«Ja nutrom adčuvaŭ kiepskaje» — Džejms Kemieran pra trahiedyju batyskafa «Tytan»
Halivudski režysior Džejms Kemieran, jaki źniaŭ kultavy film «Tytanik» i mnostva raz apuskaŭsia na vialikuju hłybiniu, skazaŭ u intervju Bi-bi-si, što adrazu paśla źniknieńnia batyskafa «Tytan» jon zapadozryŭ najhoršaje. Režysior paviedamiŭ, što kampaniju OceanGate, jakaja arhanizavała apuskańnie, nieadnarazova papiaredžvali pra niebiaśpieku ekśpiedycyj da patanułaha «Tytanika».
Batyskaf «Tytan», na borcie jakoha znachodziłasia piać čałaviek, pierastaŭ vychodzić na suviaź praz 1 hadzinu i 45 chvilin paśla pačatku misii ŭ minułuju niadzielu. Pošukavaja apieracyja praciahvałasia da viečara 22 červienia, kali ŭ mory, niepadalok ad miesca hibieli «Tytanika», byli znojdzienyja abłomki batyskafa.
Ekśpierty ličać, što aparat razburyŭsia pad ciažaram vady, uvieś ekipaž zahinuŭ.
Kemieran, jaki sam apuskaŭsia da karkasa «Tytanika» 33 razy, kaža, što karcina zdareńnia była jamu zrazumiełaja z samaha pačatku.
«Ja nutrom adčuvaŭ, što adbyłosia. Kali admoviła elektronika padłodki, vyjšła z ładu jaje sistema suviazi i adnačasova vyjšaŭ z ładu transpondar sačeńnia — padłodka źnikła», — kaža Kemieran.
Režysior raskazaŭ, što abzvaniŭ svaje kantakty siarod padvodnikaŭ i praz hadzinu skłaŭ poŭnaje ŭjaŭleńnie pra toje, što zdaryłasia.
«Jany apuskalisia, ich metaj było spuścicca na hłybiniu 3800 mietraŭ, na adznacy 3500 mietraŭ ź imi źnikła suviaź i adklučyłasia sistema sačeńnia. Ja adrazu skazaŭ, što strata abiedźviuch sistem moža być tolki vynikam niejkaj kałasalnaj katastrofy», — uspaminaje Džejms Kemieran.
Pavodle jaho słovaŭ, pieršaja dumka była akurat pra toje, što kapsułu mahło razdušyć zavialikim ciskam vady.
Ciapier heta i jość asnoŭnaja viersija hibieli «Tytana». Ekśpierty vykarystoŭvajuć dla apisańnia hetaj źjavy termin «impłozija».
U čaćvier aficyjny pradstaŭnik VMS ZŠA paviedamiŭ žurnalistam, što nieŭzabavie paśla taho, jak «Tytan» straciŭ kantakt z pavierchniaj, vajenna-marski fłot znajšoŭ «akustyčnyja anamalii [to-bok šum], adpaviednyja impłozii».
Hetuju infarmacyju pieradali hrupie bierahavoj achovy ZŠA, jakaja ź jaje dapamohaj sprabavała zvuzić radyus zony pošuku.
Kemieran skazaŭ Bi-bi-si, što dla jaho minuły tydzień «nahadvaŭ doŭhi kašmarny śpiektakl, kali praciahvajecca mituśnia ź biaskoncymi razmovami pra stuki, kisłarod i pra ŭsio astatniaje».
«Ja viedaŭ, što batyskaf znachodzicca roŭna pad tym miescam, adkul apošni raz pastupali źviestki pra jaho hłybiniu i miescaznachodžańnie. Jakraz tam jaho i znajšli», — kaža režysior.
Jon źviartaje ŭvahu na toje, što «Tytan» znajšli vielmi chutka tolki paśla taho, jak u čaćvier byŭ razhornuty dystancyjna kiravany padvodny aparat Victor 6000.
«OceanGate ihnaravali papiaredžańni»
Pa słovach Kemierana, u hibieli «Tytana», jaki spuściŭsia pahladzieć na trahiedyju «Tytanika», jość «žudasnaja ironija». Da hetaha režysior kazaŭ u televizijnych intervju, što kapitana «Tytanika» nieadnarazova papiaredžvali ab niebiaśpiecy ajśbierhaŭ, ale jon hetyja papiaredžańni praihnaravaŭ.
Ciapier, jak śćviardžaje režysior, historyja paŭtaryłasia, bo kampaniju OceanGate, jakoj naležaŭ «Tytan», papiaredžvali, što jana, jak havaryłasia ŭ adnoj kalektyŭnaj zajavie, «idzie pa šlachu da katastrofy».
«Ciapier u nas jość jašče adno krušeńnie, jakoje adbyłosia, na žal, z-za toj ža pamyłki — ihnaravańnia papiaredžańniaŭ», — skazaŭ Kemieran.
Halivudski režysior nie pieršy, chto kaža pra sumnievy ŭ biaśpiecy padvodnych ekśpiedycyj OceanGate. U pryvatnaści, u rasparadžeńni New York Times akazaŭsia list, napisany ŭ OceanGate Tavarystvam marskich technałohij (MTS), u im havorycca, što «ekśpierymienty kampanii mohuć pryvieści da niehatyŭnych nastupstvaŭ».
Pa słovach Džejmsa Kemierana, za apošni pieryjad z kampanii zvolnilisia niekalki supracoŭnikaŭ.
Z sudovych dakumientaŭ, źviazanych ź inšaj spravaj, vynikaje, što adzin z byłych supracoŭnikaŭ OceanGate papiaredžvaŭ pra patencyjnyja prablemy ź biaśpiekaj batyskafa jašče ŭ 2018 hodzie.
Taksama zakłapočanaść techničnymi kryterami OceanGate pabačyli ŭ adnoj sa spravazdač inśpiekcyi za podpisam dyrektara kampanii pa kantroli za ažyćciaŭleńniem marskich apieracyj Devida Łochrydža.
Džejms Kemieran viadomy svajoj luboŭju da padvodnaha śvietu. Jon nie tolki apuskaŭsia da miesca hibieli «Tytanika», ale i apuskaŭsia ŭ Maryjanskuju ŭpadzinu, na samy hłyboki punkt Suśvietnaha akijana. Značnaja častka dziejańnia jaho apošniaha filma «Avatar: šlach vady» (Avatar: The Way Of Water) adbyvajecca pad vadoj.
«Z 1 kastryčnika nichto pracavać nie budzie». U Biełarusi začyniajucca pryvatnyja damy sastarełych5
Kamientary