Rasijskaje ŭvarvańnie va Ukrainu pajšło nie tak, jak płanavaŭ Uładzimir Pucin. Pa słovach byłoha kiraŭnika vajskovaj raźviedki Finlandyi, hienierał-majora Pieka Toviery, rasijanie, adnak, rychtujuć novy nastup, jaki, chutčej za ŭsio, adbudziecca ŭ pačatku nastupnaha hoda, paviedamlaje onet.pl.
«Abaraniacca ad ukrainskich vojskaŭ dla Pucina źnievažalna i padtočvaje padtrymku vajny rasijanami. Akramia taho, isnuje pahroza novych ukrainskich nastupaŭ. Ale stvareńnie nastupalnaha patencyjału patrabuje času. Rasija maje abmiežavanyja mahčymaści navučać i ekipiravać reziervistaŭ dla papaŭnieńnia čaściej va Ukrainie», — napisaŭ Toviery ŭ sieryi tvitaŭ.
Finski vajskoviec taksama zajaviŭ, što rasijanie pačnuć novaje nastupleńnie ŭ 2023 hodzie. «Nieabaviazkova ŭ siaredzinie zimy (…). Ale, mahčyma, viasnoj. Heta daje Rasii 3-4 miesiacy, kab mabilizavać i padrychtavać bolš reziervistaŭ i atrymać nieabchodnyja materyjały», — dadaŭ Toviery.
Na jaho dumku, ataka rasijan ź Biełarusi, naprykład na Kijeŭ, «spakuślivaja», ale składanaja z-za vialikaj adlehłaści i dobraj padrychtoŭki ŭkraincaŭ. «Paŭnočna-ŭschodniaja Ukraina łahistyčna składanaja z-za vialikich adlehłaściaŭ. Kali nie atrymałasia minułaj zimoj, to, napeŭna, nie atrymajecca i ŭ 2023 hodzie», — napisaŭ Toviery.
Kudy moža napaści Pucin? Vajskoviec raskryvaje mahčymy płan
Jak śćviardžaje Toviery, ruskija mohuć nastupać u kirunku Zaparožža. «Łahistyku praściej arhanizavać i zabiaśpiečyć, i prasoŭvańnie tam źniziła b niebiaśpieku taho, što ŭkraincy pierarežuć suchaputny kalidor z Krymam», — napisaŭ finski vajskoviec i adznačyŭ, što «ŭsiudy, dzie adbyvajecca ataka, budzie niekalki dyviersijnych atak, kab abmiežavać ukrainskija reziervy».
Pa słovach Toviery, budučy rasijski nastup nie budzie maštabny, nie budzie pahražać Ukrainie fundamientalna i nie źmienić chodu vajny.
«Ukraincy demanstrujuć dobruju taktyku i dobra manieŭrujuć u palavych umovach. Ruskija taksama vučacca, ale, napeŭna, nie hatovyja da takich chutkich nastupalnych dziejańniaŭ», — padahulniŭ vajskoviec.
Kamientary