HUR: Nahniatańnie temy pahrozy napadu z boku Biełarusi — rasijskaja infarmacyjnaja śpiecapieracyja. Navat Łukašenka nie vielmi ŭ heta hulaje
U Hałoŭnym upraŭleńni raźviedki ličać, što nahniatańnie temy pahrozy napadu na Ukrainu z boku Biełarusi źjaŭlajecca rasijskaj infarmacyjna-psichałahičnaj apieracyjaj. Słovy pradstaŭnika Hałoŭnaha ŭpraŭleńnia raźviedki Minabarony Andreja Jusava ŭ efiry telemarafonu pieradaje «UP».
«Kanceptualnaje nahniatańnie temy nieadkładnaj vajskovaj pahrozy z boku Biełarusi, jak infarmavała ŭžo Hałoŭnaje ŭpraŭleńnie raźviedki, heta, ułasna, rasijskaje IPSA. Biezumoŭna, pra dyktatara Łukašenku nam usio viadoma, pra režym u Biełarusi. Ale jość abjektyŭnyja rečy: kolkaść udarnaj hrupoŭki, hatoŭnaść sił i srodkaŭ i inšyja momanty, jakija nam dazvalajuć śćviardžać, što na siońnia pahrozy z boku Biełarusi poŭnamaštabnaj naziemnaj apieracyi, jaje ŭdziełu na baku Rasii niama», — skazaŭ Jusaŭ.
Jon paabiacaŭ, što, «kali situacyja źmienicca, adpaviednaja infarmacyja budzie», ale zapeŭniŭ, što «navat na vypadak źmieny situacyi Ukraina hatovaja i adpracavała ŭsie scenary».
«U intaresach mienavita Pucina i tak zvanaj Rasijskaj Fiederacyi maksimalna nahniatać temu mienavita ź Biełaruśsiu. Ale ŭžo i dyktatar Łukašenka nie vielmi ŭ heta hulaje. My niadaŭna bačyli, jak jon vadziŭ za nos Łaŭrova padčas sustrečy, i, z adnaho boku, raskazvaŭ, jak jon lubić Pucina, a potym skazaŭ, što nie bačyć pahrozy z boku Ukrainy, i što Ukraina trymajecca. Heta značyć, nie choča rabić suicydalnych dziejańniaŭ dyktatar Łukašenka», — skazaŭ pradstaŭnik HUR.
Jon taksama zaznačyŭ, što kontrnastupalnaja apieracyja pa vyzvaleńni svaich ziamiel dla Ukrainy «sapraŭdy ciažkaja», ale Ukraina moža vyzvalić svaje ziemli.
«Ukraina vyzvalaje i budzie praciahvać vyzvalać svaje terytoryi. Tak, heta budzie ciažka, ale niepaźbiežna… Paviercie, što jość absalutnaja adekvatnaja i ćviarozaja acenka situacyi i adekvatnyja i ćviarozyja zadačy i dla ŭkrainskich sił abarony, i razumieńnie, što my možam. Dyk voś my sapraŭdy možam vyzvalić našy ziemli».
19 studzienia Alaksandr Łukašenka na sustrečy ź ministram MZS RF Łaŭrovym zajaviŭ, što Ukraina jaho «pryjemna ździŭlaje», bo nie idzie na pravakacyi suprać Biełarusi, chacia «jaje aktyŭna padšturchoŭvajuć».
Łukašenka ŭpieršyniu źjaviŭsia na publicy razam z mamaj Koli22
Kamientary