«Dazvoł budzie dziejničać 3 miesiacy». Švied patłumačyŭ padrabiaznaści pracy kamisii pa «viartańni na radzimu»
Hienieralny prakuror Andrej Švied, adkazvajučy na pytańni žurnalistaŭ paśla sustrečy z Alaksandram Łukašenkam, padrabiazna raspavioŭ pra źmiest ukaza ab stvareńni kamisii dla pracy z žadajučymi viarnucca na radzimu, piša BiełTA.
Pavodle jaho słoŭ, u dakumiencie idzie havorka nie tolki pra piersanalny skład kamisii, ale taksama tam vyznačanyja ŭmovy i paradak razhladu zvarotaŭ hramadzian Biełarusi, jakija znachodziacca za miažoj.
«Achoplivajecca pieryjad tych mahčymych abo ŭčynienych pravaparušeńniaŭ z 1 studzienia 2020 hoda pa 31 śniežnia 2023 hoda. Hramadzianie mohuć źviartacca ŭ kamisiju ŭ piśmovym vyhladzie abo ŭ elektronnym. Va ŭkazie vyznačanyja patrabavańni, jakija pradjaŭlajucca da hetaj zajavy, pieralik dakumientaŭ, jakija pavinny ŭtrymlivacca. Taksama paznačanyja tyja rašeńni, jakija buduć prymacca kamisijaj. Usio adkryta, zrazumieła. Praduhledžanaje adkrytaje, svabodnaje hałasavańnie členaŭ kamisii pa kožnym pytańni», — raskazaŭ hienprakuror.
Jon padkreśliŭ, što nichto nie prymušaje nikoha viartacca na radzimu abo źviartacca ŭ stvoranuju kamisiju. «Heta dobraja vola, žest našaj dziaržavy. Dla taho, kab źniać usiakaha rodu pravakacyi, va ŭkazie asobna vyznačanaja norma, źviazanaja z tym, što asoby, u dačynieńni da jakich pryniataje rašeńnie (kamisii), mohuć na praciahu 3 miesiacaŭ jaho realizavać. Prajšło 3 miesiacy — dalej, kali łaska, źviartajciesia pa ahulnym paradku», — rastłumačyŭ Andrej Švied.
Taksama jon skazaŭ, što va ŭkazie praduhledžanyja mahčymaści realizacyi ŭsich pravavych norm, nakiravanych na «vyzvaleńnie asoby ad adkaznaści abo źmianieńnie miery strymańnia».
«Samaje hałoŭnaje: kali hetaja asoba, atrymaŭšy na ruki dakumient ab tym, što da jaje niama pretenzij abo źmienienaja miera strymańnia, abo pryniataje niejkaje inšaje rašeńnie, jakoje, na dumku hetaj asoby, dazvalaje joj spakojna ŭjechać u Respubliku Biełaruś, vyznačanaja harantyja, źviazanaja z tym, što ŭ vypadku ŭźniknieńnia jakich-niebudź pretenzij z boku dziaržaŭnych pravaachoŭnych orhanaŭ, tolki sa zhody hienieralnaha prakurora abo asoby, jakaja vykonvaje jaho abaviazki, mohuć prymianiacca miery pracesualnaha prymusu albo prymacca niejkaje pravavoje rašeńnie. Heta vielmi važna», — źviarnuŭ uvahu hienprakuror.
Kab pryniać pravilnaje rašeńnie, hienprakuror daŭ rekamiendacyju ŭsim žadajučym viarnucca ŭ Biełaruś: «kožny pavinien dumać pra siabie, pra svaich rodnych, blizkich, pra dziaciej. Dumajcie, uzvažvajcie, čytajcie. Usio adkryta i zrazumieła».
Havoračy pra paŭnamoctvy stvoranaj kamisii, čynoŭnik rastłumačyŭ, što pry razhladzie kožnaha zvarotu padychod budzie indyvidualnym.
«Va ŭkazie vyznačanyja vidy rašeńniaŭ kamisii. Kali my prychodzim da razumieńnia, što čałaviek pamyliŭsia, paddaŭsia emocyjam, upłyvu (bo my z vami dobra pamiatajem, jakaja była infarmacyjnaja prapampoŭka, jaki byŭ kałasalny cisk, chtości paddaŭsia, ale ciapier ščyra raskajvajecca), my rekamiendujem pravaachoŭnym orhanam pryniać pracesualnaje rašeńnie, naprykład, ab spynieńni kryminalnaha pieraśledu. I pra heta pišam čałavieku: «Tak, u dačynieńni da vas miełasia kryminalnaje sudavodstva, pryniataje takoje rašeńnie, takoha čysła, i vy majecie prava spakojna ŭjechać, nijakich pretenzij da vas niama». Kali tolki vy niešta nie ŭtaili. Kali čałaviek ździejśniŭ jašče niejkaje złačynstva i pra heta nikomu nie viadoma (jon utojvaje), to zakon dla ŭsich adnolkavy», — rastłumačyŭ Andrej Švied.
U skład kamisii ŭvojdzie kala 30 čałaviek. Źbiracca jany buduć pa miery nieabchodnaści, hatoŭnaści materyjałaŭ pa kožnym vypadku. Na razhlad zajaŭ hramadzian joj advodzicca da dvuch miesiacaŭ, u vyklučnych vypadkach pa rašeńni staršyni kamisii — da troch miesiacaŭ. «Tut vielmi važna śpiašacca, ale pavolna, kab nie dapuścić pamyłki, uvažliva razabracca», — adznačyŭ hienieralny prakuror.
Kamientary
https://d3kcf2pe5t7rrb.cloudfront.net/309236