Hienieralny sakratar NATA: Vajna va Ukrainie pavinna zaviaršycca za stałom pieramovaŭ
Kiraŭnik Paŭnočnaatłantyčnaha aljansu Jens Stołtenbierh vykazaŭ upeŭnienaść, što vajna pamiž Rasijaj i Ukrainaj zavieršycca mirnymi pieramovami. Razam z tym u intervju Bi-bi-si ŭ sieradu ŭviečary Jens Stołtenbierh skazaŭ, što kali Ukraina pierastanie supraciŭlacca ŭ adnabakovym paradku, to spynić isnavańnie jak niezaležnaja i suvierennaja dziaržava.
Tamu rašeńnie ab spynieńni vajny pavinna być, pa jaho słovach, uzajemnym.
«My ŭsie chočam miru i ŭzhodnienaha vyrašeńnia [kanfliktu]. Ale ŭ toj ža čas my pavinny razumieć, što kali Rasija i prezident Pucin spyniać bajavyja dziejańni i Ukraina taksama spynić bajavyja dziejańni, to tady nastupić mir», — skazaŭ Stołtenbierh.
Taki padychod sustrakaje nieprymańnie ŭ Kijevie, dzie miarkujuć, što spynieńnie bajavych dziejańniaŭ i pačatak mirnych pieramovaŭ pryviaduć da zamarožvańnia kanfliktu, što nivieliruje niadaŭnija pośpiechi ŭkrainskich vojskaŭ, zafiksuje novuju liniju raźmiežavańnia i daść Rasii nieabchodnuju pieradyšku, kab adnavić svaju bajazdolnaść i paŭtaryć uvarvańnie ŭžo z novych rubiažoŭ.
Prezident Ukrainy Uładzimir Zialenski nastojvaje, što pieramovy z Maskvoj mahčymyja tolki paśla taho, jak usie rasijskija vojski całkam pakinuć zachoplenyja terytoryi.
«U niejki momant hetaja vajna, pa ŭsioj vierahodnaści, zavieršycca za stałom pieramovaŭ, ale my viedajem, što vynik hetych pieramovaŭ ciesna źviazany z raskładam sił na poli boju», — dadaŭ hienieralny sakratar NATA.
U razmovie z karespandentam Bi-bi-si Stołtenbierh taksama vykazaŭsia pra incydent z rakietaj, jakaja ŭzarvałasia na terytoryi Polščy, ahułam paŭtaryŭšy tyja ž słovy, što hučali ciaham hetaha dnia ad inšych zachodnich lidaraŭ.
Jon skazaŭ, što rasśledavańnie, jakoje pavinna vyśvietlić abstaviny zdareńnia i prynaležnaść rakiety, usio jašče praciahvajecca i kančatkovyja vysnovy rabić zaŭčasna.
«Vojny — heta niebiaśpiečnaja reč, i pamyłki zdarajucca», — skazaŭ Stołtenbierh, biez abvinavačvańniaŭ u adras taho ci inšaha boku. Pa jaho słovach, što b ni adbyłosia pazaŭčora, va Ukrainy jość prava na samaabaronu.
Chto pavinien być prezidentam Biełarusi ŭ pierachodny pieryjad? Razvažajuć viadomyja biełarusy26
Kamientary