Kruty raskazaŭ, jakija «sajuznyja prahramy» ŭžo atrymałasia całkam vykanać
Pasoł Biełarusi ŭ Rasii Dźmitryj Kruty, vystupajučy na telekanale «Biełaruś 1», raskazaŭ, što na hety momant vykanana 80% mierapryjemstvaŭ, praduhledžanych u ramkach zaćvierdžanych Łukašenkam i Pucinym intehracyjnych 28 «sajuznych prahram». Na astatnija 20% prypadajuć pytańni, adniesienyja na dalokuju pierśpiektyvu.
Častka «sajuznych prahram», pa słovach Krutoha, maje doŭhaterminovy charaktar i budzie realizoŭvacca až da 2030 hoda.
Ale vosiem prahram nibyta ŭžo vykananyja całkam. Try ź ich tyčacca finansavaha siektaru. Pieršaja — heta harmanizacyja valutnaha zakanadaŭstva i kantrolu. Druhaja — baraćba z admyvańniem hrošaj, finansavańniem teraryzmu. Treciaja — unifikacyja buchhałtarskaha ŭliku.
Taksama, pavodle Krutoha, udałosia realizavać try prahramy ŭ halinie infarmacyjnych sistem: pa adsočvalnaści, fitasanitarnym i vieterynarnym kantroli, u tym liku nazirańni za transpartnymi płanami.
Siomaja vykananaja «sajuznaja prahrama» — atamnaja enierhietyka, a vośmaja — adzinyja praviły kankurencyi.
«Adpaviednaje pahadnieńnie padpisanaje. Unifikavanaja na ŭzroŭni Minpramhandlu Rasii i našaha MARH narmatyŭnaja baza. Tamu prahrama taksama pryznanaja paśpiachovaj», — padkreśliŭ Dźmitryj Kruty.
Adnosna astatnich 20 prahram, to nibyta zastałosia realizavać kala 120 mierapryjemstvaŭ. Ale niekatoryja buduć rabicca da 2030 hoda, «jak prykład — śfiera makraekanomiki i hrašova-kredytnaha rehulavańnia».
Kamientary