Hramadstva2626

Palina Šuba viartajecca ŭ abojmu

U vuzkaje koła ludziej, jakija atačajuć Alaksandra Łukašenku, viarnuŭsia znajomy tvar. Viadučaja BT Palina Šuba na niejki čas źnikała z publičnaha pola, ale padčas subotnika ŭ Chatyni źjaviłasia ŭ kampanii Łukašenki. U kancy minułaha hoda jana paśla nievialikaha pierapynku viarnułasia i ŭ efir. Zhadvajem šlach Paliny Šuby i raskazvajem novyja detali, jakija stali viadomyja dziakujučy «Kibierpartyzanam».

Šuba — Mielpamiena (źleva)

Pryhažunia z rajcentra

Palinie Šubie 34 hady. Rodam jana sa Starych Daroh sa zvyčajnaj siamji: baćka ŭznačalvaŭ rajonnyja elektrasietki, maci pracavała ŭ Centry sacyjalnaha absłuhoŭvańnia nasielnictva.

Z Łukašenkam žančyna znajomaja z 2001-ha. Zdaryłasia heta vypadkova — Łukašenka pryjazdžaŭ u Staryja Darohi, a Šubie, jak miascovaj vydatnicy i pryhažuni, davieryli ŭračysta ŭručyć jamu bukiet kvietak.

U 2003-m hodzie madelnaja škoła «Tamara», jakoj kiravała adna ź pieršych biełaruskich madelaŭ Taćciana Hančarova, ładziła konkurs «Tvar novaha stahodździa», šukajučy tak novych madelaŭ. Dasłała svajo fota tudy i 15-hadovaja Palina — jaho adrazu nadrukavali ŭ «Sovietskaj Biełoruśsii», a dziaŭčynku ŭziali na aficyjnuju pracu ŭ «Tamaru».

Fota: tamaramodels.com

Ale i vučobu Palina Šuba nie kinuła, skončyŭšy škołu z załatym miedalom. Paśla ŭ 2006-m pastupiła ŭ Biełaruski dziaržaŭny technałahičny ŭniviersitet na śpiecyjalnaść «ekanamist-markietołah u drevaapracoŭčaj halinie».

«Mis Biełaruś — 2008» i skulptura Šuby

Užo padčas vučoby Šuba pačała ŭdzielničać u konkursach pryhažości. U 2007-m jana pajšła na adbor konkursu «Supiermadel śvietu», ale nie trapiła dalej. Atrymała pryz hladackich simpatyj.

A ŭ 2008-m Šuba była ŭ liku 12 finalistak «Mis Biełaruś». «Paśla finału ŭsie ŭdzielnicy nakiravalisia na bankiet u haścinicu «Płanieta». Prezident taksama prysutničaŭ», — raskazvała maci Paliny žurnalistam. 

Šuba padčas defile. Fota: gazetaby.com

A ŭviesnu 2009-ha, paśla adkryćcia abnoŭlenaha Teatra opiery i baleta, stała viadoma, što adna sa skulptur na fasadzie źleplenaja z Paliny Šuby. 

«Na pošuk naturščyc ja adpraviŭsia ŭ madelnaje ahienctva, dzie što ni dziaŭčyna, to patencyjnaja muza. Podyum litaralna asieŭ ad napłyvu pretendentak, ale kali pradefilavała Palina, usie patuchli», — raskazvaŭ haziecie «Respublika» skulptar Hienadź Burałkin, jaki stvaraŭ statui hreckaj muzy trahiedyi Mielpamieny (jaje lapili z Šuby) i muzy ŭračystych himnaŭ i sielskaj haspadarki Palihimnii.

Palina Šuba ŭ vobrazie hreckaj muzy trahiedyi Mielpamieny — źleva 

Tancy z Łukašenkam i pačatak karjery

U 2011 hodzie na vypusknym bali Šuba stancavała z Łukašenkam — nieviadoma dakładna, čamu vybar upaŭ na jaje, ale chadzili čutki, što praź ich sustreču paśla «Mis Biełaruś — 2008».

Z hetaha momantu jaje karjera pajšła ŭharu. «Ja zaŭsiody maryła stać žurnalistkaj», — pryznavałasia Šuba. Nieŭzabavie jaje biaruć viadoŭcaj na BT biez profilnaj adukacyi.

Alaksandr Łukašenka i Palina Šuba na respublikanskim bali — 2011. Skrynšot videa BiełTA

A padčas vizitu žurnalistaŭ Tut.by da maci Haliny Łukašenka (aficyjnaj žonki Łukašenki i maci jahonych starejšych dziaciej) i cieščy Łukašenki Aleny Žaŭniarovič u 2014-m hodzie, stała jasna, nakolki Šuba stała blizkaj da samoha Łukašenki. Na fota z alboma žančyny Šuba staić pobač ź im u kampanii jahonaha starejšaha syna i prybližanych biznesoŭcaŭ — Ciacieryna i Šakucina.

Na zdymku źleva naprava: biznesoviec i były kiraŭnik Fiederacyi tenisa Biełarusi Siarhiej Ciacieryn, Viktar Łukašenka, śpiavačka Alena Łanskaja, Alaksandr Łukašenka, Palina Šuba, biznesoviec i jašče adzin były kiraŭnik Fiederacyi tenisa Alaksandr Šakucin, u piarednim šerahu — Alena Žaŭniarovič i asabisty doktar Łukašenki Śviatłana Kanašenka. Krynica: Tut.by

Častaja spadarožnica Łukašenki

Zhodna z bazaj pierasiačeńniaŭ miažy, źviestki ź jakoj «Našaj Nivie» pieradali «Kibierpartyzany», upieršyniu Šuba supravadžała Łukašenku ŭ Kijeŭ z 1 pa 2 lipienia 2012 hoda. Tam prachodziŭ finał Jeŭra-2012 i siarod zornych haściej prysutničali šmatlikija kiraŭniki dziaržaŭ. Taksama Łukašenka sustrakaŭsia tam ź Janukovičam.

Šuba zastałasia za kadram, ale ŭ Kijevie była, vandroŭka aformlenaja jak «słužbovaja».

Łukašenka z Kolem u centry, źleva ad ich — Saakašvili, tahačasny prezident Hruzii, sprava — prezident Armienii Sierž Sarhsian i prezident Tadžykistana Emamali Rachmon. Fota: UNIAN

Šuba taksama supravadžała Łukašenku padčas pajezdki ŭ Kitaj z 15 pa 17 lipienia 2013-ha i ŭ Astanu z 28 pa 29 maja 2014-ha — akurat tam była padpisanaja damova pra stvareńnie JEAES.

Na čempijanacie śvietu pa chakiei, jaki prachodziŭ u Minsku ŭ 2014 hodzie, Šuba źjaviłasia ŭ kampanii Łukašenki publična — i paśla hetaha adbyŭsia vybuch cikaŭnaści da jaje piersony. Pra jaje pytałasia navat Sabčak u vialikim pieradvybarčym intervju, i Łukašenka adkazaŭ, što «viedaje jaje z dvanaccaci hadoŭ», to-bok sam adličyŭ čas znajomstva ad sustrečy ŭ Starych Darohach.

U 2015-m joj daduć premiju «Televiaršynia» jak najlepšaj viadoŭcy infarmacyjnych prahram 2014 hoda.

Alaksandr Łukašenka i Palina Šuba na matčy čempijanatu śvietu pa chakiei ŭ 2014 hodzie. Skrynšot videa BT

Nastupnaje ich sumiesnaje źjaŭleńnie na publicy adbyłosia na finale konkursu pryhažości «Mis Biełaruś — 2016». Na hetym fota Šuba siadzić sprava ad Łukašenki.

«Mis Biełaruś — 2016». Skrynšot videa ANT

Jana lotała ŭ Abjadnanyja Arabskija Emiraty ŭ kampanii Łukašenki ažno trojčy: 24 kastryčnika 2014-ha, 25 kastryčnika 2017-ha i 31 kastryčnika 2019-ha. Hetyja vizity nazyvali «zakamuflavanym adpačynkam Łukašenki», bo jon amal ni z kim tam nie sustrakaŭsia, ale šmat jeździŭ i chvaliŭ miascovyja słavutaści i architekturu.

Łukašenka ŭ AAE ŭ 2019 hodzie. Fota: BiełTA

Pra častku pajezdak Paliny Šuby infarmacyja ŭ bazach niapoŭnaja — niama punktu naznačeńnia abo numara rejsa. Ale admietna, da prykładu, što jana vylecieła ź Minska kudyści napiaredadni «inaŭhuracyi» Łukašenki, jakaja adbyłasia 23 vieraśnia 2020 hoda, i viarnułasia ŭ Minsk tolki 29-ha, a taksama lotała kudyści padčas vizitu aficyjnaj delehacyi ŭ Katar u 2015-m.

Ahułam ža Šuba z 2007 hoda vyjazdžała za miažu bolš za 50 razoŭ.

Pa źviestkach z miedyja, Palina Šuba niadoŭhi čas pracavała ŭ słužbie pratakoła MZS Biełarusi, ale dakładnych źviestak pra heta my nie znajšli: u bazie «Kibierpartyzanaŭ» pra miescy pracy pa bazie Fondu sacyjalnaj achovy nasielnictva takich źviestak niama. Taksama ŭ bazie niama paćviardžeńniaŭ taho, što Šuba jeździła ŭ Vieniesuełu razam z Łukašenkam — pra heta raniej nieadnarazova paviedamlali miedyja.

Tajamnica słužbovaha pašparta

«Kibierpartyzany» paviedamili «Našaj Nivie», što Palina Šuba maje słužbovy pašpart pad numaram SP0014391 i pieryjadyčna karystałasia im dla vyjezdaŭ za miažu padčas padarožžaŭ z Łukašenkam.

U čym admietnaść takoha pašparta i jak jaho mahła atrymać Šuba? Kiraŭnik NAU i pradstaŭnik Abjadnanaha pierachodnaha kabinieta Pavieł Łatuška, jaki mieŭ bolš za dvaccać hadoŭ dośviedu na dziaržsłužbie, kaža, što 

słužbovy pašpart vydajuć asobnym katehoryjam hramadzian, vyznačaje jakija Łukašenka.

«I pieradusim dziaržsłužačym. Naprykład, ministr maje dypłamatyčny pašpart, jak i inšyja čalcy ŭrada, a namieśniki ministra abo niejkija načalniki adździełaŭ mohuć atrymać słužbovy paspart, kali jeduć u słužbovuju kamandziroŭku.

Taksama jany vydajucca supracoŭnikam ambasad, kali jany nie majuć dypłamatyčnaha statusu, naprykład, achoŭnikam, kiroŭcam i buchhałtaram. Heta daje im mahčymaść akredytavacca pry ambasadzie i atrymać funkcyjanalny imunitet, to-bok abaronu ad adkaznaści pierad zakonam krainy, u jakoj jany znachodziacca, ale tolki padčas vykanańnia svaich słužbovych abaviazkaŭ, — kaža Łatuška.

Słužbovy pašpart. Fota: belarusfacts.info

— Taksama słužbovy pašpart daje mahčymaść znachodžańnia ŭ niekatorych krainach bieź vizy. Da prykładu, heta Balivija abo Brazilija, a siarod krain ES — Vienhryja.

Ale słužbovy pašpart, viadoma, nie daje takich pravoŭ za miažoj, jak dypłamatyčny pašpart i status dypłamatyčnaha ahienta».

Takim čynam, Palina Šuba mahła atrymać taki pašpart tolki na asabisty zahad Łukašenki.

Ščaślivy 2019-y

Uletku 2019 hoda, za paru miesiacaŭ da sumiesnaha vyletu ŭ AAE, Palina Šuba znoŭku zakružyłasia ŭ valsie z Łukašenkam. Bal prachodziŭ u Pałacy Respubliki i za hod da hetaha spadarožnicaj Łukašenki była Maryja Vasilevič.

A niezadoŭha da apošniaj pajezdki ŭ AAE Palinie Šubie praź firmu Siarhieja Ciacieryna dorać aŭtamabil marki «Mini» koštam 26 tysiač jeŭra, jak vyśvietliŭ «Biełaruski rasśledavalnicki centr».

Na hetym aŭto jana dvojčy vyjechała ŭ Polšču na pačatku 2020-ha. Kamientavać toje, za jakija zasłuhi joj padaryli hetaje aŭto, žurnalistam jana admoviłasia.

Mini Cooper 2019 čyrvonaha koleru — taki ž praź Siarhieja Ciacieryna padaravali Palinie Šubie. Fota: Wikimedia Commons

Nieŭzabavie paśla pajezdki ŭ AAE i darunku aŭto Palinu Šubu pavysili na Biełaruskim telebačańni da namieśnicy kiraŭnika adździeła vypusku navin. Jana radziej stała źjaŭlacca ŭ efiry i bolš zaniałasia administracyjnaj pracaj i ŭ vyniku viadzie tolki pieradaču «Hałoŭny efir» raz na miesiac.

Muž, dvojnia i Chatyń

Zamuž Palina Šuba vyjšła ŭ žniŭni 2015-ha. Jaje abrańnikam staŭ vypusknik Akademii kiravańnia 44-hadovy Valeryj Šapčyc. Z admietnaha — jon słužyŭ u čaści śpiecnaza №3214. A taksama pracavaŭ na administracyjnaj pasadzie ŭ chakiejnym kłubie «Dynama Minsk».

Baćka Valeryja, taksama Valeryj, u minułym bujny biznesoviec i były dyrektar kampanii «Bakielit», jakaja zajmałasia stvareńniem supraćpažarnaha ryštunku. Dy i sam Valeryj Valerjevič niejki čas byŭ namieśnikam dyrektara kampanii.

Valeryj Šapčyc padčas słužby ŭ čaści śpiecnaza 3214. Fota: jahonaja staronka «UKantakcie»

Praŭda, pa źviestkach, jakija dali nam «Kibierpartyzany», baćka i syn, vyhladaje, pasvarylisia — prynamsi, adzin padaŭ na druhoha ŭ sud. Nieviadoma, u čym byŭ kanflikt i čym jon skončyŭsia. Ciapier Valeryj Valerjevič Šapčyc uznačalvaje pryvatnuju transpartnuju firmu, a jahony baćka paśla bankructva «Bakielita» praciahvaje dziejnaść jak IP.

U mai 2022 hoda Palina Šuba naradziła dvojniu i syšła z efiru. Rolik ź joj i dziećmi z navahodnim vinšavańniem sioleta pakazvali ŭ efiry BT.

Palina Šuba ź dziećmi. Skryn videa BT

Viartańnie ŭ efir adbyłosia ŭ kancy śniežnia 2022-ha. A ŭžo ŭ krasaviku 2023-ha jana razam z Łukašenkam sadžała drevy na subotniku ŭ Chatyni. Šuba nie stajała ŭ ahulnych šerahach «pracoŭnych», i vyhladała, što dziaržSMI mieli ŭkazańnie nie akcentavać jaje tvar.

Palina Šuba, Alaksandr i Mikałaj Łukašenki sadžajuć dreva na respublikanskim subotniku ŭ Chatyni 22 krasavika 2023 hoda. Fota: sajt Łukašenki

Tak što Palina Šuba, zdajecca, z «abojmy» vychodzić nie płanuje.

«Naša Niva» — bastyjon biełaruščyny

PADTRYMAĆ

Kamientary26

  • mikola
    13.05.2023
    vos sto byvae kali -*iz grazi u knjazi*.......*kampanija* adnak-vjasiola......
  • Žieleznyj Drovosiek
    13.05.2023
    Omierzitielnaja hriaź,kotoraja soprovoždajet kołchoźnika v jeho kołchoznom variantie hiedonizma,primitivnom i bieskoniečno tupom,vojdiot vo vsie učiebniki istorii, i biezusłovno,navsiehda lažiet piatnom na vsiu jeho siemju. Ispolzovať słužiebnoje połožienije dla udovletvorienija svojej pochoti—prosto tupoje i primitivnoje dniŝie. On dažie nie dohadyvajetsia —NASKOLKO biespłatno ničieho nie byvajet: kinieš szadi—podymieš śpieriedi.
    Odno słovo —kałchoźnik.
  • BLR
    13.05.2023
    Viedać by jašče što heta futra takoje i čamu pra jaho treba ŭzhadvać, dy j tak šmat pisać?

«50 hadzin u apošniaj dyktatury Jeŭropy». U Biełaruś pryjechali miehapapularnyja błohiery z ZŠA i Kanady — voś navošta7

«50 hadzin u apošniaj dyktatury Jeŭropy». U Biełaruś pryjechali miehapapularnyja błohiery z ZŠA i Kanady — voś navošta

Usie naviny →
Usie naviny

Borys Džonsan raskazaŭ, u čym źmiest mirnaha płana Donalda Trampa pa Ukrainie7

Łukašenka: My «kinuli jakar» u Rasii i Kitai, ale treba znachodzić šlachi supracoŭnictva i ź ES4

«U Biełaruś Kryhier zajechaŭ turystam». Źjavilisia novyja padrabiaznaści pra niemca, prysudžanaha da rasstrełu12

Namieśnik kiraŭnika MZS Polščy nazvaŭ try ŭmovy narmalizacyi adnosin ź Minskam9

Za «abrazu pradstaŭnika ŭłady» mastačcy z Połacka pryznačyli prymusovaje lačeńnie. Jana viarnułasia z Polščy3

«Ź lohkim vietram» i «Narešcie, bro» — što pišuć Bajdenu ŭ tvitary

Stryžak raskazaŭ, ci ŭziaŭ by miljon dalaraŭ ad Čyža6

U Biełarusi źjavicca nacyjanalny videachostynh — vidieo.bieł 10

Džej Ło pierastała nasić zaručalny piarścionak. Kaniec historyi kachańnia

bolš čytanych navin
bolš łajkanych navin

«50 hadzin u apošniaj dyktatury Jeŭropy». U Biełaruś pryjechali miehapapularnyja błohiery z ZŠA i Kanady — voś navošta7

«50 hadzin u apošniaj dyktatury Jeŭropy». U Biełaruś pryjechali miehapapularnyja błohiery z ZŠA i Kanady — voś navošta

Hałoŭnaje
Usie naviny →