Kolkaść naftavych tankieraŭ, jakija stajać u Čornym mory ŭ čakańni pravierki tureckimi ŭładami, za noč pavialičyłasia jašče na piać. Takim čynam, u čarzie na prachod praz praliŭ Basfor u Mižziemnaje mora znachodzicca ŭžo 16 tankieraŭ.
Jak paviedamlaje Reuters, zachodnija i tureckija aficyjnyja asoby praciahvajuć pieramovy ab mierach, jakija b dapamahli skaracić čerhi pry prachodzie sudoŭ praz čarnamorskija pralivy, jakija ŭźnikli paśla ŭviadzieńnia Zachadam embarha na transparciroŭku rasijskaj nafty.
Z 5 śniežnia ŭ Jeŭrasajuzie ŭstupiła ŭ siłu embarha na rasijskuju naftu, jakaja pastaŭlajecca marskim šlacham; z hetaha ž dnia krainy «Vialikaj siamiorki», Jeŭrasajuz i Aŭstralija ŭviali stol cen na rasijskuju naftu ŭ 60 dalaraŭ za baral — pastaŭki pa canie vyšej za hetu nie mohuć być zastrachavanyja ŭ kampanijach hetych krain, a jany faktyčna kantralujuć uvieś suśvietny rynak.
Akramia hetaha, Turcyja z pačatku hetaha miesiaca ŭviała ŭłasnyja miery, patrabujučy ad sudnaŭładalnikaŭ paćvierdžańnie najaŭnaści strachoŭki, jakaja pakryvaje prachod tankiera praz pralivy abo stajanku ŭ tureckich partach.
Pa paviedamleńni ekśpiedytarskaha ahienctva Tribeca, da paŭnočnaha ŭvachodu ŭ Basfor padyšło jašče piać tankieraŭ daŭžynioj bolš za 200 mietraŭ, jakija nakiroŭvajucca dalej u Mižziemnaje mora, u dadatak da adzinaccaci, jakija stali na jakar tam ža dniom raniej. Pa danych ahienctva, pakul nivodnaje sudna nie atrymała dazvołu na prachod.
Bolš na poŭdzień, la ŭvachodu ŭ praliŭ Dardanieły, jašče dzieviać tankieraŭ čakajuć dazvołu na dalejšy prachod u paŭdniovym napramku — heta na try sudny mienš, čym dniom raniej.
Kamientary