Zapatentavali samaačyščalnyja sensarnyja dyspłei, na jakich źnikajuć adbitki palcaŭ
Sensarnyja ekrany ŭ aŭtamabilach nikudy nie źniknuć, ale nieabchodnaść ich biaskoncaj čystki chutka moža zastacca ŭ minułym.
Padabajecca vam heta ci nie, sensarnyja ekrany, jakija zamianiajuć fizičnyja knopki ŭ aŭtamabilach, nie źniknuć najbližejšym časam. Faktyčna, adnojčy ŭsia prybornaja panel vašaha aŭtamabila, vierahodna, stanie adnym vialikim ekranam, pakrytym tłustymi adbitkami palcaŭ. Kab zrabić heta mienš razdražnialnym, General Motors zapatentavała novy dyzajn ekrana, jaki dazvalaje sensarnym ekranam samastojna ścirać adbitki palcaŭ.
Na žal, heta nie budzie roba-ruka, što źjaŭlajecca adniekul ź nietraŭ aŭto ź mikrafibravaj anučaj i praciraje prybornuju panel aŭtamabila. U General Motors prydumali technałohiju značna bolš razumnuju.
U toj čas, jak u bolšaści ekranaŭ dla stvareńnia poŭnaj kalarovaj palitry vykarystoŭvajucca čyrvonyja, zialonyja i sinija śviatłodyjody roznaj intensiŭnaści, dyzajn GM dadaść čaćviorty piksiel va ŭsiu matrycu, śpiecyjalna nastrojeny na daŭžyniu chvali ŭltrafijaleta, niabačnaha dla čałaviečaha voka.
Na pavierchni ekrana budzie całkam prazrysty płast niejkaha fotakatalizatara na asnovie aksidu mietału — vierahodna, dyjaksidu tytana, jaki ŭžo vykarystoŭvajecca na samaačyščalnych soniečnych panelach i ŭ šerahu inšych pryład.
Pad uździejańniem ultrafijaletu dyjaksid tytana pieratvarajecca z hidrafobnaha ŭ supierhidrafilny i pačynaje pryciahvać vilhać z pavietra. Heta stvaraje tonki płast vady na pavierchni: adbyvajecca praces akiśleńnia i ŭ vyniku elektrachimična hienierujucca malekuły svabodnych radykałaŭ, jakija atakujuć ścienki kletak, cytapłazmu i DNK bakteryj, hryboŭ i inšych bijałahičnych arhanizmaŭ, jakija znachodziacca na pavierchni vašaha ekrana.
Faktyčna takim čynam źniščajecca bolšaść arhaničnych materyjałaŭ na pavierchni, uklučajučy taksama reštki naftapraduktaŭ i inšaje śmiećcie. Ekran pavolna ačyščajecca i sterylizujecca. Kali ŭździejańnie ŭltrafijaletavaha śviatła prypyniajecca, pavierchnia znoŭ stanovicca vodaniepranikalnaj, što dazvalaje vilhaci padymacca ŭvierch i skočvacca z pavierchni.
Takim čynam, ideja GM zaklučajecca ŭ raspracoŭcy całkam kantralavanaha ŭltrafijaletavaha śviatła ad dadatkovych UF-piksielaŭ, ubudavanych niepasredna ŭ kalarovuju matrycu ekrana, kab jon moh pačać praces samaačyščeńnia ŭ luby momant. Vy možacie ŭručnuju zapuścić jaho, kali nie baiciesia ŭździejańnia minijaciurnaha salaryju. Ale ž razumniejšaj opcyjaj vyhladaje zapusk na niekalki hadzin u siaredzinie kožnaj nočy, kali ekran nie budzie akazvać uździejańnia na čałavieka.
Kali reakcyja spynicca i ŭsio vysachnie, to ŭsie tłustyja mazki i adbitki palcaŭ prosta źniknuć, jak pył na vietry, pakidajučy čystyja ekrany, hatovyja znoŭ być zapeckanymi reštkami vašaha buterbroda z masłam ci dziciačymi palcami ŭ marožanym.
Ciapier hetaja technałohija znachodzicca tolki ŭ patentnym stanie, i GM nie rabiŭ nijakich abjaŭ adnosna taho, ci płanuje kampanija vykarystoŭvać hetuju technałohiju ŭ budučych aŭtamabilach, ci jana budzie prosta zastavacca ŭ vyhladzie patenta, jakim, mahčyma, zachočuć skarystacca inšyja aŭtavytvorcy.
Naturalna, hetaje novaŭviadzieńnie moža akazacca bolš mahčymym, u pryvatnaści, na noŭtbukach z sensarnym ekranam, čym u aŭtamabilach. Bo ŭ kančatkovym vyniku moža akazacca tańniej prosta nanieści fotakatalityčnaje pakryćcio na ekran i ŭstalavać značna bolš prostuju UF-lampu asobna ŭ panel abo stol u sałonie, kab śviacić niepasredna na piaredniuju častku ekrana. Vykarystańnie UF-piksielaŭ moža być lepšym rašeńniem mienavita dla kampjutaraŭ i padobnych devajsaŭ.
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść14
Kamientary