład, na kuchni roźnica dzieści 3—5 mm, ale heta bačna tolki pad peŭnym vuhłom, dy i to kali viedaješ, kudy hladzieć. Tak što ja liču heta lišnim. Uvahu treba źviartać tolki ŭ tych miescach, dzie budzie ŭbudavana technika, niejkija šafy: jany mohuć prosta tudy nie ŭleźci.
U interjery vykarystana šmat dreva — u asnoŭnym heta špona dubu. U masivie Alaksiej taksama sensu nie bačyć: heta niamodna i doraha.
— U piarednim pakoi ściana całkam zašytaja ŭ dreva. Kali dźviery začynienyja (jany tut rassoŭnyja panelnyja, padobnyja da tych, što ŭstaloŭvajuć u ciahnikach), atrymlivajecca sucelnaja płoskaść u styli natural. Tut, darečy, taksama ŭźnikli prablemy. U adnym z pakojaŭ ščylina pamiž dźviaryma i ścianoj była takoj maleńkaj, što ad pierapadu vilhotnaści dźviery vyhinalisia i šaravalisia ab kut. Tamu my ŭžo ŭ zroblenym interjery rasšyvali ścianu i pavialičvali hetuju adlehłaść.
Płaniroŭka ŭ «ziamlancy» pradumana takim čynam, što spalnyja pakoi raźviedzienyja pa vuhłach doma, pamiž imi — ahulnaja prastora haścinaj i kuchni. Sanvuzieł znachodzicca pobač z uvachodam i pa pamiery jon navat bolšy, čym asnoŭnaja spalnia. Heta tamu, što tam jość usio: vanna, dušavaja kabina i paryłka.
— Vanna staić nasuprać vialikaha akna. My praviarali — z vulicy ničoha nie vidać. Asablivaść vanny ŭ tym, što jana zatoplenaja ŭ padłohu na 20 sm, dla hetaha ja praduhledzieŭ u padmurku nišu. Tam ža, darečy, prachodziać i kamunikacyi.
— U krana cikavaja historyja: ja kuplaŭ jaho dvojčy. Pieršy raz jon zhubiŭsia siarod budaŭničaha śmiećcia, i jaho prosta vykinuli. Pryjšłosia šukać novy — minus $1000 na roŭnym miescy.
Saŭna taksama nie zusim prostaja. Zvyčajna jana zašyvajecca listoŭnicaj, ale heta padałosia Alaksieju zanadta prostym rašeńniem, i jon zamianiŭ jaje šyrokafarmatnymi panelami sa šponu.
— Jość elitnyja niamieckija paryłki Klasf, jakimi ja i natchniŭsia. Niby znachodzišsia ŭ niejkim darahim hateli.
U domie amal usia mebla zroblenaja rukami biełarusaŭ.
— Ludzi časta niedaaceńvajuć našych majstroŭ, choć jany vałodajuć dastatkovym prafiesijanalizmam, kab zrabić reč, padobnuju da brendavaj, i paprasić za jaje mienš hrošaj. Voźmiem kanapu ŭ haścinaj — kaštavała $1200. Kali kuplać takuju ž, ale italjanskuju, atrymajecca $5000. Chacia pa jakaści jany ničym nie adroźnivajucca.
Spalnia taksama minimalistyčnaja: łožak, tumbački, šafa i pracoŭnaje miesca.
Ale kali pryhledziecca, možna vyjavić sioje-toje ŭnikalnaje, naprykład, čučała krakadziła. Dziela dekoru architektar krychu abrabavaŭ svaju babulu. Kaliści daŭno jana była na Kubie i pryciahnuła adtul kuču ŭsiakaha dabra: madeli karabloŭ, marskija zorki, rakavinki, karciny i… krakadziła. Možna skazać, Alaksiej dadaŭ u svoj džapandzi krychu kałanijalnaha stylu.
Centralnaje miesca ŭ haścinaj zajmaje chitraja kanstrukcyja, jakaja adnačasova i kamin, i stełaž, i ekran dla prahladu filmaŭ na prajektary. Nasuprać — kanapa z kresłam. Za imi — abiedzienny stoł i kuchnia. Jana bieź vierchnich šafak, ich zamianiajuć adkrytyja palicy — ciapier heta raspaŭsiudžany trend, kab zrabić hetuju zonu bolš lohkaj. Asnoŭnyja miescy dla zachoŭvańnia chavajucca ŭ nižnich šafach. Tam ža raźmiaščajecca i technika — duchavaja šafa i mikrachvaloŭka. Varačnaja panel tut z ubudavanaj vyciažkaj, što taksama dazvalaje prastory być čyściejšaj.
U haściavym pakoi ŭsio davoli prosta: kanapa, babulin dyvan, šafa z rejkami i teleskop. Pry žadańni pamiaškańnie lohka možna pierafarmatavać u dziciačy pakoj.
Vysnovy
Na budaŭnictva doma Alaksieju spatrebiłasia try hady. Jon ličyć, što heta vielmi marudna. Usiamu vinoj zusim nie prablemy ź finansami, jakija mohuć pastavić praces na paŭzu, a padradčyki.
— Jany ŭsie vialikija małajcy, tamu ŭ ich kuča zakazaŭ. I ty viečna čakaješ, kali vyzvalicca taja ci inšaja bryhada. Pabudavać łahistyku, kab jany išli roŭnieńka adna za adnoj, vielmi składana. Dobra, kali adna kampanija robić pad kluč usie pracy, ale heta kaštuje na 30% bolš. Zatoje možna zaviaršyć budoŭlu za hod.
Pa słovach architektara, prajekt atrymaŭsia takim, jakim jon jaho i zadumvaŭ. Praŭda, biudžet za hety čas taksama vyras — sa $160 000 da $200 000.
— Mocna padaraželi materyjały. Na ŭstaloŭku voknaŭ ja vydatkavaŭ $18 000, a zaraz było b składana ŭpisacca ŭ $30 000. I tak praktyčna va ŭsim. Dumaju, pabudavać dom padobnaha kłasa siońnia za takuju sumu ŭžo niemahčyma.
Kamientary