Zatrymlivali prarektara viciebskaj vietakademii, jaki apieryravaŭ vožyka. Jaho čakaje sud

Pra jaho zatrymańnie paviedamiŭ telehram-kanała «Viciebsk vyjšaŭ na špacyr».

Jak stała viadoma «Našaj Nivie», prarektara pa vučebnaj častcy Viciebskaj dziaržaŭnaj akademii vieterynarnaj miedycyny, kandydata vieterynarnych navuk Uładzimira Žurbu zatrymali prosta na pracy. Ci jon dahetul za kratami abo jaho adpuścili dadomu da suda, nieviadoma.

U VNU jon bolš nie pracuje, paviedamili ŭ klinicy kafiedry ahulnaj, pryvatnaj i apieratyŭnaj chirurhii, jakuju dacent Žurba prasłaviŭ ci nie na ŭsiu Biełaruś, zrabiŭšy apieracyju pa vydaleńni puchliny dekaratyŭnamu vožyku. Tady pra heta napisali šmat jakija miascovyja i respublikanskija vydańni.

Ale kudy čaściej imia Uładzimira Žurby fihuravała ŭ aficyjnych paviedamleńniach pra dziejnaść navučalnaj ustanovy. Adno z apošnich źjaŭleńniaŭ prarektara na staronkach dziaržSMI — heta repartaž z uručeńnia ŭznaharodaŭ pieramožcam abłasnoj alimpijady «Ahrapolija-2022», dzie jon vinšavaŭ padletkaŭ ad imia administracyi.

Sud pavodle č. 1 art. 430 Kryminalnaha kodeksa (atrymańnie chabaru) pryznačany na 5 lipienia. Praces raspačniecca ŭ sudzie Pieršamajskaha rajona Viciebska, spravu budzie razhladać sudździa Juryj Urban. Byłomu vykładčyku pahražaje abmiežavańnie abo pazbaŭleńnie voli na termin ad troch da siami hadoŭ sa štrafam i zabaronaj zajmać peŭnyja pasady ci zajmacca peŭnaj dziejnaściu.

Pavodle telehram-kanała «Viciebsk vyjšaŭ na špacyr», niezadoŭha da zatrymańnia były prarektar pravodziŭ z supracoŭnikami naradu pra niedapuščalnaść parušeńnia artykuła 43 Zakona №305-Z «Ab baraćbie z karupcyjaj», dzie havorycca pra adkaznaść kiraŭnikoŭ u papiaredžańni i vyjaŭleńni karupcyjnych pravaparušeńniaŭ.

Apošni zapis Uładzimira Žurby na jahonaj staroncy ŭ fejsbuku datavany 6 lutaha. Napiaredadni adbyłosia ŭručeńnie dypłomaŭ vypusknikam fakulteta vieterynarnaj miedycyny, i fotazdymki z hetaj padziei — apošnija, dzie Žurba vystupaje ŭ jakaści prarektara pa vučebnaj častcy ŭniviersiteta. Jaho asabistuju staronku prybrali z aficyjnaha sajta navučalnaj ustanovy, a byłaja pasada, kali vieryć sajtu, zastajecca vakantnaj. 

• 1
• 3
• 22
• 2
• 4
• 12