Elektronnaja pošta bolš nie rulić. Na zamienu paštovym servisam prychodziać sacyjalnyja sietki dy mikrabłohi. Takija, jak papularnyja rasijskija servisy «vkontaktie» i «odnokłaśśniki». Albo značna bolš viadomyja ŭ śviecie facebook, twitter i myspace.
Vałodajučy asnoŭnaj ułaścivaściu elektronnaj pošty — mahčymaściu chutka pieradavać tekstavyja paviedamleńni — jany dazvalajuć karystacca taksama i inšymi srodkami kamunikacyi. Mahčymaściu stvareńnia fota i videaarchivaŭ na asabistych staronkach, kamientavańnia zapisaŭ i archivaŭ znajomych, dasyłańnia dopisaŭ z mabilnych prystasavańniaŭ. Z dapamohaj sacyjalnych sietak možna daviedacca ab čałavieku proćmu infarmacyi. Ad taho, dzie jon zaraz znachodzicca, da prablemaŭ u asabistym žyćci. Nijaki paštovy servis hetaha zrabić nie dazvalaje.
Kali sto hod tamu ludziej zadavalniaŭ miesiačny termin čakańnia na list, a paźniej tydniovy termin ličyŭsia najlepšym varyjantam, to z raspaŭsiudžańniem internetu i elektronnaj pošty ŭsie my pryzvyčailisia da maksimum paŭhadzinnaha čakańnia na paviedamleńni.
Adnak siońnia heta ŭžo mała kaho zadavolić.
Ludzi prahnuć naŭprostavaha kamunikavańnia — biez samych drobnych zatrymak, navat praciahłaściu ŭ niekalki chvilin. I sacyjalnyja sietki, ź ich mahčymaściu adsočvać paviedamleńni dy samyja apošnija abnaŭleńni, składajuć paśpiachovuju kankurencyju siervisam elektronnaj pošty. Što praŭda, niekatoryja ź ich sprabujuć pierajmać pieravahi sacyjalnych sietak. U pryvatnaści, siervis Gmail užo daŭno prapanoŭvaje mahčymaść razmovaŭ u čacie, jaki źjaŭlajecca dadatkam da asabistaj paštovaj skryni. A papularny ŭ Biełarusi rasijski mail.ru prapanoŭvaje karystalnikam ułasnaje padabienstva sacyjalnaj sietki «Moj Mir». Adnak padobnyja sproby zacikavić karystalnikaŭ nie prynosiać žadanych vynikaŭ. Kolkaść ludziej, što karystajucca pasłuhami elektronnaj pošty, u śviecie pakul pavialičvajecca. Pavodle daśledčaha ceńra «Nielsen Co», u ZŠA i krainach Zachodniaj Jeŭropy ŭ 2009 hodzie pasłuhami raznastajnych paštovych servisaŭ pačało karystacca na 21% bolš ludziej, čym ŭ minułym hodzie. Heta značny rost. Adnak kolkaść karystalnikaŭ sacyjalnych sietak i mikrabłohaŭ uzrasła jašče bolš — na 31%.
Paŭstaje cikavaja situacyja.
Internet, jaki spačatku značna paskoryŭ praces abmienu infarmacyjaj i aščadžaŭ čas, zaraz hety samy čas adbiraje.
Na sacyjalnyja sietki my tracim značna bolš času, čym na elektronnuju poštu. Apošniaja była i zastajecca tolki srodkam abmienu infarmacyi. Jaki vykarystoŭvaŭsia pa nieabchodnaści i dla zručnaści. A ŭ sacyjalnych sietkach čałaviek prosta vymušany abmieńvacca infarmacyjaj. Dadavańnie fotazdymkaŭ u profili, papaŭnieńnie asabistych źviestak, ułasnych zacikaŭleńniaŭ, kamientavańnie padziej i vypadkaŭ z žyćcia šmatlikich siabroŭ — usio heta vielmi zaciahvaje i źjadaje proćmu času. Nie dziva, što niekatoryja pracadaŭcy abmiažoŭvajuć dostup da sacyjalnych sietak dla svaich supracoŭnikaŭ. Jany — sacyjalnyja sietki — zdolnyja stvaryć alternatyvu realnamu žyćciu. I tady my čujem paviedamleńni ab zabojstvach praz status u facebook.
Napeŭna, sacyjalnym sietkam nie ŭdasca całkam vyciaśnić paštovyja siervisy. Tolki voś listy, dasłanyja pa elektronnaj pošcie, chutka stanuć źjavaj radziejšaj, jak radziejšymi stali listy papiarovyja.
Jak ciapier vyhladaje palitźniavoleny Juraś Ziankovič. Jon nie ŭ robie, a ŭ cyvilnym kaściumie10
Kamientary