Za repost paviedamleńnia pra dvuch siłavikoŭ žychar Navahrudčyny atrymaŭ dva hady kałonii
Staŭ viadomy prysud pa kryminalnaj spravie ŭ dačynieńni da žychara Navahrudčyny Viktara Pilžysa. 13 kastryčnika jaho asudzili za repost paviedamleńnia pra dvuch siłavikoŭ z Vaŭkavyska na dva hady kałonii. Spravu Pilžysa razhladaŭ sud Karelickaha rajona, paviedamlaje «Viasna».
Viktar Pilžys — žychar vioski Ščorsy Navahrudskaha rajona. Mužčynu abvinavacili ŭ tym, što jon zrabiŭ repost na svajoj staroncy ŭ sacyjalnaj sietcy «Adnakłaśniki» dopisu z hrupy «Hrodnienskaja Obłasť Pieriemien!». Samo paviedamleńnie pryśviačałasia dvum rabotnikam ustanoŭ pakarańniaŭ. Tak, pra opierupaŭnavažanaha papraŭčaj kałonii № 11 Kiryła Dyryndu tam havaryłasia, što jon — «udzielnik ździekaŭ z palityčnych źniavolenych u Vaŭkavyskaj kałonii». A pra milicyjanta papraŭčaj ustanovy adkrytaha typu № 29 Maksima Žuka zhadvałasia jak pra «saŭdzielnika ździekaŭ z palityčnych viaźniaŭ na Vaŭkavyskaj chimii». Da paviedamleńnia byli prymacavanyja fatahrafii abodvuch siłavikoŭ, a taksama ich asabistyja identyfikacyjnyja numary, telefony i adrasy. Akramia taho, paviedamleńnie padavała siłavikoŭ jak «dvuch p*donkaŭ».
Za repost hetaha paviedamleńnia Viktara Pilžysa abvinavacili (i paśla asudzili) adrazu pavodle troch artykułaŭ Kryminalnaha kodeksa:
— art. 188 — «paklop»,
— č. 3. art. 203-1 — «niezakonnyja dziejańni ŭ dačynieńni da infarmacyi ab pryvatnym žyćci i piersanalnych danych, ździejśnienyja ŭ dačynieńni da asoby ŭ suviazi z ažyćciaŭleńniem joj słužbovaj dziejnaści»,
— art. 369 — «abraza pradstaŭnika ŭłady».
U abvinavačvańni fihuravaŭ pieryjad «raspaŭsiudu niezakonnaj infarmacyi» — z 24 lutaha pa 23 sakavika 2022 hoda. U hety čas, jak śćviardžaje abvinavačvańnie, Pilžys, majučy hety repost, «uvieravaŭ u svaju ŭsiodazvolenaść, biespakaranaść, publična vykazaŭ svajo staŭleńnie da padziej hramadska-palityčnaha žyćcia, pravodziŭ aktyŭnuju ahitacyju, nakiravanuju ŭ tym liku na abvastreńnie palityčnaj napružanaści ŭ krainie».
Da suda da Viktara Pilžysa była ŭžytaja miera strymańnia ŭ vyhladzie chatniaha aryštu — z 12 vieraśnia 2022 hoda. Heta značyć, što mužčynu zabaraniałasia vychodzić z doma, karystacca internetam i suviaźziu (za vyklučeńniem nadzvyčajnych akaličnaściaŭ).
Akramia prysudu ŭ dva hady kałonii, sud abaviazaŭ Viktara Pilžysa vypłacić dvum siłavikam 10 000 biełaruskich rubloŭ u jakaści kampiensacyi ich maralnaj škody.
Viktar Pilžys pasprabavaŭ abskardzić hety prysud — ale jaho pakinuli bieź źmien.
Kamientary