U vakolicach vioski Saki (Žabinkaŭski rajon Bresckaj vobłaści) pačalisia raboty pa inžyniernym abstalavańni ahniavych pazicyj, jakija ŭklučajuć budaŭnictva sistemy akopaŭ, tranšej i blindažoŭ.
Zychodziačy z maštabaŭ budaŭnictva, možna zrabić vysnovu, što pakul razmova idzie pra abstalavańnie apornaha punkta, jaki moža być elemientam umacavanaha rajona, vykazvaje mierkavańnie «Biełaruski Hajun».
Na budaŭnictvie apornaha punkta zadziejničana ŭ tym liku i ciažkaja budaŭničaja technika (ekskavatary, aŭtakrany). Dla abstalavańnia apornaha punkta płanujuć vykarystoŭvać «zuby drakona», aŭtamabilnyja šyny, doški, biarvieńnie, a taksama bietonnyja błoki. U pracach biaruć udzieł jak «hramadzianskija» budaŭniki, tak i biełaruskija vajskoŭcy.
Adlehłaść ad miesca budaŭnictva da horada Žabinka składaje 5 kiłamietraŭ, da miažy z Polščaj — 28 kiłamietraŭ, a da miažy z Ukrainaj — 47 kiłamietraŭ.
Raniej užo paviedamlałasia pra budaŭnictva ŭmacavanaha punkta kala pasiołka Kalinina ŭ Homielskim rajonie, što za 20 kiłamietraŭ ad miažy z Ukrainaj. Jon składaŭsia ź sistemy tranšej, akopaŭ, abstalavanych pazicyj dla viadzieńnia ahniu braniatechnikaj. Pry abstalavańni ŭmacavanaha rajona vykarystoŭvalisia i «zuby drakona».
Umacavany rajon kala Homiela budavaŭsia dla demanstracyi čynoŭnikam na štohadovym zbory «Vajennaja biaśpieka i abarona dziaržavy», jaki adbyŭsia 26 maja. Siarod inšaha padčas zboru ŭdzielniki navučalisia paradku arhanizacyi i viadzieńnia abarony nasielenych punktaŭ z aporaj na padrychtavanyja ŭmacavanyja rajony.
Niahledziačy na toje, što zbor skončyŭsia amal miesiac tamu, umacavany rajon (aficyjna — uzvodny aporny punkt) pad Homielem nie byŭ demantavany. Prapahandysty raniej pisali, što ciapier jaho zajmajuć biełaruskija vajskoŭcy.
Kamientary