Čałaviectva staić na parozie pieramohi nad atłuścieńniem. I maje navatarski srodak ad dyjabietu

Novy kłas lekaŭ z mudrahielistaj nazvaj «ahanist receptara GLP-1», zdajecca, sapraŭdy pracuje. Antydyjabietyčny preparat «Siemahłutyd», jaki byŭ raspracavany dackaj farmaceŭtyčnaj kampanijaj Novo Nordisk, pryvodzić da straty vahi prykładna na 15%, zhodna z kliničnymi vyprabavańniami. Jon užo pradajecca pad brendam Wegovy ŭ Amierycy, Danii i Narviehii i nieŭzabavie budzie dastupny ŭ inšych krainach.

Ozempic, viersija ź mienšaj dozaj, taksama ŭžo prysutničaje na rynku i časta vykarystoŭvajecca «nie pa niepasrednym pryznačeńni», a dla pachudzieńnia. 

Analityki pradrakajuć hetym lekam astranamičnyja abaroty na farmaceŭtyčnym rynku ŭžo ŭ najbližejšaje dziesiacihodździe i prahnazujuć vialikuju raspaŭsiudžanaść padobnych preparataŭ.

I heta vyhladaje vielmi ŭčasnym vynachodnictvam, uličvajučy krajnie niehatyŭnyja tendencyi z raspaŭsiudžańniem atłuścieńnia. Brytanskaja niaŭradavaja arhanizacyja Suśvietnaja fiederacyja atłuścieńnia prahnazuje, što da 2035 h. kolkaść ludziej ź lišniaj vahoj abo atłuścieńniem moža skłaści ašałamlalnyja 4 miljardy. Što charakterna, chutčej za ŭsio nasielnictva nabiraje kiłahramy nie na «bahatym Zachadzie», a ŭ krainach kštałtu Jehipta, Mieksiki ci Saudaŭskaj Aravii.

Nasupierak stereatypnym ujaŭleńniam, suśvietny rost kolkaści ludziej, jakija pakutujuć na atłuścieńnie, nie źjaŭlajecca prykmietaj maralnaj niaŭdačy ludziej ź lišniaj vahoj — heta vynik bijałohii. Hieny, jakija byli žyćciova važnyja dla taho, kab dapamahčy ludziam pieražyć zimy i hoład, pracujuć hetak ža i siońnia. Adnak praźmiernaja kolkaść apracavanych charčovych praduktaŭ u apošnija dziesiacihodździ pryniesła — razam z bolšaj zručnaściu i mienšymi vydatkami na vytvorčaść — taksama i tendencyju da pierajadańnia pry bolš siadziačym ładzie žyćcia.

Jak heta časta zdarajecca, novyja leki źjavilisia vypadkova: raptam było zaŭvažana, što lačeńnie, pryznačanaje dla dyjabietykaŭ, vyklikaje taksama i stratu vahi. «Siemahłutyd» imituje vykid harmonaŭ, jakija stymulujuć pačućcio sytaści i źnižajuć apietyt. Niepieraadolnaje žadańnie pajeści ŭ vyniku prosta adklučajecca.

Inviestary i schudniełyja karystalniki ŭ zachapleńni: rynkavaja kapitalizacyja vytvorcy Novo Nordisk padvoiłasia za dva hady da 326 miljardaŭ dołaraŭ, što zrabiła jaje druhim pa košcie vytvorcam lekaŭ u śviecie. I heta, chutčej za ŭsio, tolki pačatak. Ale, jak i ŭ vypadku ź lubymi novymi pierśpiektyŭnymi lekami, jość niajasnaści: u pieršuju čarhu heta biaśpieka i dastupnaść.

Naturalna doŭhaterminovyja nastupstvy pryjomu pakul nieviadomyja. Choć dla lekaŭ ź mienšaj daziroŭkaj pabočnyja efiekty kštałtu vanitaŭ i dyjarei byli lohkimi, pry vykarystańni bolš šyroka i ŭ vyšejšych daziroŭkach mohuć źjavicca i inšyja nastupstvy. Daśledavańni na žyviołach pakazali bolš vysokuju častatu raku ščytapadobnaj załozy, a pra nastupstvy vykarystańnia padčas abo niepasredna pierad ciažarnaściu ŭvohule viadoma mała. Usio heta zapatrabuje ŭvažlivaha analizu z dapamohaj kantralavanych padoŭžanych daśledavańniaŭ.

Razumieńnie hetych ryzyk budzie važnym, tamu što mnohim pacyjentam, jakija vyrašacca prymać leki, jany mohuć spatrebicca da kanca žyćcia. Jak i pry admovie ad dyjety, spynieńnie pryjomu vysokaj dozy «Siemahłutydu» źviazanaje ź viartańniem bolšaj častki stračanaj vahi. A niekatoryja ludzi nabirajuć navat bolš kiłahramaŭ, čym stracili.

Inšy kłopat — košt. The Economist raspaviadaje, što ŭ ZŠA rachunak za Wegovy składaje kala 1300 dalaraŭ na miesiac, a dla Ozempic kala 900 dalaraŭ. Takim čynam, pažyćciovyja recepty buduć vyhladać nievierahodna doraha. Ale časam farmaceŭtyčnyja kampanii mohuć składać damovy z uradami i miedycynskimi rabotnikami z metaj achopu ŭsiaho nasielnictva, zabiaśpiečvajučy takim čynam vialikija abjomy ŭ abmien na nizkija ceny. A pierśpiektyva prybytku ŭžo vabić kankurentaŭ: hihanty suśvietnaj farmvytvorčaści ŭžo pracujuć nad kankurujučymi preparatami.

Doŭhija hady ludziam z dyjabietam 2 typu, jakim treba było prymać leki dla źnižeńnia ŭzroŭniu cukru ŭ kryvi, prapisvali mietfarmin. Novyja rekamiendacyi ciapier rajać pacyjentam pačynać z adnaho z novych lekaŭ ad dyjabietu, jaki taksama moža pamienšyć vahu i abaranić serca i nyrki.

Hetyja novyja leki ad dyjabietu naležać da dvuch kłasaŭ, viadomych pad abrevijaturami SGLT-2 i GLP-1 pa pryncypie ich dziejańnia.

Adnak novyja preparaty kaštujuć daražej, čym mietfarmin, i niekatoryja pacyjenty mohuć być nie ŭ stanie dazvolić sabie vydatki z ułasnaj kišeni i im treba budzie vykarystoŭvać mietfarmin, kažuć lekary. Ozempic, naprykład, pieraličvaje amal 900 dołaraŭ u miesiac, a Jardiance — kala 590 dołaraŭ u miesiac.

Tym časam inšyja miery pa baraćbie z atłuścieńniem nichto nie admianiaŭ. Fizičnyja praktykavańni, zdarovaje charčavańnie i režym dnia — najlepšy srodak u baraćbie ź lišniaj vahoj.

• 39
• 0
• 8
• 6
• 8
• 13
• 28
• 0