Najbližejšy zapis — kaniec lutaha. Jakija krainy i na jakich umovach ciapier vydajuć šenhien

Ispanija

Padavać dakumienty na ispanski šenhien daviadziecca ŭ Maskvie. Pajechać možna samastojna abo dapłacić vizavaj kampanii za tranśfier da rasijskaj stalicy i nazad. Pašpart dastaviać u Minsk prykładna praz dva tydni. Ispanskaje konsulstva nie patrabuje aficyjnaha paćviardžeńnia broni hatela. Šaniec atrymać šmatrazovuju vizu hetaj krainy vysoki. Padać dakumienty možna pry kancy lutaha.

Charvatyja

Z pačatku hoda Charvatyja pačała vydavać turystyčnyja vizy. Zapis na padaču ciapier viadziecca na sakavik-krasavik.

— Z tych, kamu ŭžo viarnulisia pašparty, litaralna niekalki čałaviek stali ščaśliŭčykami sa šmatrazovym šenhienam. Varta ŭličyć, što da hetaha ŭ ludziej była vielmi dobraja vizavaja historyja, — patłumačyli ŭ adnym ź vizavych centraŭ Minska.

Dla taho, kab nie atrymać admovu, nieabchodnaje aficyjnaje paćviardžeńnie broni hatela i tranśfieru, a dla hetaha daviadziecca ŭnieści pieradapłatu — časam i ŭsiu sumu za pražyvańnie i kvitki.

Hrecyja

Situacyja z hrečaskim šenhienam ź minułaha hoda nie źmianiłasia. Vierahodnaść atrymać šmatrazovuju vizu pa-raniejšamu małaja, i nieabchodnaść aficyjnaha paćviardžeńnia brani nie źnikła. Raduje tolki toje, što padača dakumientaŭ prachodzić u Minsku. Čakać pašpart daviadziecca kala dvuch tydniaŭ.

Hiermanija

U čałavieka, jaki žadaje atrymać u pašpart šenhien, jość dva varyjanty: abo pradstavić aficyjna paćvierdžanuju broń hatela na čas padarožža, abo pakazać dakumient-zaprašeńnie ŭ Hiermaniju. Ale pry padačy čakaje niuans.

— Usio adbyvajecca ŭ samim konsulstvie, daviadziecca prajści nievialikuju hutarku, — raspaviała vizavaja ahientka Kaciaryna. — Pytajucca zvyčajna pra metu vizitu, i ŭžo zychodziačy z vašaha adkazu dyjałoh atrymlivaje praciah. Šmat chto kaža, što jeduć hladzieć miascovyja słavutaści. Praŭda, paśla pytańnia: «A što vy chočacie ŭbačyć?» hublajucca. My nastojliva raim zahadzia pradumać uvieś čas znachodžańnia ŭ krainie niezaležna ad mety vizitu.

Čarha na niamiecki šenhien vialikaja, tamu čakać svaju vizu daviadziecca minimum da traŭnia, zatoje pašpart vierniecca da vas praz tydzień.

A što z hrašyma?

Kali ŭ 2022 h. 800-900 jeŭra na bankaŭskim rachunku całkam chapała, to ciapier rekamiendujecca mieć nie mienš za 1000-1200. Niuans u tym, što rachunak pavinien być dziejnym, heta značyć, hrošy na jaho nie tolki pavinny prychodzić, ale i časam sychodzić. Daviedku ab ruchu srodkaŭ za apošnija try miesiacy nieabchodna ŭziać u banku prykładna za tydzień da padačy dakumientaŭ na vizu.

Konsulski zbor składaje 35 jeŭra. Vizavy zbor varjirujecca ad 20 da 35 jeŭra ŭ zaležnaści ad krainy. Pry padačy dakumientaŭ u niamieckim konsulstvie apošni nie apłačvajecca.

• 5
• 0
• 2
• 0
• 0
• 18
• 4
• 0