Seks i zdaroŭje ŭ mužčyn iduć u pary

Takija vysnovy ŭ amierykanskim navukovym časopisie Plos One apublikavali daśledčyki z Univiersiteta Jamahata. Jany pryjšli da ich hruntujučysia na vynikach dzieviacihadovych nazirańniaŭ, u jakich uziało ŭdzieł kala 21 tysiačy čałaviek abodvuch pałoŭ ź siami prefiektur Jamahata. Siaredni ŭzrost skłaŭ 64,2 hoda ŭ mužčyn i 61,6 hoda ŭ žančyn.

Spačatku ŭdzielnikam była razasłana ankieta dla samaacenki, kab vyśvietlić ich historyju chvaroby, aktualnaje ŭžyvańnie lekaŭ i simptomy chvarob, kryviany cisk, častatu śmiechu, seksualny intares, status kureńnia, užyvańnie ałkaholu, fizičnuju aktyŭnaść, siamiejnaje stanovišča, uzrovień adukacyi, adčuvalny psichičny stres, a taksama ŭdzieł u hramadskaj dziejnaści.

Adsutnaść seksualnaj cikavaści vyśviatlałasia z dapamohaj pytańnia «Ci jość u vas ciapier cikavaść da ludziej supraćlehłaha połu?». Luby čałaviek, jaki adkazaŭ «nie», byŭ vyznačany jak nie majučy seksualnaj zacikaŭlenaści.

Akramia taho, daśledčyki atrymali dostup da łabaratornych analizaŭ udzielnikaŭ.

Za dzieviać hadoŭ z tych mužčyn, chto zajaviŭ, što nie maje cikavaści da supraćlehłaha połu, pamierła 9,6%. Pracent śmiarotnaści ŭ druhoj hrupy mužčyn skłaŭ 5,6%. Pry hetym śmiarotnaść ad raku była značna vyšejšaja ŭ tych mužčyn, jakija nie mieli seksualnaj zacikaŭlenaści.

Daśledčyki źviartajuć uvahu na toj fakt, što ŭ hrupie mužčyn, jakija nie mieli seksualnaha intaresu, byŭ značna bolšy pracent tych, chto kuryŭ, vypivaŭ u minułym, byŭ psichałahična źniasileny, śmiajaŭsia adnosna redka i mieŭ bolš nizki ŭzrovień adukacyi ŭ paraŭnańni z hrupaj mužčyn, jakija praciahvali cikavicca seksam. Siarod pieršaj hrupy mužčyn byŭ vyšejšy i ŭzrovień zachvorvańnia na dyjabiet.

Vučonyja padkreślivajuć, što ich daśledavańnie śviedčyć ab tym, što suviaź pamiž adsutnaściu seksualnaj zacikaŭlenaści i śmiarotnaściu mužčyn isnuje navat paśla papraŭki na ŭzrost, dyjabiet, hipiertaniju, kureńnie, užyvańnie ałkaholu, adukacyju, siamiejnaje stanovišča, častatu śmiechu i psichałahičnyja prablemy.

«Hruntujučysia na našych vynikach, my miarkujem, što adsutnaść seksualnaj zacikaŭlenaści sama pa sabie spryjaje pavyšeńniu ryzyki śmierci ad usich pryčyn, niezaležna ad ustanoŭlenych faktaraŭ ryzyki ŭ mužčyn, starejšych za 40 hadoŭ», — adznačajuć daśledčyki.

Papiarednija daśledavańni pakazali, što ŭ Japonii mužčyny, jakija raźvialisia abo aŭdavieli, padviarhalisia bolšaj ryzycy śmierci, čym žanatyja mužčyny, tady jak u žančyn padobnaj tendencyi nie nazirałasia.

Hruntujučysia na hetych vynikach, vučonyja z Univiersiteta Jamahata vykazali hipotezu ab tym, što zachavańnie seksualnaj zacikaŭlenaści moža być źviazana z pazityŭnym psichałahičnym dabrabytam i atrymańniem radaści ad žyćcia, asabliva siarod mužčyn. 

Takim čynam, prajaŭleńnie cikavaści da asob supraćlehłaha połu i ŭzajemadziejańnie ź imi moža dapamahčy mužčynam zastavacca psichałahična zdarovymi i nie stracić sensu žyćcia.

U jakaści stanoŭčaha prykładu vučonyja spasłalisia na dośvied urada Kanady, jaki praz materyjały pa prapahandzie achovy zdaroŭja pačaŭ padtrymlivać seksualnuju aktyŭnaść jak adzin z elemientaŭ paradku dnia «dobraha stareńnia».

U adroźnieńnie ad mužčyn, daśledavańnie nie vyjaviła nijakaj zaležnaści pamiž seksualnaj aktyŭnaściu i śmiarotnaściu ŭ žančyn.

Čytajcie jašče:

Kali nie vijahra, to što? 

Čym bolš ludzi jeździać, tym lepš siabie adčuvajuć — daśledavańnie

Daśledavańnie depresii pakazvaje krytyčnuju roźnicu pamiž mužčynami i žančynami

Navukoŭcy raskazali, jaki mužčynski ciełaskład padabajecca žančynam

• 12
• 0
• 2
• 3
• 4
• 5
• 5
• 0