Asudžanaha da 18 hadoŭ kałonii palitviaźnia sudziać znoŭ: hetym razam — za padziei 10-hadovaj daŭniny
Učora ŭ sudzie Zavodskaha rajona Minska pačaŭsia novy sud nad aktyvistam anarchičnaha ruchu, palitviaźniem Dźmitryjem Duboŭskim. Spravu razhladaje sudździa Aleh Kalada, piša «Viasna».
Nahadajem, mužčynu ŭžo asudzili da 18 hadoŭ kałonii ŭzmocnienaha režymu. Ale ŭ vieraśni 2022 hoda suprać jaho raspačali novuju kryminalnuju spravu pavodle č. 2 art. 339 («Chulihanstva») i č. 2 art. 218 Kryminalnaha kodeksa («Naŭmysnaje źniščeńnie abo paškodžańnie čužoj majomaści»).
Padrabiaznaści sudovaha pracesu paviedamili praŭładnyja telehram-kanały.
Praź ich stała viadoma, što ciapier Dźmitryja abvinavačvajuć pavodle padziej u Minsku i Salihorsku ŭ 2009 i 2010 hadach. Tady ŭ Minsku na terytoryju Minabarony zakinuli dymavuju šašku, paśla čaho na prajeznaj častcy adbyłasia akcyja, padčas jakoj skandziravali łozunhi. Taksama Duboŭskaha abvinavačvajuć u tym, što jon zakinuŭ u akno apornaha punkta ŭ Salihorsku fakieł, raźbiŭ kavałkam tratuarnaj plitki škło u Domie prafsajuzaŭ i pryniaŭ udzieł u padpale filiałaŭ banka ŭ Minsku. Taksama jaho abvinavačvajuć u padziejach u vieraśni 2010 hoda, kali byli padpalenyja dźviery KPP na Akreścina.
Zhodna ź infarmacyjaj praŭładnych kanałaŭ, u hetym taksama ŭdzielničali inšyja palitviaźni: Ihar Alinievič, Mikałaj Dziadok, Alaksandr Franckievič, a taksama Silivončyk i Vietkin.
Na pytańnie, ci źjaŭlajecca Duboŭski hramadzianinam Biełarusi, jon adkazaŭ, što jon «tak zvany hramadzianin», bo kala dziesiaci hadoŭ nie mieŭ dačynieńnia da dziaržavy. Palitviazień nie pryznaŭ vinu i paćvierdziŭ svoj udzieł tolki ŭ padziejach u Salihorsku. Adnak jon padkreśliŭ, što nie ličyć svaje dziejańni złačynnymi i nie zhodny ź ich kvalifikacyjaj. Jon patłumačyŭ svaje dziejańni «krajniaj nieabchodnaściu».
Kamientary