Trendy TikTok: čamu ciapier na płatformie papularna ŭsio bežavaje i «estetyčnaje»?
Vydańnie Time na prykładzie papularnaha TikTok-akaŭnta raspaviadaje, što saboj ujaŭlaje słova «estetyčny» ŭ kantekście apisańnia stylu i «sutnaści» čałavieka.
Keli Me maje bolš za 13 miljonaŭ padpisantaŭ u TikTok. Jana vykładvaje videa ab svaim paŭsiadzionnym žyćci. 22-hadovaja dziaŭčyna, sapraŭdnaje imia jakoj Keli Makjuen, adna z zorak «estetyčnaha» TikTok — farmatu videa-kantentu, dzie pakazvajecca čysty, akuratny i vielmi niejtralna afarbavany styl žyćcia.
Pad kožnym videa jana stavić chešteh #aesthetic — heta katehoryja kantentu ŭvohule maje bolš za 190 młrd prahladaŭ na płatformie.
7 śniežnia Keli apublikavała videa, dzie supastaŭlaje vialikuju kolkaść kvitancyj («estetyčnych padatkaŭ») i pryjemny vid kavy ź lodam i bežavaha płanera na takim ža bežavym stale, jakoje nabrała 1 młn padabajek. Heta vyklikała chvalu nierazumieńnia ŭ sacsietkach.
«Navošta ramantyzavać styl žyćcia, jaki zabiraje stolki hrošaj», — pišuć ludzi ŭ kamientarach pad jaje videa.
Paniaćcie «estetyka» doŭhi čas vykarystoŭvałasia dla apisańnia stylu čaho zaŭhodna («antyčnaja estetyka», «katedžnaja estetyka», «hatyčnaja estetyka» i h. d), ale siońnia jano čaściej užyvajecca jak samastojnaje słova i paniaćcie, a kantent takoha typu zachapiŭ sacsietki.
Keli Me letaś zvolniłasia z pracy, kab zajmacca TikTok poŭny pracoŭny dzień i stać u im prafiesijanałkaj. Jana kaža, što matyvacyja stać «toj samaj dziaŭčynaj» sa štodzionnymi treniroŭkami, zdarovym charčavańniem i achajnym domam natchniaje šmat dziaŭčat i matyvuje ich stać lepšaj viersijaj samich siabie.
Estetyka «toj samaj dziaŭčyny» pierajmaje styl asabniaka Kim Kardašjan u Chiden-Chiłz. Asabniak viadomy svaimi niejtralnymi kolerami i minimalistyčnym dyzajnam. Hałoŭny kampanient takoj estetyki — prysutnaść niejtralnych koleraŭ, takich, jak bežavy. Dla bolšaści hledačoŭ TikTok takija tany vielmi pryjemnyja voku.
Časta kantent takoha płana spałučajuć z papularnym audyjafarmatam ASMR — pierahortvajuć staronki knih, kłacajuć pa kłavijatury i h. d. Takija videa supakojvajuć i rassłablajuć, dapamahajuć zmahacca z chvalavańniem.
Śpiecyjalisty kažuć, što takim čynam aŭdytoryja znachodzić emacyjnaje vyjście sa svajho žyćcia, dzie ŭsio pierapoŭniena kolerami i šumam. Prahlad takich rolikaŭ moža stać mikramomantam radaści i biaśpieki.
90% hledačoŭ takoha kantentu — žančyny ad 20 da 40 hadoŭ.
Adnak taki kantent padabajecca nie kožnamu. Niekatoryja ludzi dumajuć, što ramantyzacyja žyćcia ŭ niejtralnych kolerach — heta admova ad samavyražeńnia, indyvidualnaści i, u niekatorych momantach, ad sapraŭdnaha žyćcia. Jany kažuć, što bežavaja estetyka moža zajści zanadta daloka, i tady ludzi prosta prybiaruć jarkija kolery z rečaŭ, jakija atačajuć ich i ichnich dziaciej.
Stvaralniki takoha kantentu śćviardžajuć, što ŭžyvańnie niejtralnych koleraŭ nie abmiažoŭvajecca stvareńniem videa, a źjaŭlajecca ŭłasnym rašeńniem dla žyćcia. Heta dapamahaje zmahacca ź mientalnymi prablemami, takimi, jak absiesiŭna-kampulsiŭnaje zasmučeńnie i chvalavańnie. «Vielmi važna pamiatać, što sacsietki — heta tolki videa, ja pakazvaju častku svajho žyćcia, ale jano nie zaŭždy takoje idealnaje i ŭparadkavanaje», — kaža Kamryn Šoŭz, adna z aŭtarak takich kanałaŭ.
Niekatoryja ludzi sumniavajucca, što ciapierašniaja tendencyja na estetyčnyja videa ŭ TikTok zastaniecca nadoŭha. Moda na chatni dekor mianiajecca. Heta nie pieršy raz, kali niejtralnyja kolery ŭ trendach, i nie apošni. Adnak stvaralniki takoha kantentu spadziajucca, što ich karjera budzie raźvivacca, tamu što pry ŭsich roznych tendencyjach jany mohuć źmianiacca i stvarać supakajvajučy i estetyčny kantent.
Kamientary