«Vy 124-y ŭ čarzie na prahlad». Biełarus raskazaŭ, praz što daviałosia prajści, kab źniać žytło ŭ Łondanie

«Płanavali ŭkłaścisia ŭ 1100 funtaŭ — ličycca, što heta minimalny košt kvatery tut»

Sama schiema arendy kvatery ŭ Brytanii vyhladaje prostaj: zapisvaješsia na prahlad i adpraŭlaješ svaju prapanovu. Kali jana spadabałasia inšamu boku, vypłačvaješ depazit. Dalej ciabie praviaraje ahienctva, i, kali ty prajšoŭ pravierku, płaciš hrošy za pieršy miesiac arendy i zadatak za 5 tydniaŭ. 

Pa fakcie akazałasia kudy składaniej.

Pieršapačatkova Aleh z partnioram bačyli dla siabie takuju kvateru: «Nam byli patrebnyja dva pakoi — haścinaja i spalnia. Varyjant sa studyjaj my adrazu adkinuli, bo abodva pracujem z domu i nam byli patrebnyja dva pamiaškańni, kab možna było razyścisia pa roznych pakojach. Taksama nam było važna zastavacca jak minimum u pryharadzie Łondana, a nie ŭ inšym horadzie Brytanii, bo moj partnior zajmajecca raślinami i ŭ nas jość łahistyčnyja kanały, što dastaŭlajuć raśliny ŭ Łondan i na ŭskrainy. My płanavali ŭkłaścisia ŭ 1100 funtaŭ — ličycca, što heta minimalny košt kvatery tut, ale nam nie ŭdałosia».

Pry pieršym zvanku ŭ ahienctva aŭtaadkazčyk paviedamiŭ Alehu: jon zajmaje 124-je miesca ŭ čarzie na prahlad.

Pavialičyć

Biełarus dzielicca łajfchakami, jakija jon zrazumieŭ padčas pošukaŭ kvatery ŭ Łondanie: prahladvać sajty z prapanovami žylla treba raz na hadzinu, kali niešta spadabałasia — adrazu zvanić, pahadžacca na prahlad u luby čas. Pieršyja 30 kandydataŭ biez zvyčki palić, a taksama biez žyvioł i dziaciej majuć šans pabačyć kvateru.

Rynak arendnaha žylla ŭ Łondanie mužčyna apisvaje tak: «Zbolšaha heta damy, zbudavanyja adzin z adnym tak, kab ściana adnaho doma pierarastała ŭ druhi dom, i adzin dom zvyčajna padzieleny na dźvie-čatyry siamji. To-bok vy možacie zajmać pavierch całkam abo pavierch moža być padzieleny na niekalki kvater. Žytło ŭ takich viktaryjanskich domikach zajmaje niedzie 70% usiaho rynku, i prapanova maleńkaja, tak što znajści kvateru vielmi ciažka».

Šmat damoŭ u Łondanie, raskazvaje Aleh, nielha rekanstrujavać, bo jany pryznanyja histaryčnaj spadčynaj. Naprykład, bahata ŭ jakich damach niama škłopakietaŭ, i pastavić ich nielha, tak što ad vulicy kvateru adździalaje tolki adno škło. Za košt hetaha zimoj moža być vielmi choładna, ale, pakul akno cełaje, brytancy jaho nie zamieniać.

«Bolš za 500 kvater u internecie, kala 200 zvankoŭ i prykładna 30 prahladaŭ»

Kali patencyjnaja kvatera znojdziena, čas adsyłać haspadaru svaju prapanovu: «Žadańnie źniać kvateru nie na hod, a naprykład, na dva, budzie dla vas plusam, bo ŭsie chočuć zdavać kvateru jak maha daŭžej. Taksama vy prapanoŭvajecie, kolki hatovyja płacić za kvateru: heta mohuć być zajaŭlenyja 1200 funtaŭ, a možna prapanavać rejz, to-bok canu na 50 funtaŭ bolš. Kali budzie prymacca rašeńnie, rejz budzie pieravahaj».

Pavialičyć

Pieršyja prapanovy z boku Aleha łondanskija arandadaŭcy praihnaravali. Ich nie zadavalniali try rečy: u Ražkova z partnioram nie było kredytnaj historyi, ich prybytki byli nie z Brytanii (i ich było składaniej pravieryć), sumarny prybytak abodvuch mužčyn za miesiac musiŭ być u try razy bolšy za košt arendy

— u realnaści prybytak akazaŭsia na miažy hetaj sumy. Biełarus tłumačyć, što kali arandatary padpisvajuć kantrakt ab zdačy kvatery, ich vielmi ciažka adtul vysielić, navat kali jany nie płaciać. Tamu łendłordy sprabujuć nie dapuścić u kvateru niepłaciežazdolnych kvatarantaŭ.

Tady Aleh z partnioram pačali prapanoŭvać rejz u 50—70 funtaŭ, i im stali pierazvońvać patencyjnyja arandadaŭcy. Mužčyny daviedalisia, što ź ich umovami mahčyma źniać kvateru, tolki kali apłacić jaje adrazu za šeść miesiacaŭ, i z hetym patrabavańniem daviałosia źmirycca.

Potym pačaŭsia etap pravierki infarmacyi pra arandataraŭ: «Pravierka zaniała tydzień, i kožny dzień u mianie było ŭsio bolš sivych vałasoŭ ad strachu, što my nie projdziem. Pa kožnym punkcie pryjšłosia napisać tłumačeńni i adpravić dakumienty. My prajšli».

Ahienctva, što pravodziła pravierku, zapytvała nastupnuju infarmacyju: rekamiendacyju z papiaredniaha miesca žycharstva i paćviardžeńnie najaŭnaści dastatkovaha zarobku, a taksama tłumačeńnie pachodžańnia hrošaj na rachunkach.

Pavialičyć

«Z pačatku pošuku kvatery prajšło 2 miesiacy. My prahledzieli bolš za 500 kvater u internecie, zrabili kala 200 zvankoŭ i źjeździli prykładna na 30 prahladaŭ», — padsumoŭvaje Aleh svoj dośvied.

U vyniku mužčyny pasialilisia ŭ dobrym rajonie: «My źniali adnaspalnuju kvateru ŭ adnym z centralnych rajonaŭ Łondana. Ź minusaŭ — heta social house, to-bok šmatkvaterny dom, pieršapačatkova zbudavany jak sacyjalnaje žytło. U nas kvatera z kaśmietyčnym ramontam, a jašče ŭ joj nie było anijakaj mebli, ale tut heta norma».

Aleh raskazvaje, što ŭ Łondanie kvatery tradycyjna zdajucca biez mebli, u najlepšym vypadku tam moža być chaładzilnik i hazavaja plita, a ŭsiu meblu zavoziać kvataranty. Mužčyna nie ŭ zachapleńni ad ciepłaizalacyi ŭ kvatery, ale kaža, što žyvie niedaloka ad Temzy i ŭ duža cikavym rajonie.

Biudžet na kvateru, na žal, daviałosia pašyryć, bo za 1100 funtaŭ u Łondanie možna źniać tolki kiepskuju kvateru i vielmi daloka ad centra. Tamu vyrašyli dapłacić jašče 250 funtaŭ, kab atrymać žytło, «u jakim pryjemna znachodzicca».

Čytajcie taksama:

«Radujusia, jak dzicia navahodniaj jołcy». Minčanka raspaviała, jak pradała svoj kvietkavy biznes u Biełarusi i pierajechała z mužam u Paryž

«Zatoje soniečna i svabadniej, čym u Biełarusi». Piać miesiacaŭ kašmarnaj śpioki, ale biaśpiečna nastolki, što možna kvatery nie zamykać. Biełaruski raskazali pra žyćcio ŭ Katary

Patrebnyja mocnyja niervy i surjoznyja ŭkładańni. Jak pačać biznes pa zdačy kvatery na sutki

• 3
• 0
• 2
• 7
• 17
• 8
• 8
• 0