Niemcy zabili pieršymi, ale japoncy adkazali dvuma miačami i pieramahli. Heta jašče adna siensacyja paśla ŭčarašniaha kanfuzu Arhienciny.
Matč prachodziŭ na stadyjonie Chalifa ŭ katarskaj stalicy Dosie. Hałoŭnym arbitram byŭ Ivan Siśnieras z Salvadora. Favarytam matča bukmiekiery, naturalna, ličyli zbornuju Hiermanii.
Pierad matčam niamieckija hulcy na kamandnym fota ŭsie razam prykryli rot rukami. Heta źviazana z tym, što FIFA zabaraniła niekalkim zbornym vykarystoŭvać kapitanskija paviazki ŭ padtrymku ŁHBT na čempijanacie.
«My chacieli vykarystoŭvać našu kapitanskuju paviazku, kab adstajać kaštoŭnaści, jakich my prytrymlivajemsia ŭ zbornaj Hiermanii: raznastajnaść i ŭzajemnaja pavaha. Razam ź inšymi narodami my chacieli, kab naš hołas byŭ pačuty. Havorka išła nie pra palityčnuju zajavu — pravy čałavieka nie padlahajuć abmierkavańniu. Heta varta ŭsprymać jak naležnaje, ale heta ŭsio jašče nie tak. Voś čamu heta paviedamleńnie tak važna dla nas. Admović nam u paviazcy — toje ž, što pazbavić nas hołasa. My staim na svajoj pazicyi», — havorycca ŭ zajavie zbornaj Hiermanii.
Pieramoha japoncaŭ akazałasia valavoj, napačatku jany prajhravali. I ŭvohule Hiermanija ŭ pieršaj pałovie matča vyrazna daminavała, choć u vialikuju halavuju pieravahu heta nie vyliłasia.
Tym nie mienš, na 33-j chvilinie Iłkaj Hiundahan zabiŭ ź pienalci pieršy miač i vyvieŭ zbornuju Hiermanii napierad. Z takim likam kamandy syšli na pierapynak i bolšuju čatku druhoha tajma jon taksama zachoŭvaŭsia.
Ale niezadoŭha da kanca matča japoncy ŭsiaho za 9 chvilin zabili dva hały. Spačatku na 75-j chvilinie Rycu Doan zabiŭ pieršy miač u adkaz, a na 83-j Takuma Asana ŭstalavaŭ, jak akazałasia, kančatkovy vynik matča. Cikava, što abodva aŭtary japonskich hałoŭ hulajuć u niamieckaj Bundeślizie.
Hiermanija, darečy, jak i Arhiencina, pravaliłasia na mundyjali-2018 u Rasii. Niemcy čatyry hady tamu nie vyjšli z hrupy, zaniaŭšy ŭ svaim kvartecie haniebnaje apošniaje miesca. A voś na čempijanacie 2014 hoda jany pieramahli.
A voś tak śviatkujuć pieramohu ŭ Japonii.
Čytajcie taksama:
Siensacyja: Saudaŭskaja Aravija pieramahła Arhiencinu
Na čempijanacie śvietu pa futbole anhličanie razhramili irancaŭ 6:2. Ale matč zapomnicca nie likam
A moža, usio ž varta, kab Łukašenka ŭdzielničaŭ u pieramovach pa Ukrainie?36
Kamientary