Za reposty mužčynu asudzili na paŭtara hoda kałonii. Jon musić vypłacić bolš za 10 tysiač rubloŭ
14 sakavika 2023 hoda ŭ sudzie Leninskaha rajona Hrodna vyniesieny prysud Alaksandru Dziubie. Jaho pryznali vinavatym pavodle art. 368 (abraza Łukašenki) i art. 369 (abraza pradstaŭnika ŭłady) Kryminalnaha kodeksa i asudzili na paŭtara hoda pazbaŭleńnia voli ŭ kałonii ahulnaha režymu, piša «Viasna».
Da prysudu mužčynu ŭtrymlivali pad vartaj. Taksama jon musić vypłacić štraf u pamiery 100 bazavych vieličyń (3700 rubloŭ).
Prysud vyniesła sudździa Natalla Horbač. Kančatkovaje pakarańnie vyniesienaje šlacham pahłynańnia mienš strohaha terminu bolš strohim i dałučeńniem dadatkovaha pakarańnia. Pavodle art. 368 Kryminalnaha kodeksa, Dziubu asudzili da 1,5 hoda pazbaŭleńnia voli, pavodle art. 369 KK — da dvuch hadoŭ abmiežavańnia voli biez nakiravańnia ŭ kałoniju i štrafu.
Akramia hetaha, abvinavačany musić vypłacić kampiensacyju maralnaj škoły paciarpiełym — šeść tysiač rubloŭ (pa tysiačy rubloŭ kožnamu) i 666 rubloŭ dziaržpošliny.
Zhodna z abvinavačvańniem, Dziuba pakinuŭ publikacyi, jakija źnievažali honar i hodnaść Łukašenki i ŭtrymlivali «nienarmatyŭnuju formu moŭnaha vykazvańnia» ŭ dačynieńni da jaho. Taksama jon raźmiaściŭ u sacsietkach publikacyi z fotazdymkami milicyjantaŭ, supravadziŭ ich tekstam ź niehatyŭnaj acenkaj. Siarod ich byli vyjavy supracoŭnikaŭ izalataraŭ časovaha ŭtrymańnia sa svastykaj, Łukašenki ź impravizavanaj šybienicaj.
Mužčyna pryznaŭ vinu całkam. Jon raspavioŭ, što zrabiŭ repost infarmacyi ŭ fejsbuku. Paciarpiełyja zajavili, što publikacyja pryčyniła im maralnuju škodu.
«Prosta zalivaješsia ślaźmi i dumaješ: za što?» Iryna Ščasnaja i jaje čatyry balučyja hady za kratami9
Kamientary