Žurnalista Siarhieja Sacuka pieraviali ŭ kałonii «na lohkuju pracu». U jaho surjoznyja zachvorvańni
Brat źniavolenaha žurnalista, raskazaŭ «Narodnaj Voli» pra apošnija naviny ad asudžanaha na vosiem hadoŭ brata.
Siarhieja Sacuka zatrymali 8 śniežnia 2021 hoda. Jaho abvinavacili pa troch artykułach Kryminalnaha kodeksa: «Atrymańnie chabaru» (art. 430), «Raspalvańnie varožaści» (art. 130), «Pieravyšeńnie ŭłady albo słužbovych paŭnamoctvaŭ» (art. 426).
U vyniku Siarhiej Sacuk asudžany na 8 hadoŭ źniavoleńnia z adbyćciom pakarańnia ŭ kałonii ŭzmocnienaha režymu.
Taksama žurnalistu pryznačyli štraf u pamiery 500 bazavych vieličyń (16 tysiač biełaruskich rubloŭ). Jon pazbaŭleny prava zajmać pasady, źviazanyja z vykanańniem arhanizacyjna-rasparadčych i administracyjna-haspadarčych abaviazkaŭ, na 5 hadoŭ. Akramia taho, sud vyrašyŭ spahnać z abvinavačanaha ŭ dachod dziaržavy hrašovuju sumu ŭ pamiery 12 384 biełaruskich rubloŭ.
Adbyvaje pakarańnie Siarhiej Sacuk u kałonii №15 h. Mahilova…
— Adna z apošnich navin — brata pieraviali na lohkuju pracu, pra heta jon paviedamiŭ u liście, — kaža Alaksandr Sacuk. — U Siarhieja jość surjoznyja zachvorvańni, ale, tym nie mienš, spačatku jaho pryznačyli na ciažkuju pracu, jak absalutna zdarovaha čałavieka. Ciapier ja dakładna nie viedaju, jakuju rabotu vykonvaje Siarhiej, ale ŭsio-taki nie mietałałom ciahaje.
Paviedamlaje taksama, što apošnim časam «krychu lahčej stała z sercam», chacia prystupy ŭsio roŭna zdarajucca praktyčna kožny dzień.
— Jon znachodzicca pad nazirańniem turemnych miedykaŭ?
— Naviedvajecca da doktara, toj vypisvaje recepty na peŭnyja leki.
— Ci ŭsie listy dachodziać da Siarhieja?
— Z maci i žonkaj u ich pierapiska narmalnaja, ale voś nie viedaju, ci dachodziać maje pasłańni.
— Ci mahčyma spatkańnie ź blizkimi?
— U hetym miesiacy žonka Siarhieja raźličvaje na doŭhaterminovaje spatkańnie, kali ničoha nie źmienicca. Jano zapłanavanaje i, budziem spadziavacca, adbudziecca. A voś telefonny zvanok čamuści admianili, nie dali bratu patelefanavać na hetym tydni.
— Sud pryznačyŭ Siarhieju vialikija hrašovyja štrafy…
— Hrošy ŭžo sabrali, i štraf całkam apłačany.
Padtrymajcie Siarhieja: PK № 15. 213105, h. Mahiloŭ, p/a Viejna, Słaŭharadskaja šaša 183, Siarhiej Viktaravič Sacuk
«Siarhiej» nie adzin. Voś jak KDB prapanuje zarabić na sačeńni za biełaruskimi emihrantami3
Kamientary