15 listapada ŭ druhoj pałovie dnia rasijskija vojski stali abstrelvać abjekty krytyčnaj hramadzianskaj infrastruktury pa ŭsioj terytoryi Ukrainy. Paviedamleńni pra traplańni rakiet i pracu SPA pastupajuć z roznych rehijonaŭ.
Mer Kijeva Vital Kličko paviedamiŭ, što ŭ Piačerskim rajonie Kijeva było dva traplańni, na miescy pracujuć miedyki i ratavalniki. Nieŭzabavie Kličko paviedamiŭ pra jašče adno traplańnie ŭ šmatpaviarchoŭku.
U vyniku abstrełaŭ u stalicy Ukrainy ŭvodziacca ekstrannyja adklučeńni śviatła.
Pazaštatny daradca MUS Ukrainy Anton Hieraščanka paviedamiŭ pra toje, što ŭ Kijevie jość prynamsi adzin zahinuły.
Vybuchi byli zafiksavanyja ŭ Charkavie, tam paviedamlałasia pra prablemy z elektryčnaściu, spyniła pracu miascovaje mietro. Taksama paśla vybuchaŭ źjavilisia pieraboi sa śviatłom i vadoj u Žytomiry, u niekatorych rajonach jany prapali całkam.
Biez elektryčnaści zastałasia častka Lvova, paviedamiŭ mer horada Andrej Sadovy.
U Roŭna nanieśli ŭdar pa abjekcie krytyčnaj infrastruktury, niekatoryja častki horada zastalisia biez elektraenierhii, paviedamiŭ mer horada Alaksandr Traćjak.
Paviedamlałasia taksama pra vybuchi ŭ Kryvym Rozie, Adesie, Kovieli Vałynskaj vobłaści, Čarkaskaj, Chmialnickaj, Ciarnopalskaj abłaściach, a taksama pra pracu SPA ŭ Sumskaj vobłaści.
Chmialnicki, jak paviedamiŭ kiraŭnik miascovaj abłasnoj dziaržaŭnaj administracyi, u vyniku dvuch prylotaŭ častkova zastaŭsia bieź śviatła.
«Rasijskija terarysty nanieśli čarhovy spłanavany ŭdar pa abjektach enierhietyčnaj infrastruktury. Situacyja krytyčnaja. Bolš za ŭsio traplańniaŭ — u centry i na poŭnačy Ukrainy.
U Kijevie situacyja vielmi ciažkaja, užo ŭviali śpiecyjalnyja hrafiki avaryjnych adklučeńniaŭ. «Ukrenierha» vymušana pačać ekstrannyja adklučeńnia śviatła. Hrafiki stabilizacyjnych adklučeńniaŭ pakul nie dziejničajuć», — zajaviŭ pa vynikach abstrełaŭ namieśnik kiraŭnika Ofisa prezidenta Ukrainy Kiryła Cimašenka.
Usiaho ŭ chodzie siońniašniaj ataki rasijanie vypuścili kala 100 rakiet i tym samym pierakryli papiaredni «rekord», ustanoŭleny 10 kastryčnika. Tady było vypuščana 84 rakiety, paviedamiŭ pres-sakratar ukrainskich VPS Juryj Ihnat.
«Siarhiej» nie adzin. Voś jak KDB prapanuje zarabić na sačeńni za biełaruskimi emihrantami2
Kamientary