Zavobłačny popyt na madelaŭ stałaha vieku — žančyn, jakim 60, 70, 80 i navat 90 hadoŭ, — stvaraje «srebnuju chvalu» ŭ madelnaj industryi. Ich navat spyniajuć u supiermarkiecie, piša The Wall Street Journal.
90-hadovaja Frensis Danskomb, jakaja žyvie ŭ Surei (Vialikabrytanija), pačała pracavać madellu tolki ŭ 82 hady paśla śmierci muža. Kali jaje dačka, madel 60-ci hadoŭ, prapanavała naviedać jaje ahienctva, Frensis naśmichałasia: «Ty, napeŭna, žartuješ». Ciapier jana kaža: «Nasamreč ja liču, što heta byŭ davoli dobry čas, kab pačać pracavać madellu, tamu što hetaja ideja navat nie pryjšła b mnie ŭ hałavu».
U dziacinstvie evakujavanaja padčas vajny, spadarynia Danskomb kinuła škołu, kali joj było 15, i nie mieła surjoznaj karjery, pakul nie stała madellu. Ciapier usio źmianiłasia: ciaham niekalkich hadoŭ svajoj madelnaj pracy jana źniałasia ŭ nižniaj bialiźnie, nadziavała Prada dla zdymak u časopisie Hunger i była na vokładcy Harper's Bazaar UK. Spadarynia Danskomb ličyć svaju misiju natchnieńniem i adstojvańniem intaresaŭ pažyłych žančyn. «Mianie vielmi razdražniaje, kali modnyja redaktary rekłamujuć staramodnaje adzieńnie dla žančyn stałaha vieku», — kaža jana. «Niaŭžo jany nie ŭ kursie taho, što ciapier adbyvajecca? Što my vychodzim na pieršy płan».
Frensis Danskomb — častka novaj «srebnaj chvali» industryi mody i pryhažości. Apošnija hady modnyja brendy kłasa luks, kaśmietyčnyja brendy dla spažyŭcoŭ i masavyja linii adzieńnia pačali adbirać našmat bolš stałych madelaŭ. Niekatoryja ź ich — znakamitaści, ale ŭsio čaściej heta prosta raniej nikomu nie viadomyja žančyny.
Vyhladaje na toje, jak byccam brendy narešcie pryjšli da idei, što žančyny ŭsich uzrostaŭ chočuć bačyć siabie ŭ rekłamie.
Ciapierašnija pradstaŭnicy hihanta pryhažości L'Oréal — Chielen Miren (77), Džejn Fonda (85) i Vijoła Devis (57). Mej Mask, «niepa-mama» tytana Iłona, stała najstarejšaj «dziaŭčynaj» z vokładki CoverGirl u 2017 hodzie — joj tady było 69 (tak, madelny žarhon «dziaŭčyna», jaki vykarystoŭvajecca va ŭsioj industryi, raspaŭsiudžvajecca navat na žančyn, jakija pa ŭzroście — babuli.) U 2015 hodzie brend kłasa luks Celine źniaŭ u svajoj rekłamie srebnavałosuju piśmieńnicu Džaan Dydyjan (jana pajšła z žyćcia krychu bolš za hod tamu). Zusim niadaŭna Saint Laurent pakazaŭ 78-hadovuju Beci Katru i Džoni Mitčeł (79). Madeli, jakim bolš za 50, ciapier rehularna ŭdzielničajuć u defile, u tym liku ŭ Valentino, Simone Rocha, Balenciaga, Rachel Comey i inšych.
Navat z mužčynskaha boku Prada niadaŭna naniała «srebnych lisic» Džefa Hołdbluma (70 hadoŭ) i Viensana Kasiela (56 hadoŭ).
«Kultura, jakuju prapahanduje moładź, prosta sumnaja», — kaža ńju-jorkski dyzajnier Rejčeł Komi, čyj kastynh časta pryvodzicca ŭ jakaści prykładu dla prezientacyi ŭzrostu. Navat na svaim kamiercyjnym sajcie, jak praviła, u zonie dla samych zvyčajnych madelaŭ, jana pakazvaje jarkich ludziej roznych hadoŭ. «Kastynh ludziej usich uzrostaŭ mnie zaŭsiody padavaŭsia bolš naturalnym», — kaža jana, bo, u rešcie rešt, «my tvorym dla ludziej, jakija znachodziacca na roznych etapach i ŭ lubyja momanty ich žyćcia».
Taki zdarovy sens usio jašče sustrakajecca ŭ industryi mody, dzie madeli zvyčajna — padletki abo im 20 ź niečym hadoŭ. Niahledziačy na toje, što poŭnaha adsočvańnia ŭzrostu madelaŭ niama, veb-sajt Fashion Model Directory acaniŭ jaho ŭ 23 hady ŭ 2019-m, a ŭ spravazdačy ab raznastajnaści za 2022 hod ad Fashion Spot byli zafiksavanyja tolki 23 kastynhi asob, starejšych za 50, na vosieńskich pakazach 2022 hoda.
U svaim artykule 1996 hoda pra 16-hadovuju na toj momant Džejms Kinh u časopisie New York Times Dženifier Ihan apisała paradoks markietynhu mody praz maładych dziaŭčat: «Dziaŭčynki-padletki imitujuć darosłaje žyćcio, jakoje im jašče treba budzie pieražyć, dla taho, kab kuplali darosłyja žančyny, jakija potym adčuvajuć siabie pryhniečanymi standartami maładości i pryhažości, jakim jany nie adpaviadajuć. Sardečna zaprašajem u lustranuju zału imidž-kultury».
Za hod da artykuła spadaryni Ihan madel i aktrysu Izabełu Rasielini adchilili ad rekłamavańnia kremu suprać stareńnia. U 1980-ja i 1990-ja hady Rasielini ŭvasablała pryhažość i spakoj u rekłamie parfumieryi i srodkaŭ dohladu za skuraj dla francuzskaj kaśmietyčnaj kampanii Lancôme. Ale kali ŭ 1995-m joj spoŭniłasia 42 hady, jaje kantrakt raptoŭna skončyŭsia.
«Žančyny marać zastavacca maładymi, tamu, kali vam 42 hady, vy bolš nie možacie realizoŭvać hetuju maru», — tak, uspaminaje Rasielini, skazali joj kiraŭniki kampanii. Pra heta jana raspaviała ŭ dakumientalnym filmie «Pra tvar» 2012 hoda i ŭ niekalkich intervju. Letaś spadarynia Rasielini skazała Čarli Roŭzu: «Ja dumaju, što jany zrabili pamyłku».
U sučasnym bolš spryjalnym klimacie 65-hadovaja spadarynia Rasielini znoŭ pačała źjaŭlacca ŭ rekłamie Lancôme. «Značyć, žanočyja mary źmianilisia?» — Rasielini spytała Roŭza pra źmieny. — «Jany nie chočuć być maładymi — jany chočuć być starymi?»
U adkaz Fransuaza Leman, hałoŭny vykanaŭčy dyrektar Lancôme, nazvała spadaryniu Rasielini «idealnym uvasableńniem kaštoŭnaściaŭ brenda Lancôme — kaštoŭnaściaŭ pazityŭnaj i mahutnaj pryhažości».
Niekatoryja z pažyłych madelaŭ, što ciapier u centry ŭvahi, zorki ź niezvyčajnym daŭhalećciem, takija, jak Pet Kliŭlend i Džery Choł, zajavili pra siabie jak maładyja madeli ŭ 1960-ch i 1970-ch hadach adpaviedna. 80-hadovaja Betan Chardysan, adna ź pieršych čarnaskurych supiermadelaŭ, jakija pačali pracavać u 1960-ch, — hierainia dakumientalnaha filma «Nadzvyčajnaja pryhažość», premjera jakoha adbudziecca na kinafiestyvali Sundance ŭ hetym miesiacy.
Spadarynia Chardysan źjaviłasia ŭ kampanii Victoria's Secret u kastryčniku 2022-ha. Nastalhija pa modzie 90-ch vyklikała adnaŭleńnie cikavaści da madelaŭ taho času, u tym liku da Kryści Tarlinhtan, Naomi Kempbeł i Sindzi Kroŭfard, jakim zaraz za 50. (U 2017 hodzie kampanija Versace zładziła ŭźjadnańnie hetych i inšych madelaŭ na svaim podyumie ŭ ramkach šyroka razrekłamavanaha «ŭźjadnańnia supiermadelaŭ».)
Ale ŭ suviazi z tym, što popyt na ŭzrostavych madelaŭ, zdajecca, rekordna vysoki na ŭsich uzroŭniach industryi — ad drukavanaj rekłamy da kampanij u sacyjalnych sietkach i podyuma, — da hetych znajomych tvaraŭ dałučajucca ŭzrostavyja madeli-pačatkoŭcy.
Džordžyja Mejkli-Šrejder, dyrektar ličbavaha raźvićcia i miedyja ŭ kampanii Ford Models, zajaviła, što ŭ apošnija hady jaje ahienctva ładziła adkrytyja kastynhi dla stałych madelaŭ, kab zadavolić novy popyt. Zapyty ad brendaŭ, jakija niekali šukali tolki maładych, chudych, pradkazalnych madelaŭ, usio čaściej stanoviacca bolš šyrokija: «My bačyli, što klijenty chočuć čahości bolš nietypovaha i zapytvajuć bolš stałych madelaŭ abo navat madelaŭ biez peŭnaha ŭzrostavaha dyjapazonu — heta stała novym dla niekatorych tutejšych ahientaŭ».
U 2015 hodzie Rebieka Valentajn stvaryła ahienctva Grey Model Agency ŭ Łondanie, kab zadavolić rost popytu na pažyłych madelaŭ. Jana śpiecyjalizujecca, pa jaje słovach, na «madelach, starejšych za 50 hadoŭ, čyje tvary raspaviadajuć historyju» (spadarynia Danskomb — adna ź jaje madelaŭ). Pa słovach Rebieki, z taho času, jak jana adkryła svajo ahienctva, «my bačyli vybuch» kolkaści starejšych madelaŭ, u tym liku «srebnavałosych modnic» i «andrahinnych zajčykaŭ-johaŭ». Raptam, pa jaje słovach, sacyjalnyja sietki pačali abjadnoŭvać «plamiony pažyłych ludziej ad #silversisters» da «#fitoverfifty».
«Jany ŭsie skardziacca na toje, što na ich nie źviartajuć uvahi, — skazała jana, — ale bolš za toje, jany źjaŭlajucca zakrytym rynkam dla brendaŭ, čyje miedyjapakupniki z usich siłaŭ namahalisia vyjści na ich rynak pa starych kanałach».
Jak i spadarynia Danskomb, Žaślin Baduen, rekvizitny stylist ź Ńju-Jorka, pačała pracavać madellu ŭ bolš stałym vieku. Ciapier joj 64, Baduen padpisała kantrakt sa svaim ahientam u 60 hadoŭ i z taho času stabilna pracavała, spałučajučy štodzionnuju pracu i bolš prybytkovyja vystupy madeli. Jaje pieršaj pracaj byŭ udzieł u šou Rejčeł Komi, taksama jana prezientavała džynsy (Madewell), srodki dla vałasoŭ (Virtue), makijaž (Bare Minerals) i antykvaryjat (1stdibs).
Žaślin kaža, što časta jana — adziny čałaviek na zdymačnaj placoŭcy ŭ svajoj uzrostavaj hrupie. «Dla inšych madelaŭ ja — vyklučeńnie», — skazała jana. — Takim čynam, usie jany ściakajucca da mianie. Jany ŭsie chočuć viedać, u čym maje sakrety, jak ja heta rablu i jak doŭha hetym zajmajusia».
Pa jaje słovach, u pieršyja jaje hady pracy madellu vizažysty na zdymačnaj placoŭcy nie viedali, što rabić z bolš uzrostavaj skuraj. Jany pasypali jaje pudraj, jak robiać z maładymi žančynami, i nie viedali, jak pudra asiadzie ŭ tonkich zmorščynkach.
Jana kaža, što žančyny paznajuć i padychodziać da jaje ŭ takich miescach, jak praduktovaja krama ci balnica, i kažuć, što bačyć u rekłamie kahości padobnaha da jaje — važna.
«Kali vy maładaja madel, u peŭnym sensie vy nie takaja ŭpłyvovaja, tamu što heta čakanaja situacyja. Ale, što datyčyć mianie, heta prymušaje žančyn maich hadoŭ adčuvać siabie dobra, — kaža Žaślin, — i heta vielmi pryjemna.
Pa słovach spadaryni Danskomb, jaje praca jak 90-hadovaj madeli zaklučajecca ŭ tym, kab paviedamić: «Vy nie idealny čałaviek. Vy prosta prykład taho, da čaho kožny moža imknucca».
Kamientary
17,71 mienia siehodnia snova nakryło )
nu prosto včiera čto-to było pro 71%, a siehodnia eti
17,71 no v mietrach ))