Apublikavany prajekt zakona pra narodnaje apałčeńnie. Raskazvajem, što ŭ im

Narodnaje apałčeńnie, pišacca ŭ prajekcie zakona, budzie stvaracca ź liku dobraachvotnikaŭ, jakich uzbrojać.

Asnoŭnaja jaho zadača — sadziejničać terytaryjalnym orhanam unutranych spraŭ u zabieśpiačeńni vajennaha stanovišča, abaronie ŭłasnaści ad złačynnych i inšych supraćpraŭnych zamachaŭ.

Miascovymi savietami abarony narodnaje apałčeńnie moža pryciahvacca i dla inšych zadač pa zabieśpiačeńni vajennaha stanovišča.

Zabiaśpiečvacca hetaje apałčeńnie budzie za košt miascovych biudžetaŭ, a taksama achviaravańniaŭ.

Kolkaść apałčencaŭ u kožnym rajonie budzie zaležać ad kolkaści achvotnych i zadač, jakija im staviać.

Pry admienie vajennaha stanovišča apałčeńnie rasfarmoŭvajuć.

Atrady kamplektujucca dobraachvotnikami, «zdolnymi pa svaich asabistych jakaściach, stanie zdaroŭja vykonvać zadačy, praduhledžanyja hetym zakonam».

Udzieł u apałčeńni nie vyzvalaje ad pryzyvu na vajennuju słužbu pa mabilizacyi i ad pracy.

Ale, pa rašeńni miascovych orhanaŭ najmalnik abaviazany vyzvalać rabotnika ad pracy dla ŭdziełu ŭ dziejnaści narodnaha apałčeńnia. Pry hetym za rabotnikam zachoŭvajecca miesca pracy, pasada słužačaha i siaredni zarobak.

Kaho nie mohuć zaličyć u apałčency?

• tych, chto adbyvaje aryšt, adpraŭleny na chimiju z nakiravańniem ci pazbaŭleny voli;
• tych, chto ŭ SIZA ci pad chatnim aryštam;
• tych, kaho vyrašana interniravać;
• ludziej, jakija pryznanyja niedziejazdolnymi ci abmiežavana dziejazdolnymi;
• tych, chto maje zachvorvańni ci fizičnyja niedachopy, pry najaŭnaści jakich supraćpakazana vałodać zbrojaj.

Apałčency raźmiaščajucca pa miescy žycharstva.

Ahulnaje kiraŭnictva apałčeńniem daručać miascovym savietam abarony. A niepasredna kiravać atradami buduć terytaryjalnyja orhany ŭnutranych spraŭ.

Rašeńnie ad farmavańni apałčeńnia budzie prymać Łukašenka.

Što zmoža apałčeniec?

• prymianiać fizičnuju siłu, vykarystoŭvać zbroju na ŭmovach i ŭ miežach, ustanoŭlenych zakonami dla vajennasłužačych, pryciahnutych da zabieśpiačeńnia vajennaha stanovišča;

• zatrymlivać asob, jakija ŭčynili złačynstva abo administracyjnaje pravaparušeńnie, kab pieradać siłavikam;

• patrabavać ad hramadzian zachavańnia hramadskaha paradku, abmiežavańniaŭ i zabaron, uviedzienych dla zabieśpiačeńnia vajennaha stanovišča, spynieńnia pravaparušeńniaŭ abo dziejańniaŭ, jakija pieraškadžajuć vykanańniu im zadač;

• sadziejničać terytaryjalnym orhanam unutranych spraŭ pry abmiežavańni ruchu transpartu, nadhladzie aŭto, propusku transpartu, praviercy dakumientaŭ žycharoŭ, nadhladzie ich asabistych rečaŭ i kanfiskacyi (kali rečy mohuć źjaŭlacca pryładaj abo niepasrednym abjektam pravaparušeńnia), ahladać žyllo inšych ludziej.

Dobraachvotnikam taksama mohuć być nadadzienyja inšyja pravy, pišacca ŭ prajekcie zakona.

Siarod abaviazkaŭ apałčencaŭ:

• zabiaśpiečvać abaronu terytoryi, abjekta i nasielnictva ad supraćpraŭnych zamachaŭ;
• udzielničać u zbory i pieradačy infarmacyi orhanam vajennaha kiravańnia Uzbrojenych sił Respubliki Biełaruś i terytaryjalnym orhanam unutranych spraŭ ab dziejańniach vojskaŭ praciŭnika, vyjaŭleńni asob, jakija sadziejničajuć siłam praciŭnika;
• akazvać pieršuju dapamohu hramadzianam, jakija paciarpieli ŭ vyniku pravaparušeńniaŭ abo niaščasnych vypadkaŭ, a taksama jakija znachodziacca ŭ biezdapamožnym ci inšym stanie, jaki pradstaŭlaje pahrozu dla žyćcia i zdaroŭja čałavieka;
• sadziejničać u avaryjna-vyratavalnych i inšych nieadkładnych rabotach;
• udzielničać u vykanańni rabot abaronnaha charaktaru, likvidacyi nastupstvaŭ prymianieńnia zbroi, adnaŭleńni paškodžanych (razburanych) abjektaŭ ekanomiki, sistem žyćciezabieśpiačeńnia i vajennych abjektaŭ, a taksama ŭ likvidacyi nastupstvaŭ nadzvyčajnych situacyj i pracy arhanizacyj, jakija padlahajuć pieravodu na pracu va ŭmovach vajennaha času.

Zakon pakul nie pryniaty.

Raniej ministr abarony Viktar Chrenin raskazvaŭ, što pa jaho raźlikach u narodnaje apałčeńnie moža ŭvajści 100-150 tysiač čałaviek.

• 1
• 0
• 23
• 5
• 1
• 0
• 6
• 0