Ekanomika44

Vy ździviciesia, na čym biełarusy zarablajuć u Varšavie, Hdańsku, Stakholmie i inšych haradach za miažoj

Biełarusy-emihranty čaściej za ŭsio prapanujuć svaje tavary i pasłuhi ŭ Polščy, Hruzii i Litvie. Ale našy ludzi jość i ŭ Aŭstralii. I zarablajuć jany daloka nie tolki aŭtaservisam, stamatałohijaj, repietytarstvam i bjuci-pasłuhami, jakich sapraŭdy vielmi bahata. Pahladzieli, jakim niečakanym biznesam zajmajucca biełarusy za miežami radzimy.

Fota: instahram biełaruskaha biznesu ŭ Varšavie

Anłajn-servis «BY Mapka» adlustroŭvaje infarmacyju pra biznes biełarusaŭ pa ŭsim śviecie. Ciapier na kartu naniesiena bolš za 1700 punktaŭ, siarod jakich možna znajści tavary i pasłuhi ad našych suajčyńnikaŭ jak u Polščy ci Litvie, tak i ŭ Partuhalii, Ispanii ci navat Aŭstralii. Stvorany hety servis dla taho, kab navat u zamiežžy biełarusy mahli padtrymlivać svaich.

Karystacca mapaj vielmi prosta: pierachodzicie na servis bymapka.me, abirajecie cikavy vam rehijon, klikajecie na prapanovy i hladzicie apisańnie pasłuh. Možna spraścić navihacyju, adfiltravaŭšy prapanovy pa toj śfiery pasłuh, jakaja vas cikavić u hety momant.

Jachtynh u Polščy

Biełarus, jaki žyvie ŭ polskim horadzie Hižycka, što na Mazurskich aziorach, zdaje ŭ arendu parusnyja i matornyja jachty. Aproč hetaha, tam navučajuć jachtynhu z vydačaj paśviedčańnia i arhanizoŭvajuć adpačynak dla dziaciej i darosłych.

Mebla dla kocikaŭ

Biełarusy ŭ Varšavie raspačali vytvorčaść mebli dla kocikaŭ. U asartymiencie raznastajnyja palicy z cackami i miescam dla zatočvańnia kipciuroŭ.

«Kacinaja» mebla kaštuje ad 105 da 445 złotych, što kala 65—275 rubloŭ.

Instruktar pa snoŭbordynhu

Adnym tolki navučańniem jachtynhu śpis cikavych prapanoŭ ad biełarusaŭ u Polščy nie abmiažoŭvajecca. Tak, naprykład, u Hdyni prapanujuć uroki katańnia na snoŭbordzie dla darosłych i dziaciej ad 7 hadoŭ. 

Łaźnia ŭ Aŭstralii

Na zialonym kantyniencie biełarusy prasoŭvajuć svaju łaźnievuju kulturu. Tam jany zładzili miesca dla adpačynku z «uschodniejeŭrapiejskaj saŭnaj». Pra biełaruski śled kaža i sama nazva prajekta — Vëska Hills.

«Biełaruskaja łaźnia i parylnia, biełaruskaja ježa, načleh, hrupavy fitnies», — havorycca ŭ apisańni miesca dla adpačynku na inšym kancy śvietu.

Navukovy łahier dla dzietak

U Vilni biełarusy zładzili łahier dla junych amataraŭ navuki. Miarkujučy pa apisańni na sajcie, zaniatki prachodziać vyklučna ŭ letni pieryjad. Zapisać možna dzietak va ŭzroście ad 7 hadoŭ.

Padborka harderobu ŭ Litvie i Polščy

Šopinh-supravadžeńnie, revizija harderobu, stylizacyja zdymak… Takija pasłuhi prapanujuć fešn-kansultantki ŭ Vilni i polskim horadzie Zialonaja Hura.

Knihi ŭ Hdańsku z dastaŭkaj pa ES

U Hdańsku biełarusy handlujuć knihami. Krama nazyvajecca «34 litary». 

U asartymiencie — litaratura na biełaruskaj, ruskaj, anhlijskaj i ŭkrainskaj movach. 

Arenda huku

Siarod niačastaha vidu biznesu možna adznačyć zdaču ŭ arendu hukavoj aparatury dla praviadzieńnia mierapryjemstvaŭ. Takija pasłuhi adkryŭ biełarus u Hdańsku. Razam z technikaj prapanujuć naniać i hukarežysiora.

Vyrab śviečak u vakolicach Stakholma

Biełaruska, jakaja žyvie ŭ Šviecyi, zajmajecca vyrabam katanych śviečak z pustych pčalinych sotaŭ i adlivanych śviečak z sojevaha vosku.

U jaje asartymiencie — vytančanyja śviečki dla kaladnaha stała i varyjanty z roznymi pachami: kavy, łavandy, kalenduły. Ekzatyčna vyhladaje śviečka ŭ kakosavaj škarłupinie. Biełaruska vyrablaje taksama ručnoje myła.

Ramont kavamašyn

Mnohija lubiać pačynać ranicu z kubačka kavy. Biełarus u polskim horadzie Łodź vyrašyŭ, što na hetaj lubovi da haračaha napoju možna zarabić i naładziŭ biznes pa ramoncie kavamašyn. A taksama jon pradaje roznyja vidy kavy, kakavy i siropaŭ.

Abstalavańnie dla pošuku skarbaŭ i nie tolki

A ŭ Biełastoku adkryli śpiecyjalizavanuju kramu pa prodažy mietałašukalnikaŭ suśvietnych vytvorcaŭ. Devajsy ŭ hetaj kramie možna nabyć ci ŭziać u arendu.

Miasnyja čypsy

U Varšavie ŭ biełarusaŭ možna nabyć miasnyja čypsy. Sto hramaŭ dalikatesu kaštuje ad 15 da 26 złotych (kala 10—16 rubloŭ). Pryčym padsiłkavacca možna, navat kali prahaładaješsia pozna ŭviečary: da druhoj hadziny nočy dasiažny samavyvaz. 

Bijaprybiralni va Ukrainie

Siarod nietypovaha biznesu — handal bijaprybiralniami ŭ Kijevie. Internet-krama pradavała tualety Thetford va Ukrainie. Kaliści jana pracavała na biełaruskim rynku, ale apošnija hady prapanoŭvała svaje pasłuhi ŭ Kijevie. 

Praŭda, ciapier hety biełaruski biznes vyhladaje zakrytym, paznačany ŭ apisańni sajt nie pracuje.

Jakija vidy dziejnaści samyja papularnyja siarod biełarusaŭ zamiežža?

Na mapie biełaruskaha biznesu za miažoj bolš za ŭsio punktaŭ u bjuci-śfiery (172), fatohrafaŭ (143) i cyrulniaŭ (118). U piaciorcy taksama pasłuhi ŭ katehoryi «Adukacyja i raźvićcio» (takich prapanoŭ 117) i «Budaŭnictva i ramont» (94).

Raim vam samastojna naviedać sajt servisu «BY Mapka» i adšukać biełaruskija prapanovy z aktualnymi dla vas pasłuhami. Mahčyma, vy znojdziecie nie tolki dobruju jakaść, ale jašče cudoŭnych siabroŭ i lubimyja miescy, što buduć nahadvać vam pra radzimu.

Čytajcie taksama:

Letaś biełarusy ŭ Polščy adkryli amal u 4 razy bolš firm, čym u 2020-m. Čym tam zajmajucca biełaruskija biznesoŭcy 

Kamientary4

  • Maksim Dizajnier
    09.02.2023
    Kromie fešn-konsultantov - vsie mołodcy. Nu, kak obyčno, na strojku nikto nie chočiet idti. A pridietsia, dorohije fotohrufy.
  • Aleks
    09.02.2023
    Maksim Dizajnier, a dizajniery kuda pojdut? Ili eto familija?
  • dočka Maksima Dizajniera
    09.02.2023
    Dizajnier, da-a... fešn-konsultanty - eto niečto... nu tie, čto v Vilniusie, vidať, zakazy imiejut ot-dla vysšieho urovnia )

Pad Varšavaj trahična zahinuŭ 31-hadovy biełaruski ravaryst Alaksandr Pustavitaŭ3

Pad Varšavaj trahična zahinuŭ 31-hadovy biełaruski ravaryst Alaksandr Pustavitaŭ

Usie naviny →
Usie naviny

Kantraktnik u Biełharadskaj vobłaści Rasii zastreliŭ troch tavaryšaŭ i ŭciok sa zbrojaj

U Kalinkavičach u 40 hadoŭ pamior praparščyk patrulna-pastavoj słužby 

Eduardu Babaryku dadali paŭtara hoda źniavoleńnia2

Bajden nazvaŭ vice-prezidenta Charys Trampam. Toj rezka adreahavaŭ1

Milinkievič raskazaŭ, što biełarusy mohuć dać Jeŭropie9

Razhramili kvateru byłoha viadučaha ANT Ivana Padreza11

Siamiejnuju paru rasijan zatrymali ŭ Aŭstralii pa padazreńni ŭ špijanažy

Šmatdzietnaj maci dali 6 hadoŭ kałonii pa 6 artykułach. Syn-padletak ź invalidnaściu čakaje jaje na voli8

Pamior biełaruski saksafanist Vital Jamuciejeŭ

bolš čytanych navin
bolš łajkanych navin

Pad Varšavaj trahična zahinuŭ 31-hadovy biełaruski ravaryst Alaksandr Pustavitaŭ3

Pad Varšavaj trahična zahinuŭ 31-hadovy biełaruski ravaryst Alaksandr Pustavitaŭ

Hałoŭnaje
Usie naviny →