Hramadstva44

«Radujusia, jak dzicia navahodniaj jołcy». Minčanka raspaviała, jak pradała svoj kvietkavy biznes u Biełarusi i pierajechała z mužam u Paryž

Minčanka Karyna paŭhoda tamu pierajechała z mužam u Paryž — adzin z samych pryhožych haradoŭ Jeŭropy. Što važna viedać pra žyćcio ŭ Francyi, kolki kaštuje arenda kvatery i čym Paryž adroźnivajecca ad Minska, Karyna raspaviała Realting.

Usie fota: asabisty archiŭ hierojaŭ

«My vyrašyli, što pierajezd budzie cikavym žyćciovym dośviedam»

Karyna naradziłasia ŭ Minsku. U Biełarusi ŭ jaje było dva sałony kvietak i dekoru, jakimi jana zajmałasia apošnija piać hadoŭ.

«U Francyju my z mužam pierajechali paŭhoda tamu. Mužu zrabili prapanovu pa pracy, u jakuju ŭvachodziŭ pierajezd u Paryž.

Niejki čas my padumali i vyrašyli, što heta budzie cikavym žyćciovym dośviedam, jaki pašyryć naš kruhahlad. Ryzyknuli — i tak apynulisia ŭ Francyi», — raspaviadaje jana.

Na pierajezd u siamji było kala dvuch miesiacaŭ. U samim pracesie nie było asablivych ciažkaściaŭ, akramia zboru šmatlikich rečaŭ i pryniaćcia rašeńniaŭ adnosna taho, što brać z saboj, a što pakinuć u Minsku.

Taksama treba było razabracca, što rabić ź biznesam.

«Zajmacca dystancyjna ja b nie zmahła, bo ŭ kvietkavaj śfiery patrebnaja asabistaja prysutnaść: pravierka kvietak u chaładzilnikach, pryniaćcie pastavak, zakup novaha materyjału i h.d. U vyniku ja pradała svaju spravu. Heta było niaprostym rašeńniem: emacyjna i psichałahična vielmi składana zrazumieć, što chutkim časam na pracu (dzie ty pravodziŭ uvieś svoj čas) iści nie treba».

Karynie pašancavała, i dakumientami dla pierajezdu jana nie zajmałasia. Addała mužu svajo paśviedčańnie ab naradžeńni — na hetym jejny ŭdzieł skončyŭsia. Kampanija, u jakoj pracuje muž, znajšła ahienctva pa pierajeździe, padatkovych kansultantaŭ i h.d.

«Ź ich boku była i jość vializnaja padtrymka», — kaža Karyna.

«Nie majučy francuzskaha rachunka ŭ banku, vy nie možacie arandavać žyllo, a biez arandavanaha žylla vy nie možacie adkryć bankaŭski rachunak»

Pieršyja niekalki miesiacaŭ siamja žyła ŭ centry Paryža. Heta časovaje žyllo im dała kampanija muža.

Kala miesiaca Karyna prahladała abjavy na sajtach arendy nieruchomaści — byli varyjanty jak u centry Paryža, tak i ŭ pryharadzie. Ahienctva pa pierajeździe arhanizoŭvała ŭsie sustrečy pa žytle i zajmałasia źviazanymi z hetym pytańniami.

«U vyniku my źniali nievialikuju kvateru za paru kiłamietraŭ ad Paryža: tut vielmi śviežaje pavietra, šmat parkaŭ i lasoŭ dla špacyraŭ, tenisnyja korty, pali dla holfa i h.d. Taksama akazałasia plusam, što ŭ nas tut jość svajo biaspłatnaje parkovačnaje miesca, bo ŭ Paryžy ŭsia parkoŭka płatnaja i vielmi darahaja. Kali žyć u horadzie, u miesiac nieabchodna addavać za parkoŭku kala €250», — raspaviadaje Karyna.

Pavodle jaje, samastojna znajści žyllo ŭ Paryžy značna bolš składana i doŭha. Cana arendy nie pavinna pieravyšać 1/3 aficyjnaha miesiačnaha zarobku. Taksama nieabchodny harant: albo hramadzianin Francyi z peŭnym vysokim uzroŭniem dachodu, albo francuzskaja kampanija, dzie vy pracujecie.

«A jašče tut možna sutyknucca z paradaksalnym zamknionym kołam: sprava ŭ tym, što, nie majučy francuzskaha rachunka ŭ banku, vy nie možacie arandavać žyllo, a biez arandavanaha žylla vy nie možacie adkryć bankaŭski rachunak. Ščyra kažučy, ja nie viedaju, jak samastojna ŭsie hetyja prablemy vyrašyć. Biurakratyja ŭ Francyi kvitnieje».

Što tyčycca koštaŭ na arendu, u Paryžy i dobrych rajonach pryharada arenda kvatery 50 kv. m kaštuje ad € 1800 + kamunalnyja płaciažy (€ 100-200 u zaležnaści ad siezona). Čaściej za ŭsio žyllo zdajecca biez mebli. Ceny na nieruchomaść tut taksama vielmi vysokija (viadoma, usio zaležyć ad rajona, pabudovy i h.d).

Kupić kvateru ŭ Paryžy zaraz možna ŭ miežach €9-12 tysiač za kvadratny mietr. Siaredni ž košt «kvadrata» pa ŭsioj Francyi — € 4-6 tysiač (čym bližej da centra, tym daražej).

«Košty tut vielmi roznyja: usio zaležyć ad zvyčak i pieravah ludziej. U samim Paryžy ceny na pradukty charčavańnia ŭ 2-3 (na niekatoryja pazicyi ŭ 5!) razy daražejšyja, čym za horadam. U siarednim na siamju z dvuch čałaviek, jakija siłkujucca kožny dzień doma, spatrebicca kala 800 jeŭra ŭ miesiac».

Ale pradukty charčavańnia ŭ Francyi — cudoŭnaj jakaści. «Vybar harodniny, sadaviny, syroŭ, ryby i miasa tut prosta vializny. Ja — viehietaryjanka i mahu skazać, što asartymient adpaviednaj pradukcyi tut našmat bolšy, čym u Minsku», — raspaviadaje Karyna.

Pavodle jaje padlikaŭ, dla žyćcia na dvaich tut spatrebicca ad 3500 jeŭra na miesiac i vyšej.

«Tut ludzi žyvuć značna bolš rassłablena, ale zabastoŭki — heta nakštałt nacyjanalnaha vidu sportu»

Zaraz Karyna vučyć francuzskuju z dvuma repietytarami.

«Nieabchodna razumieć, što dla poŭnaj intehracyi viedańnie movy abaviazkovaje. Dy i ščyra kažučy, u Francyi anhlijskuju nie vielmi lubiać».

Jašče z adroźnieńniaŭ, pa nazirańniach dziaŭčyny, ludzi ŭ Francyi žyvuć značna bolš spakojna, mienš śpiašajucca i bolš adpačyvajuć.

«Ujavicie sabie: bolšaść restaranaŭ, kram (u tym liku charčovyja) pa niadzielach nie pracujuć. Hrafik u ich tut uvohule dziŭny: paśla 19:00 ciažka niešta nabyć navat u budny dzień. Lepš za ŭsio płanavać spravy na pieršuju pałovu dnia. Francuzy vielmi volnyja pa svajoj natury, mnie padabajecca za imi nazirać.

Jašče tut usie vielmi pryjaznyja i vietlivyja. Raźvitańnie ŭ kramie na kasie zajmaje šmat času — spačatku mnie było krychu ciažka adkazvać takoj vialikaj kolkaściu kamplimientaŭ, ale ciapier ja atrymlivaju zadavalnieńnie ad takoha rodu znosinaŭ».

Jašče Francyja adroźnivajecca kolkaściu zatoraŭ: u Minsku ich nie byvaje, a tut jany zaŭsiody (i pa vychodnych, i ŭnačy). Vyjazdžać pa spravach treba vielmi zahadzia. Naohuł, u horadzie chutčej za ŭsio pieramiaščacca na mietro (u jakim, darečy, 308 stancyj).

«I, viadoma ž, samaja jarkaja francuzskaja rysa — zabastoŭki. U miascovych žycharoŭ heta niešta nakštałt nacyjanalnaha vidu sportu. Zusim niadaŭna była paliŭnaja zabastoŭka, bo bienzinu nie było na zapraŭkach try tydni. Jašče časta strajkujuć kiroŭcy ciahnikoŭ, tak što pierad pajezdkaj lepš za ŭsio pravieryć maršrut praz prykładańnie».

Zatoje ŭ Paryžy amal zaŭsiody vydatnaje nadvorje: sonca, błakitnaje nieba i vielmi šmat zielaniny. Tak što nastroj tut na paradak lepšy, čym u Minsku.

«Inšaziemcy tut zjaŭlajucca štodzionnaj spravaj — nichto nie źviartaje ŭvahi na pryjezdžych»

Infrastruktura Paryža i pryharadaŭ prosta vydatnaja: vakoł raznastajnyja kramy, bułačnyja, miasnyja łaŭki i h.d. Tut jość miesca dla drobnaha biznesu. U Paryžy vielmi šmat muziejaŭ. Taksama vialikaja kolkaść restaranaŭ, u tym liku z hida Mišlen.

«Atrymlivaju asałodu ad atmaśfiery, lubujusia staradaŭnimi fasadami i ažurna padstryžanymi raślinami. Kožny dzień padčas prahułki ja baču Ejfielevu viežu całkam — radujusia joj, jak dzicia navahodniaj jołcy. Musić, z takich maleńkich radaściaŭ i składajecca žyćcio», — kaža Karyna.

Zaraz jana pastupova viartajecca da fłarystyčnaj pradprymalnickaj dziejnaści: uletku dekaryravała viasielli, a ŭvosień adkryła kramu na płatformie Etsy; zaraz rychtujecca da navahodniaha siezona.

«Ja niejak pračytała adnu frazu, jakaja mnie vielmi spadabałasia: «Pierajezd — heta sacyjalnaja śmierć». Tak jano i jość. Vielmi važna razumieć, što novaja kraina zjaŭlajecca vializnym stresam. Nie varta farsiravać padziei i prymušać siabie rabić toje, što nie možacie. Nie abiasceńvajcie namahańni i chvalicie siabie za nievialikija dasiahnieńni.

Ja raju być maksimalna adkrytymi novamu, razmaŭlać ź ludźmi, padarožničać, bolš čytać i vyvučać miascovuju kulturu. Abaviazkova zajmajciesia sportam — heta dapamoža adnavić emacyjny bałans. Nie zabyvajcie pra chobi i lubimuju spravu», — daje parady jana.

Kamientary4

  • rom
    18.11.2022
    artykuł - kak udačno prisiesť k pudielu na šieju!
    intieriesno čto za rabota u pudiela? šo za takije śpiecy... otkuda oni vzialiś iz kołchoza??
  • Nppie
    18.11.2022
    Karynie chrčacca vyšej za try z pałovaj tysiačy eŭra.
  • Zd́
    18.11.2022
    Usie my tam budziem!

Zamach na Donalda Trampa: stralanina raspačałasia ŭ čas jaho vystupu ŭ štacie Piensilvanija

Zamach na Donalda Trampa: stralanina raspačałasia ŭ čas jaho vystupu ŭ štacie Piensilvanija

Usie naviny →
Usie naviny

U Salihorskim rajonie znajšli vusienia vielmi redkaha matylka. Čamu my tak redka jaho bačym?3

Što adbyvajecca na miažy z Polščaj pierad vychodnymi

«Zamoŭ vielmi šmat». Polski restaran arhanizavaŭ dastaŭku picy prosta ŭ čarhu na miažy ź Biełaruśsiu1

Połk Kalinoŭskaha abvierh paviedamleńnie Minabarony Biełarusi ab hibieli Jana Rudzika3

U Ispanii dakazali hipotezu 54-hadovaj daŭniny viadomaha matematyka rodam z Kobryna

Pad Varšavaj trahična zahinuŭ 31-hadovy biełaruski ravaryst Alaksandr Pustavitaŭ4

Čamu ŭ haračyja dni časta balić hałava i jak ad taho ŭbierahčysia

U miastečku Haradok na Biełastoččynie siońnia pačaŭsia fiestyval Tutaka

Milicyja stralała ŭ dvary minskaha šmatpaviarchovika. Što zdaryłasia?

bolš čytanych navin
bolš łajkanych navin

Zamach na Donalda Trampa: stralanina raspačałasia ŭ čas jaho vystupu ŭ štacie Piensilvanija

Zamach na Donalda Trampa: stralanina raspačałasia ŭ čas jaho vystupu ŭ štacie Piensilvanija

Hałoŭnaje
Usie naviny →