Adzin vypadak na 200 miljonaŭ ciažarnaściaŭ: hamialčanka naradziła trajniat
«Z karjerystki ŭ maci fantastyčnaj čaćviorki», — tak u šapcy profilu piša pra siabie redaktar i pijar-mieniedžar Nastaśsia Pisčankava-Šypinskaja. Žančynie niama jašče i 30, a jana ŭžo šmatdzietnaja maci. Z mužam Aleham išli pa druhoje dzicia, a na pieršym UHD pačuli: «Nu što, budziem ličyć!» Historyju raspaviadaje «Sputnik».
Monacharyjalnyja tryamnijatyčnyja trajniaty byvajuć adzin raz na 200 miljonaŭ ciažarnaściaŭ. Małyja padobnyja adno da adnaho jak try kropli vady.
Siamja žyvie ŭ Padmaskoŭi.
«U mianie nie było šoku, Aleh taksama ŭspryniaŭ navinu spakojna, uzradavaŭsia. Bolš za ŭsich hałasiła naša radnia, cikaviłasia, jak my paciahniem čaćviarych dziaciej», — dzielicca Naścia.
Na praciahu ŭsioj ciažarnaści lekary ŭvieś čas nahadvali pra admysłovy stan budučaj maci i rekamiendavali bierahčy siabie, jak kryštalnuju vazu.
«Ryzyki sapraŭdy było šmat, — pryznajecca šmatdzietnaja mama. — Adzin płod moh zamierci, i tady pryjšłosia b pieraryvać ciažarnaść. Byvajuć vypadki, kali adno ź bliźniat pačynaje litaralna «abjadać» inšaha, vysmoktvajučy pažyŭnyja rečyvy. U vyniku adno raźvivajecca, a druhoje pavolna hinie. U luby momant moh adbycca vykidak, tamu na 22 tydni mnie pastavili piesaryj na šyjku matki i nastojliva rekamiendavali pabolš lažać, kab ciahlicy nie napružvalisia».
Na 20-m tydni ŭ budučaj mamy akruhliŭsia žyvot, jak pry zvyčajnaj ciažarnaści na 8—9 miesiacy.
Bližej da 30 tydnia mocna aciakli kaniečnaści i baleli sustavy, za tydzień da rodaŭ boli ŭ nahach stali nievynosnymi, kalenki pryjšłosia pieraviazvać ełastyčnym bintam.
«Ja nie mahła ni lažać, ni chadzić. Žyvot cisnuŭ na dyjafrahmu, ad čaho było ciažka dychać. Rebrami adčuvała, dzie jany lažać. Na fota z apieracyjnaj vidać, jakaja ja zadavolenaja paśla rodaŭ, tamu što zmahła narešcie ŭdychnuć na poŭnyja hrudzi, a ŭsie orhany zaniali zvykłyja miescy», — dzielicca adčuvańniami Naścia.
I dadaje, što, kali b nie muž, jaki dapamahaŭ apranacca, mycca, jeści, tryvała vynosiŭ źmieny ŭzroŭniu harmonaŭ i ŭziaŭ usie bytavyja kłopaty na siabie, joj było b značna składaniej pieranosić ciažarnaść navat maralna.
Jak adroźnić trajniat?
Dziaŭčynki naradzilisia ŭ 32 tydni zdarovyja i z dobraj dla trajniat vahoj. Starejšaja Jarasłava — 1830 hramaŭ, siaredniaja Zabava — 1710, a małodšaja Vasilisa — 1730.
«Moj lubimy multfilm — «Latučy karabiel», tamu ź imiem Zabava my vyznačylisia adrazu. Muž chacieŭ nazvać dačku Vasilisa, tak i zrabili. A imia Jarasłava pryjšło da nas na dziciačaj placoŭcy: tak paklikali dziaŭčynku, i my vyrašyli, što nam taksama padychodzić. Atrymalisia kazačnyja imiony», — dzielicca Naścia.
Usie try dziaŭčynki na adzin vyhlad, a voś charaktary, pa apoviedach baćkoŭ, roznyja. Jarasłava spakojnaja, aburajecca tolki tady, kali niešta niepakoić. Zabava ž, naadvarot, hučnaja i zvonkaja dziaŭčynka, a jašče vielmi ruchavaja, sosku smokča lepš za ŭsich, choć i naradziłasia samaj maleńkaj. Vasilisa kapryznaja — pryncesa, adnym słovam.
«Jak ja płanuju ich adroźnivać? Možna ŭ roznaje pa kolery adzieńnie apranać, ale heta nakładvaje dadatkovyja zadačy na baćkoŭ, tamu prosta paviesim birki ź imionami na pieršy čas. Jak padrastuć, budu im šapački roznyja apranać: adnoj u formie zajca, inšaj — kaŭpačkom, treciaj — z pamponam. Viedaju, što niekatoryja mamy bliźniat farbujuć im paznohci ŭ roznyja kolery, ale my na taki rańni manikiur nie advažvajemsia. Chtości prosta padpisvaje 1, 2, 3… My budziem pakul abvykać», — kaža Nastaśsia.
«Ciažka biez ajcišnikaŭ i turystaŭ». Historyja biełarusa, jaki pačynaŭ kala stanka «Biełšyny», a ciapier vałodaje sietkaj seks-šopaŭ
Stała viadoma, kali adkryjuć padziemny pierachod kala «Dana Moł»
«Ja ž pamru, kali nie budu varušycca i ihrać». 70-hadovy mužčyna vosiem hadoŭ štotydzień pryjazdžaje ŭ Minsk z harmonikam
Ličby, ad jakich strašna. Bolš za 280 tysiač biełarusaŭ atrymali dazvoły na žyćcio ŭ ES u 2023. Bolš tolki va ŭkraincaŭ35
Kamientary
jana ž maskvička, nie?