Dom aficeraŭ u Hrodnie vystavili na prodaž pa simvaličnaj canie ŭ adnu bazavuju vieličyniu. Znajści inviestara za narmalnyja hrošy amal za siem hadoŭ tak i nie ŭdałosia, piša vydańnie «Viačerni Hrodna».
Budynak Doma aficeraŭ (pieršapačatkova — Dom stralca) na vulicy Ažeška pabudavany ŭ 1935 hodzie ŭ styli polskaha kanstruktyvizmu. U 1973-m da jaho zrabili prybudovu pad kancertnuju zału.
Budynak užo niekalki hadoŭ nie vykarystoŭvajecca. Sproby ŭładaŭ pradać jaho, u tym liku na elektronnych tarhach, štoraz byli niaŭdałyja.
U 2015 hodzie dom vystaŭlaŭsia pa pačatkovaj canie 5,15 młn denaminavanych rubloŭ (na toj momant 2,96 młn dalaraŭ). Praz paru hadoŭ tarhi startavali ŭžo z 1,26 młn rubloŭ, h.zn. cana źniziłasia na 80%. U lutym minułaha hoda tarhi taksama nie adbylisia, choć pačatkovy ceńnik składaŭ kala 773,6 tys. rubloŭ.
Ciapier hety abjekt addajuć amal zadarma — za simvaličnyja 37 rubloŭ (adna bazavaja). Adnak, jak vyśvietliła vydańnie ŭ Hrodzienskim harvykankamie, pakupnik budzie abaviazany vykanać niekalki ŭmoŭ.
Pierš za ŭsio jamu treba budzie ŭ karotkija terminy źnieści prybudovu (nie paźniej za šeść miesiacaŭ z momantu zaćviardžeńnia prajektnaj dakumientacyi), a sam Dom aficeraŭ rekanstrujavać na praciahu čatyroch hadoŭ z momantu zaklučeńnia dahavora kupli-prodažu.
Pakupnik zmoža pieratvaryć histaryčny budynak płoščaj bolš za 5 tys. kv. m u zabaŭlalny centr, haścinicu, restaran, kramu ci inšy padobny abjekt.
Dakładnaja data aŭkcyjonu, jaki ładzić «Hrodnaabłmajomaść», stanie viadomaja paźniej.
Kiraŭnica internet-prajektaŭ ANT raspaviała, čamu raptoŭna zvolniłasia ŭ 2022 hodzie i jak źjechała ŭ Aŭstraliju13
Kamientary