Demakratyčny lidar Biełarusi vystupiła sa zvarotam da Dnia Kanstytucyi, jaki adznačajecca siońnia na aficyjnym uzroŭni. Kanstytucyja Biełarusi, nahadajem, była pryniataja 15 sakavika 1994 hoda.
«Siońnia Dzień Kanstytucyi. Kanstytucyi, jakuju za apošnija 28 hadoŭ niekalki razoŭ niezakonna pierapisvali. Kanstytucyi, artykuły jakoj sistematyčna parušaŭ režym, akramia chiba što artykuła 20 «Minsk — stalica Biełarusi». Kanstytucyi, jakaja ŭžo daŭno straciła svoj sens», — adznačyła Śviatłana Cichanoŭskaja.
«Na žal, siońnia nie toj dzień, ź jakim možna pavinšavać, ale toj, kali možna nahadać sabie, jak šmat my z vami ŭžo zrabili na šlachu da viartańnia svaich kanstytucyjnych pravoŭ. I jak šmat nam jašče daviadziecca zrabić, kab usie zakony našaj krainy pracavali i abaraniali biełarusaŭ, a nie stanavilisia instrumientam dla represij suprać naroda».
Pa słovach Śviatłany Cichanoŭskaj, u demakratyčnych siłaŭ užo jość bačańnie taho, jak pavinna vyhladać Kanstytucyja novaj Biełarusi.
«Našaja zadača — nie prosta novaja knižka z naboram słoŭ, jakoj kožny čynoŭnik zmoža hrebavać dziela ŭłasnych intaresaŭ. Našaja zadača — viarnuć hetamu dakumientu značnaść. Padrychtavać takuju Kanstytucyju, jakaja stanie abaronaj ad dyktatury, harantuje kožnamu čałavieku pravy i svabody, a taksama ŭstaluje demakratyčnyja strymlivańni i procivahu», — zaznačyła demakratyčnaja lidarka.
Cichanoŭskaja prapanuje kožnamu dałučycca da abmierkavańnia prajekta Kanstytucyi novaj Biełarusi na sajcie: kanstytucyja.online.
«Ja viedaju, što demakratyčnyja pieramieny ŭ našaj krainie niepaźbiežnyja, jak by mocna režym nie sprabavaŭ pierakanać nas u advarotnym. Niepasredna ciapier my z vami nabližajem toj čas, kali Biełaruś stanie svabodnaj demakratyčnaj krainaj», — reziumuje Śviatłana Cichanoŭskaja.
Kamientary