Duda: Pucin jašče nie prajhraŭ nivodnaj vajny. Nie varta śmiajacca z tankaŭ 1960-ch
Prezident Polščy Andžej Duda pieraściaroh ad paśpiešnych zajaŭ ab projhryšy Rasii ŭ raźviazanaj joju vajnie suprać Ukrainy.
Pra heta Duda skazaŭ u razmovie z Ałmaram Łaturam, hienieralnym dyrektaram Dow Jones, vydaŭcom The Wall Street Journal, paviedamlaje «Jeŭrapiejskaja praŭda».
«Siońnia kažuć, što Uładzimir Pucin prajhraŭ vajnu, a jahonaja paraza palahaje ŭ tym, što Finlandyja ŭstupiła ŭ NATO, choć ciaham mnohich hadoŭ finski narod vahaŭsia, ci varta jamu admaŭlacca ad niejtralitetu. Panovie, Uładzimir Pucin nie prajhraŭ nivodnaj vajny», — zajaviŭ prezident Polščy.
Ale jon vykazaŭ nadzieju, što Pucin prajhraje vajnu. Adnak, adznačyŭ Duda, «ciapier my majem situacyju, kali rasijski katok ciśnie Ukrainu, sotni ludziej hinuć na froncie štodnia, pry hetym rasijan bolš za 100 miljonaŭ, a ŭkraincaŭ mienš za 40 miljonaŭ».
«Užo adna hetaja roźnica pakazvaje, chto tut maje pieravahu. Dla rasijan čałaviečaje žyćcio ničoha nie značyć, dla ŭkraincaŭ kožnaje žyćcio — na vahu zołata. Heta roznyja kultury. Rasija — jadziernaja zvyšdziaržava, u jaje hihanckija zapasy zbroi, i što my śmiajomsia z taho, što jana vyvozić tanki z 1960-ch hadoŭ, kali kožny tank važyć 50—60 ton. Kali jon najedzie, jon razdušyć niezaležna ad taho, sučasny jon ci nie», — skazaŭ polski prezident.
Pucin prajhraje vajnu, kali rasijskaje vojska budzie vycisnuta za miežy mižnarodna pryznanych miežaŭ Ukrainy, pierakanany Duda.
«Vajna praciahvajecca, Rasija ŭsio bolš mabilizujecca, rasijskaja ekanomika pierachodzić na vajskovyja rejki. Nie sumniavajciesia, što jany zdolnyja z dapamohaj prapahandy skazać ludziam, što jany pavinny zaciahnuć pajasy, i navat kali jany hałodnyja, jany pavinny hanarycca, bo Rasija — vialikaja», — dadaŭ prezident Polščy.
Kamientary
Usie bačyli jak zichacieli piatki pucincaŭ z-pad Kijeva, Charkava, Chiersona.