Žychara Mahilova asudzili na piać hadoŭ za pieradaču danych siłavikoŭ «Čornaj knizie Biełarusi»
Homielski abłasny sud 13 krasavika zaviaršyŭ razhlad kryminalnaj spravy 34-hadovaha žychara Mahilova Uładzisłava Kupryjanava. Jaho abvinavacili ŭ raspalvańni rasavaj, nacyjanalnaj, relihijnaj ci inšaj sacyjalnaj varožaści, ździejśnienaj hrupaj asob pavodle č. 3 art 130 Kryminalnaha kodeksa, piša «Viasna».
Sudovy praces pačaŭsia jašče 24 lutaha, spravu vioŭ u zakrytym režymie sudździa Mikałaj Dola.
Palitźniavoleny Uładzisłaŭ Kupryjanaŭ, jakoha zatrymali 7 žniŭnia 2022 hoda, pracavaŭ inžynieram u «Mahiloŭskich haradskich elektryčnych sietkach».
Da suda byŭ źmieščany spačatku ŭ SIZA №1 Minska, zatym jaho pieraviali ŭ SIZA №3 Homiela.
Uładzisłavu pieršapačatkova vystavili abvinavačvańni pavodle č. 3 art. 352 KK (niepravamocnaje zavałodańnie kampjutarnaj infarmacyjaj), č. 3 art. 203-1 KK (niezakonnyja dziejańni ŭ dačynieńni da infarmacyi pra pryvatnaje žyćcio i piersanalnyja dadzienyja) i č. 3 art. 130 KK (raspalvańnie rasavaj, nacyjanalnaj, relihijnaj abo inšaj sacyjalnaj varožaści).
Kupryjanava abvinavacili ŭ tym, što ŭvosień 2020 hoda, u čas pratestaŭ paśla prezidenckich vybaraŭ, jon nibyta pieradavaŭ źviestki pra miesca žycharstva dziaržaŭnych słužačych i ludziej z pravaachoŭnych orhanaŭ «Čornaj knizie Biełarusi». 17 listapada 2022 h. pravaabaroncy pryznali jaho palityčnym źniavolenym.
Sud pryznaŭ Uładzisłava Kupryjanava vinavatym u dapamahańni ŭ ździajśnieńni naŭmysnych dziejańniaŭ, nakiravanych na ŭzbudžeńnie sacyjalnaj varožaści, učynienych hrupaj asob, jakija paciahnuli ciažkija nastupstvy, i pryznačyŭ pakarańnie ŭ vyhladzie piaci hadoŭ pazbaŭleńnia voli ŭ kałonii ŭzmocnienaha režymu.
Padrabiaznaści sudovaha pracesu vyśviatlajucca.
Taćciana Zareckaja bolš nie estonskaja startapierka. Ciapier jana sprabuje stać pasiarednicaj inviestaraŭ u Saudaŭskaj Aravii13
Kamientary