Biełarus znajšoŭ u syna płatnuju internet-padpisku i damohsia ad apieratara viartańnia hrošaj. Prytym navat z «padarunkam»

Koł-apieratary dvojčy admovili i adpravili ŭ ofis

Maksim — abanient MTS. Pasłuhami hetaha apieratara karystajucca i jaho svajaki. U svajho dziciaci jon i vyjaviŭ nietypovy «minus»: za taryf naležała płacić mienš. Jak vyjaviłasia, chłopčyk padpisaŭsia na muzyčny servis.

«U mianie jość prahrama, jakaja adsočvaje stan bałansaŭ u telefonach, — raskazvaje mužčyna. — U nas z synam adnolkavy taryf — i ja sa ździŭleńniem ubačyŭ, što ŭ jaho zapazyčanaść bolšaja. Vyrašyŭ zajści ŭ asabisty kabiniet i pahladzieć, ci niama tam jakoj-niebudź «levaj» padpiski, i ŭbačyŭ, što jana sapraŭdy jość».

Padpisčykam chłopčyk prabyŭ nie tak užo i doŭha — z 4 pa 26 krasavika. Za hety čas z bałansu śpisali 7,36 rubla. Dakładna nieviadoma, jak dzicia padpisałasia na servis.

«Ciažka skazać. Na forumie pračytaŭ, što padobnyja padpiski aktyvavalisia navat u tych, chto staviŭ sim-kartu ŭ roŭtary — navat fizična niemahčyma było samomu padpisacca. Ale, pakolki syn usio ž taki niepaŭnaletni, mahu vykazać zdahadku, što jon zahruziŭ hulniu, jakaja vyklikaje rekłamu — a tam, nie razabraŭšysia, možna, nacisnuŭšy niejkuju knopku, aktyvavać padpisku. Heta małavierahodna, ale mahčyma», — razvažaje hieroj publikacyi.

Pierš za ŭsio Maksim adklučyŭ padpisku, a paśla taho zadaŭsia pytańniem: ci možna zapatrabavać viarnuć hrošy za ŭžo vydalenuju pasłuhu?

Pačytaŭšy parady karystalnikaŭ adnaho z forumaŭ, mužčyna vyrašyŭ pasprabavać ščaścia. Ale razmovy z koł-apieratarami MTS prablemu nie vyrašyli. «Jany skazali, što heta nie ich śfiera absłuhoŭvańnia. Telefanavaŭ dvojčy — i dva razy kazali pra toje, što tolki naviedvańnie ofisa i vočnaja padača zajavy mohuć vyrašyć pytańnie».

Viarnuli navat bolš

Praź niekalki tydniaŭ Maksim, uziaŭšy pašpart, vybraŭsia ŭ ofis kampanii. Mužčynu nie pryjšłosia adstojvać svaju racyju: hrošy jamu viarnuli biez sprečak. «Mianie sustreli absalutna narmalna. Prapanavali błank i nijakim čynam nie sprabavali pierakanać. Adzinaje, spytalisia, ci nie karystajecca hetym numaram dzicia. Ja skłaŭ zajavu pa šabłonie i addaŭ jaho supracoŭniku».

U vyniku dla numara zabłakavali mahčymaść dadavańnia internet-padpisak, a na bałans viarnuli hrošy za «karystańnie» muzyčnym servisam.

«Cikava, što pa vypiscy suma była 7,3 rubla, a viarnuli 9,20. Mahčyma, heta ź niejkimi padatkami — ja ŭžo nie raźbiraŭsia», — uspomniŭ Maksim pra niečakany «padarunak».

Pierachodzić da inšaha apieratara mužčyna nie płanuje: MTS karystajucca jaho rodnyja i mnohija siabry. Urešcie, takaja ž prablema moža ŭźniknuć i ŭ abanienta inšaj sietki, tamu sensu ŭ takich źmienach Maksim nie bačyć.

Ci staŭ jon aściarožniejšym paśla hetaj historyi. «Ja sam ajcišnik, tamu razumieju, dzie i jak moža adbycca padobnaja situacyja. U mianie padobnaja padzieja vielmi małavierahodnaja. Bolš za toje, nieadnarazova dapamahaŭ ludziam z padobnymi pytańniami: baćku siabra niekalki miesiacaŭ karystańnia padpiskaj kaštavali amal 90 rubloŭ dadatkovych vydatkaŭ», — padsumoŭvaje hieroj.

• 7
• 0
• 0
• 1
• 0
• 1
• 2
• 0