Hruzinskaja avijakampanija choča zapuścić tranzitnyja rejsy dla rasijan u Jeŭropu
Georgian Airways zapuścić dla rasijan tranzitnyja rejsy praz Tbilisi ŭ Jeŭropu, raspavioŭ RTVI zasnavalnik avijakampanii Tamaz Hajašvili. U płanach piać jeŭrapiejskich haradoŭ: Miłan, Paryž, Viena, Łarnaka, Sałoniki.
«Pačniom z 15 červienia. Pahladzim, jak pojdzie hetaja sprava. Ale dumajem, što budzie dastatkovy popyt na hetych maršrutach. Praz Tbilisi budzie zručniej i chutčej, čym na inšych kirunkach», — skazaŭ Tamaz Hajašvili.
Zasnavalnik avijakampanii dadaŭ, što, zhodna z prahnozami Georgian Airways, pasažyrski patok pamiž Rasijaj i Hruzijaj pastupova adnovicca.
«Naturalna, budziem zachoŭvać pavietranyja znosiny z Rasijaj. Ničoha z hetym nie budzie. Urad Hruzii vielmi ciopła hetaje rašeńnie sustreŭ. Daj boh, kab jany nikoli bolš nie pieraryvalisia», — dadaŭ jon.
Zabarona na paloty rasijskich avijakampanij u Hruziju dziejničała z 2019 hoda. Jaje źniali 15 maja 2023 hoda. U toj ža dzień u Rasii admianili vizavy režym dla hramadzian Hruzii.
Hetyja padziei vyklikali pratesty apazicyi ŭ Tbilisi, a prezident Hruzii Sałome Zurabišvili abviaściła bajkot Georgian Airways praz adnaŭleńnie palotaŭ u Maskvu.
Hajašvili paćvierdziŭ RTVI, što avijakampanija z svajho boku admaŭlajecca absłuhoŭvać Zurabišvili. «Bolš nie budzie z nami lotać. Kampanija pryniała takoje rašeńnie, tak i budzie dalej», — skazaŭ jon.
Zasnavalnik Georgian Airways pryznaŭ, što popyt pakul raście nie vielmi. «Dumaju, budzie patrebny čas, rekłama, kab ludzi viedali, što takoje isnuje, i tady, ja dumaju, što pojduć pasažyry», — rastłumačyŭ Haijašvili. Jon dadaŭ, što patok budzie pastupova narastać, tamu što «ciapier razumiejuć, što adnavilisia pramyja rejsy, i ŭsie pavoli pierachodziać na pramyja rejsy».
Biełaruskaja błohierka pracavała na rasijskaj apazicyjnaj fabrycy botaŭ, a paśla źliła dakumienty?45
Kamientary