Rasijski sałdat zdaŭsia ŭ pałon dronu paśla taho, jak dvoje jaho paranienych paplečnikaŭ skončyli žyćcio samahubstvam
Rasijski vajskoviec Rusłan Anicin zastaŭsia apošnim žyvym bajcom svajho padraździaleńnia na linii frontu ŭ Bachmucie paśla taho, jak ukrainskija bieśpiłotniki skinuli vybuchoŭku. Tady Anicin pačaŭ padavać sihnały ŭ kamieru drona, jaki ablataŭ pole boju, kab zdacca ŭkrainskim piłotam. Jamu ŭdałosia dabiehčy da ŭkrainskich pazicyj pad abstrełam svaich ža. Historyju rasijskaha pałonnaha raspaviadaje WSJ.
30-hadovy Rusłan Anicin, chudarlavy mužčyna z załysinami, vučyŭsia na vieterynara i nie čakaŭ, što apyniecca pasiarod vajny. Kali letaś 24 lutaha Rasija ŭvarvałasia va Ukrainu, jon pracavaŭ nahladčykam u papraŭčaj kałonii №3 niedaloka ad svajho rodnaha pasiołka Idryca. Siarod jaho tahačasnych paviedamleńniaŭ u sacyjalnych sietkach byli vyjavy rasijskaha ściaha i takija kamientary, jak «Davajcie pakarajem fašystaŭ». Praŭda, tady Anicin dumaŭ, što va Ukrainie budzie vajavać tolki prafiesijnaje vojska.
Situacyja źmianiłasia ŭ vieraśni, kali Rasija, paśla šeraha strat, pačała mabilizoŭvać mirnych žycharoŭ. Adnojčy mužčynu patelefanavali, kab jon źjaviŭsia ŭ miascovy vajenkamat. Tam jamu skazali sabrać doma rečy i prychodzić na nastupnuju ranicu, inakš pahražaje turma za ŭchileńnie. Anicin pajšoŭ, pakinuŭšy doma žonku i trochhadovuju dačku.
Mabilizavanym vydali abmundziravańnie i vintoŭki savieckich časoŭ. Pa słovach Anicina, za tydni trenirovak u ich było ŭsiaho dva šancy strelić sa zbroi. Nie prajšło miesiaca, jak mužčynu adpravili va Ukrainu.
Jaho padraździaleńnie zajmałasia achovaj i budavała ŭ Łuhansku ŭmacavanyja pazicyi. Niekalki miesiacaŭ bajoŭ nie było, ale ŭ pačatku maja kamandzir uzvoda skazaŭ, što jany nakiroŭvajucca ŭ Bachmut. Anicina i inšych navabrancaŭ advieźli na vajskovym hruzaviku ŭ les za niekalkich socień mietraŭ ad linii frontu.
Im było zahadana prasunucca ŭ sistemu tranšej, blizkich da ŭkrainskich pazicyj, schavacca i siadzieć tam. Kala hadziny nočy bajec «Vahniera» vyvieŭ ich da najbližejšaj tranšei, dzie jany adrazu ž trapili pad minamiotny abstreł, jaki doŭžyŭsia kala 40 chvilin.
Bajec «Vahniera» papiaredziŭ, što kali mužčyny admoviacca vykonvać zadańnie abo pačnuć adstupać, ich rasstralajuć.
Schavacca ad abstrełu ŭsiaho za 200 mietraŭ ad ukrainskich pazicyj było składana. Urešcie Anicin i jaho paplečnik Ivanoŭ znajšli nory ŭ ścienach tranšei. Jany zabralisia ŭ siaredzinu, kab schavacca.
Nievialikija bieśpiłotniki kitajskaj vytvorčaści z čatyrma prapielerami byli pastajannaj pahrozaj. Jany dasyłali ŭkrainskim vajskoŭcam žyvoje videa, jakoje karektavała zahady ŭkrainskaj artyleryi. Niekatoryja ź ich skidali razryŭnyja snarady prosta ŭ tranšeju.
Ranicaj Ivanoŭ i Anicin byli paranienyja vybucham, Ivanoŭ pačuvaŭsia asabliva błaha. Anicin znajšoŭ racyju i vyklikaŭ na dapamohu kamandziraŭ. Ale adkazu nie było.
Ivanoŭ vyrvaŭ zahvazdku z ručnoj hranaty i padarvaŭ jaje pobač z hałavoj. Treci čałaviek u ich hrupie byŭ ciažka paranieny. Pa słovach ukraincaŭ, paźniej jon zastreliŭsia z ułasnaj vintoŭki.
Anicin zastaŭsia adzin. Abstreły dronaŭ i minamiotaŭ praciahvalisia ŭvieś dzień. Kala 17-ci hadzin u Anicina ŭžo nie zastałosia sił, i jon dumaŭ, što «zastaniecca ŭ hetaj tranšei nazaŭždy».
Potym jamu pryjšła ŭ hałavu ideja zdacca dronu.
Jon ustaŭ bieź vintoŭki i machnuŭ rukoj, kab spynić ataku. Vysachły i zmučany, Anicin skryžavaŭ ruki nad hałavoj i, hledziačy ŭ kamieru drona, sčapiŭ dałoni razam, prosiačy spynić abstreł. Na videa, zapisanym dronami, vidać, jak jon pravodzić palcam pa šyi i kivaje hałavoj — heta jahony zaklik da ŭkraincaŭ nie zabivać jaho, kali jon zdasca.
Tvar Anicina byŭ pakazany na ekranie kamandnaha punkta 92-j miechanizavanaj bryhady Ukrainy za niekalki kiłamietraŭ ad jaho. Pałkoŭnik Pavieł Fiedasienka paraiŭsia ź inšymi aficerami i pieradaŭ pa racyi zahad piłotam pasprabavać uziać jaho žyvym.
Piłoty ŭkrainskich bieśpiłotnikaŭ spačatku pastavilisia da znakaŭ Anicina z padazreńniem, bo aścierahalisia pastki. Šturmavy bieśpiłotnik užo mieŭ namier zabić Anicina, sa słoŭ jahonaha piłota, 26-hadovaha ŭkrainca z pazyŭnym Baksior.
Ale, kali Baksior ubačyŭ Anicina, jaki maliŭ zachavać jamu žyćcio, to pryniaŭ rašeńnie pierapynić svaju misiju i kinuŭ hranatu niedaloka ad svajoj pazicyi.
Ukrainskija aficery na kamandnym punkcie skazali Baksioru vyjści na suviaź z rasijaninam.
Piłot dastaŭ markier sa svajoj aptečki i napisaŭ pa-rusku na pakunku ad charču: «Zdavajsia, idzi za dronam». Dla vahi jon napoŭniŭ pakunak ziamloj i prymacavaŭ jaho na dron, kab skinuć rasijskamu sałdatu.
Pračytaŭšy zapisku, Anicin žestami pakazaŭ, što zhadžajecca zdacca ŭ pałon.
Tady drony paviali jaho praz tranšei, prykryvajučy ad svaich ža — rasijan, jakija adkryli ahoń.
Mienš čym praz tydzień ukrainskija vojski zachapili tranšeju, dzie byŭ Anicin i inšyja navabrancy. Anicin u toj čas užo dzialiŭ kamieru ŭ śledčym izalatary ŭ Charkaŭskaj vobłaści z tryma inšymi pałonnymi.
U razmovie z WSJ 19 maja Anicin skazaŭ, što, niahledziačy na toje, što jamu pahražaje turma, kali jon vierniecca ŭ Rasiju ŭ ramkach abmienu pałonnymi, viarnucca — heta adzinaje, čaho jon ciapier choča. «Chaj mianie zakryvajuć. Ja chacieŭ by viarnucca dadomu, da svajoj siamji, i nikoli nie pieražyvać bolš taho, što ja bačyŭ tut», — kaža jon.
Čytajcie jašče:
Baskaŭ i Leps paabiacali hrošy za kožny padbity tank Leopard
Na Zachadzie paćviardžajuć pośpiechi kontrnastupleńnia Ukrainy i prahnazujuć dalejšy prahres
Što viadoma pra biełarusa Viktara Paviełku, jakoha ŭ Polščy padazrajuć u arhanizacyi napadaŭ na rasijskich apazicyjanieraŭ3
Kamientary