Biełarus adkryŭ bar kraftavaha piva na Madejry i raskazvaje, kolki prynosić hetaja radaść
Na partuhalskim vostravie hetaja niša amal niezaniataja. «Na ŭsiu Madejru ŭsiaho dva bary kraftavaha piva, adzin ź ich moj», — kaža Dźmitryj. Spravy iduć uharu, ale dzie-nidzie sustrakajucca kamiani.
Bar Dźmitryja na Madejry. Fota: asabisty archiŭ
Niezvyčajny bar lohka znajści na mapie biełaruskich biznesaŭ «BY Mapka». Na prastorach Atłantyčnaha akijana ŭ jaho zusim niama kankurentaŭ, tamu jarki čyrvony cetlik na partuhalskaj vyśpie Madejra adrazu kidajecca ŭ vočy. Ad Lisabona da Funšała, hałoŭnaha horada vostrava, amal 1000 kiłamietraŭ, siudy čaściakom naviedvajucca turysty, u tym liku i našy ziemlaki.
«Viadoma, bajalisia prahareć, luby biznes — heta 50 na 50»
U 2015-m Dźmitryj i jaho žonka pierajechali ź Biełarusi ŭ Polšču. Mužčyna pajechaŭ tudy vučycca na bijatechnołaha, a paśla asvoiŭ jašče i brovarstva. Tady jon vyrašyŭ adkryć svoj bar.
«Spačatku brovarstva było jak chobi, — raskazvaje Dźmitryj. — U 2019-m u Polščy rynak byŭ pieranasyčany, i ja niejki pieryjad jeździŭ varyć piva z Urocłava ŭ Minsk. Davodziłasia z Polščy vazić z saboj inhredyjenty: droždžy, čamadan chmielu».
U tym ža hodzie Dźmitryj usio ž adkryŭ svoj bar va Urocłavie.
«My kupili biznes za 180 000 złotych (amal 40,5 tysiačy dalaraŭ), heta byli aščadžeńni. Za hetyja hrošy atrymali adrazu supracoŭnikaŭ, arendnaje pamiaškańnie, abstalavańnie, kuchniu.
Samo pamiaškańnie było ŭ drennym stanie, ale nam spadabałasia miesca, u jakim jano znachodziłasia.
Va Urocłavie jość čyhunačnaja estakada. Heta vialiki most, jakomu bolš za sto hadoŭ. Jon daŭžynioj amal kiłamietr. U aporach masta znachodziacca bary. Siadziš, a źvierchu jedzie ciahnik, lustry trasucca. Vielmi atmaśfierna», — raskazvaje mužčyna.
Dźmitryj adznačaje, što siarod składanaściaŭ pry adkryćci bara ŭ Polščy — atrymańnie licenzii na prodaž ałkaholu. Heta moža zaniać niekalki miesiacaŭ.
Samo pamiaškańnie ŭ Dźmitryja było adnosna nievialikaje — 74 kvadraty.
«Arenda kaštavała 6500 złotych (1460 dalaraŭ), padčas pandemii zrabili vialikuju źnižku, płaciŭ 1600 (337 dalaraŭ)», — kaža jon.
«Viadoma, bajalisia prahareć, luby biznes — heta 50 na 50. Z hastranomijaj jašče składaniej, tut vialikaja kankurencyja. Ale ŭ nas było vyraznaje bačańnie taho, što my chočam».
Łakdaŭn u pandemiju rezka skaraciŭ kolkaść naviedvalnikaŭ u barach i restaranach. Heta sapsavała płany Dźmitryja pa nabyćci abstalavańnia dla vareńnia piva.
«Dahetul prahres byŭ. Kožny miesiac naš dachod pavialičvaŭsia. Kali b nie pandemija, to ŭsio pavinna było skłaścisia narmalna. Prybytak mierkavaŭsia dobry.
U mianie było čatyry čałavieki piersanału: dva na kuchni, dva ŭ zale. Paśla pandemii zastałosia tolki dva. Davodziłasia samomu niekalki dzion na tydzień pracavać u jakaści piersanału», — raskazvaje jon.
U 2020-m Dźmitryj razam z žonkaj palacieli adpačyvać na tydzień na Madejru, dzie ŭ toj čas nie było łakdaŭnu.
«Pryjechali, kab źmianić abstanoŭku. A kali viarnulisia ŭ Polšču, ubačyli, što tam usio jašče markotna. I znoŭ pajechali na Madejru, dzie zastalisia na čatyry miesiacy. Vyrašyli zajmacca tut kraftavym pivam i pradavać mieksikanskuju ježu. U cełym hetaja niša na Madejry niezaniataja», — raskazvaje surazmoŭca.
«U ramont ukłali 30 000 jeŭra»
U listapadzie 2021-ha Dźmitryj pradaŭ biznes va Urocłavie za 200 000 złotych (amal 45 tysiač dalaraŭ). Bar kupili praz dva tydni paśla padačy abjavy.
Na Madejry mužčyna doŭha šukaŭ pamiaškańnie. Pošuki zaniali kala siami miesiacaŭ.
«Znajšoŭ miesca, ale tam byŭ kłasičny restaran partuhalskaj ježy, pamiaškańnie nam zusim nie padychodziła, ale pahadziŭsia na jaho, — tłumačyć jon. —
200 000 złotych nam chapiła, kab kupić biznes tut, ale nie chapiła na ramont i meblu. U heta ŭkładali sa svaich aščadžeńniaŭ — 30 000 jeŭra. Sama kuchnia była».
Dźmitryj kaža, što na Madejry składana znajści piersanał. Miascovyja prosta nie chočuć pracavać: minimalny zarobak u ich 780 jeŭra, a dapamoha pa biespracoŭi — 400.
«Mnohija miascovyja žyvuć u adnym domie ci kvatery razam sa svajakami, zdymać žyllo nie treba, tamu im całkam chapaje dapamohi, ludzi nie bačać sensu ŭ zarobku. Jany zhodnyja, naprykład, pajści pracavać u «Makdonalds», dzie pracoŭny dzień zakančvajecca raniej, čym u bary.
Znajšoŭ rabotnikaŭ na kuchniu — chłopca z Brazilii i dziaŭčynu ź Vieniesueły. Apošnija dva miesiacy barmienam i aficyjantam uvieś čas pracavaŭ ja.
U Polščy niama prablem z naboram piersanału. Ludzi šukajuć pracu. Ja moh pakinuć piersanału klučy ad bara, a sam źjechać. Tut, kali mnie treba kudyści pajechać, daviadziecca začyniać bar na niejki čas», — raskazvaje jon.
Taksama niaprosta na Madejry z pastaŭkami. 30-kiłahramovuju bočku piva dastaŭlajuć na karabli, čakać dva tydni.
«Treba dobra płanavać. Naprykład, moža być štorm, karabiel nie zmoža pryšvartavacca, i piva dastaviać niachutka», — zaŭvažaje Dźmitryj.
«Dynamika vielmi dobraja»
Siarod papularnych straŭ u bary — načas pa 9 jeŭra za porcyju na dvaich, buryta pa 13 jeŭra.
«Padumali, što mieksikanskaja kuchnia i kraftavaje piva dobra spałučajucca. U bary va Urocłavie ŭ nas było mienšaje mieniu, bo kuchnia maleńkaja była».
Samaje tannaje piva (250 mililitraŭ) kaštuje 2 jeŭra, samaje darahoje (400 mililitraŭ) — 8 jeŭra.
«Piva nam impartujuć z macieryka, zvyčajna jano ź Lisabona, Portu, prychodzić u bočkach. A piva ŭ butelkach — z Hiermanii, Ispanii. Płanujem tut pačać varyć piva, ale heta jašče budzie niachutka», — kaža jon.
Bolšaść haściej bara — heta ekspaty i turysty. Jość na Madejry i biełarusy.
«Dynamika ŭ nas vielmi dobraja. Adkrylisia ŭ druhoj pałovie śniežnia 2022-ha, za miesiac pakryli zarobak supracoŭnikam. Usio astatniaje — kamunalnyja pasłuhi, arendu (jana składaje 1500 jeŭra, u žniŭni vyraście da 2000), zakupku — jašče nie.
Padatak tut prahresiŭny. Čym bolšy dachod, tym bolšy padatak. Va ŭładzie sacyjalisty, jak u Polščy, tamu ŭ fond sacabarony adličeńni vializnyja. Moj piersanał płacić u jaho 11 pracentaŭ, a ja jašče pavinien za ich zapłacić 12.
U hetym miesiacy ŭžo pavinna chapić na zarobak supracoŭnikam, arendu i kamunalnyja», — dzielicca Dźmitryj.
Hety bar, jak i bieźlič inšych biełaruskich pasłuh pa ŭsim śviecie, možna adšukać na mapie servisu «BY Mapka». Ciapier na kartu naniesiena bolš za 1700 punktaŭ, siarod jakich možna znajści pasłuhi ad našych suajčyńnikaŭ jak u Polščy ci Litvie, tak i ŭ Partuhalii, Ispanii ci navat Aŭstralii. Stvorany hety servis dla taho, kab navat u zamiežžy biełarusy mahli padtrymlivać svaich.
Čytajcie taksama:
Vy ździviciesia, na čym biełarusy zarablajuć u Varšavie, Hdańsku, Stakholmie i inšych haradach za miažoj
«U Minsku mieŭ karjeru, a tut pačaŭ z malara i žyvu ŭ domie z džakuzi». Jak biełarus pierabraŭsia ŭ Kaliforniju
«Umieju daić karovu, piačy pirahi, tkać». Małady čałaviek znajšoŭ siabie ŭ hłybincy i ciapier ulublaje ŭ jaje turystaŭ
Biełarusy adkryli ŭ Vilni karčmu ŭ domie, dzie Kalinoŭski źbiraŭsia z paŭstancami
Bondarava abrynułasia na muziej Janki Kupały i mastaka Sušu14
Kamientary